Read Yucateco Jueces 13 Bible Online

Jueces 13 - Yucateco bible

Jueces 13

¹Ba'ale' le j israelitaobo' tu ca'a beetajo'ob ba'al kaas tu táan Yuumtzil, Yuumtzile' tu kubajo'ob cuarenta ja'abo'ob tu kab le j filisteobo'.

²Tu caajil Zoraa' yaan ca'ach jun túul máac ti' u múuch' cajtalilo'ob u yotochnáalo'ob Dan cu kaaba'intic Manoa. U yatane' mix jun teen yanac u yaal tumen x ma' aal ca'achi.

³U ángel Yuumtzil chíicpaj ti' leti' ca tu ya'alaj: Teche' mix jun téen páatac u yantal a waal tumen x ma' aalech, ba'ale' bejela'e' binel ca'aj x yo'omtal u ti'al ca yanac teech jun túul chaan pal.

⁴Tu yo'olal lelo' ma' bíin a wuk u kaab uva mix u láak wa ba'ax ukulil cu cáalcunaj mix a jaantic wa ba'ax ma' utz yanili'.

⁵Tumen bin u ca'aj yantal jun túul a waal leti'e' ma' unajmal u ko'osol u tzo'otzel u pooli' tumen le paalo' yaan u jun páaycunta'al bey nazareo[2] u ti'al Ku, ma'ili' síijique', leti'e' bíin u cáajes u toquic le j israelitaob ti' u páajtalil le j filisteobo'.

⁶Le co'olelo' j bin u tzicbalt ti' u yíicham ca tu ya'alaj ti': Jaka'an in wóol, jun túul j xiib ti' Ku u taale' j kuch tu'ux yanen, jach chica'an ti' u ángel Yuumtzil. Ma' tin káataj ti' máaxi', mix xan leti' tu ya'alaj ti' teen máaxi'.

⁷Chéen ba'ax tu ya'alaj tene' yaan bin in síijsic jun túul chaan pal, let óolale' ma' unaj in wukic u kaab uva mix wa ba'ax ukulil cu cáalcunaj, mix in jaantic wa ba'ax ma' utzi', tumen le paalo' yaan u jun páaycunta'al bey nazareo u ti'al Ku ma'ili' síijique' tac quéen quíimic.

⁸Manoa túune' j payalchi'inaj ti' Yuumtzil, beya': Yuumtzil quin káatic teech, ca a túuxto'on le j xiib tu ca'a téeno', u ti'al ca u ya'al to'on ba'ax bíin c beet yéetel le chaan pal cu bíin síijilo'.

⁹Kue' tu yu'ubaj ba'ax tu káat óoltaj Manoa, ca tu túuxtaj u ángel, ca j chíicpaj tu ca'a teen ti' le co'olelo', ca'aliquil ti' yaan ca'ach ich coole'. Tu yo'olal mina'an Manoa te'elo'.

¹⁰X leti'e' j bin áalcabil u ya'al: ¡U'uyé le máac tin wilaj tu láak kiine', dzo'oc u chíicpajal ti' teen tu ca'a teen!

¹¹J líik Manoae' ca j bin tu yéetel tac tu'ux yaan ca'ach le máaco', ca tu ya'alaj ti': ¿Teech wa le máax t'aanaj yéetel in watan tu láak kiine'? Le máaco' tu núucaj: Bey, teen.

¹²Manoa túune' tu ya'alaj: Le quéen úuchuc le ba'ax ta wa'alajo', ¿bix bíin c ch'íijes le paalo'? ¿Ba'ax bíin c beet yéetel?

¹³Ángel Yuumtzile' tu núucaj: A watane', ca u beet tuláacal ba'ax tin wa'alaj ti':

¹⁴ma' u yukic u kaab uva mix u láak ba'ax beeta'an yéetel u kaab uva, mix u láak ukul cu cáalcunaj, mix u jaantic mix ba'al ma' utz yanile', chéen ca u beet le ba'ax tin wa'alaj ti'o'.

¹⁵Manoae', ma' tu tucultaj wa le j xiibo' u ángel Yuumtzil ca tu ya'alaj: Bet utz a p'áatal t éetel u ti'al a jaant jun túul cháan j yuuc c bin j máakanté. Le ángelo' tu núucaj: Quex wa ca p'átaquene', ma' tu páajtal in janal ta wéetele'ex, ba'ale' je'el u páajtal a kubic le cháan j yuuc bey láaj tóocbil ba'alche' u ti'al Yuumtzil.

¹⁷Manoa túune' tu ya'alaj ti' le ángelo': A'alto'on bix a kaaba', u ti'al ca c nib óolal ti' teech le quéen kuchuc u kiinil u béeytal le ba'ax ta wa'alajo'.

¹⁸Le ángelo' tu núucaj: ¿Ba'axten a káat a woojéelt in kaaba'? Lela' jun p'éel x ba'al mucul jak óolbe'en.

¹⁹Manoae' tu ch'a'aj le chan j yuuc yéetel u ti'ibil óolalil janalbe'en neeko'ob, ca tu dzaj yóokol jun p'éel nojoch tuunich, ca tu kubajo'ob láaj tóocbil ti' Yuumtzil. Yuumtzil túune' tu beetaj ba'al jak óolbe'en tu táan Manoa Yéetel tu táan u yatan:

²⁰le ca j líik u tóoch'bal le káak tu tuunichil kultaj Manoa yéetel yatane' tu yilajo'ob u ángel Yuumtzil u na'acal ca'an ichil u tóoch'bal le káako'. Ca j noclajo'ob j lu'um.

²¹Manoae' tu kaj óoltaj, le j xiib ca'acho' u ángel Yuumtzil, tumen ma' suunaj chíicpajal mix ti' leti', mix ti' u yatan.

²²Ca tu ya'alaj ti' u yatan: Jach yaan j quíimil, tumen dzo'oc ilic Ku.

²³Ba'ale' x leti'e' tu núucaj: Wa Yuumtzil u káat ca'ach u quíimso'one', ma' tu kamic ca'ach le láaj tóocbil ba'alche' mix le ti'ibil óolalo', mix ca'ach u p'atic ilic le ba'alo'oba', mix tuláacal ca'ach u kaytic to'on le ba'alo'oba'.

²⁴Le ca j kuch u kiinile', u yatan Manoa yanji u paal ca tu dzaj u kaaba'int Sansón. Le paalo' j bin u ch'íijil, yéetel cu qui' t'anta'al tumen Yuumtzil.

²⁵Jun p'éel kiin ti' yaan ca'ach Sansón tu cajtalilo'ob Dane', chúumuc Zora yéetel Estaol, jo'op u chíicpajal tu cuxtal, u pixan Yuumtzil.