Read Yucateco Jueces 15 Bible Online

Jueces 15 - Yucateco bible

Jueces 15

¹Cu dzo'ocol u máan dze'edzec kiine', u kiinil táan u joochil trigo, Sansone' suunaj u yil yatan ca tu bisaj jun túul chan j yuuc ti'. Ca j cóoje' tu ya'alaj: Bin in ca'aj ocol in wil in watan, ichil u káasab naj. Ba'ale' u taata u yatane' ma' tu cha'aji'.

²Ba'ale', tu ya'alaj ti': Tene' tin tucultaje' ma' a yacuuntmaji' let óolal tin dzaj ti' a weet aj bisajbáil, ba'ale' wa a káat u yitzine' asab qui'ichpam ti' leti'; ch'a'a u ti'al u jeelintic u quiic.

³Sansone' tu núucaj: ¡Bejela'e' mina'an ba'ax o'olal in wa'alic ba'ax loobil bíin in beet ti' le j filisteobo'!

⁴Sansón túune' j bine' ca tu chucaj trecientos j ch'omaco'ob, ca tu kaxla'antaj ca'a ca'a túulilo'ob tu nejo'ob, ti' le ca'a ca'a túulo' tu kaxla'antaj tu nejo'ob jun p'éel tajche';

⁵cu dzo'ocol u t'abic le tajche'obo' tu cha'ajo'ob ichil u pakalilo'ob le j filisteob, bey úuchic u tóoquic le trigo much'quinta'an ca'acho', pa'ate' xan yéetel le ma' xo'otoco', tac u pakalil uva yéetel u paakalil olivo.

⁶Le j filisteob jo'op u káat chi'itico'ob máax tóoc u yich u pakalo'ob; le ca tu yojéeltajo'ob Sansón beet tu yo'olal úuchic u to'ocol u yatan tumen u taata le co'olelo', le j timnato'obo' ca tu dzaj ti' yaanal j xiib. J bino'obe' ca tu tóocajo'ob le co'olelo' pa'ate' yéetel u taata.

⁷Sansón túune' tu ya'alaj: Tu yo'olal bey a bisicaba'exo', quin ¡jalach t'antic ma' bíin je'elequen wa ma' p'is in sutic ti' te'ex u jeel le ba'ax dzo'oc a beetique'exo'!

⁸Ca tu pulajubáa u beet loob ti'ob yéetel nojoch p'u'ujulil, ma' tu p'ataj mix jun p'éel u baaquelo'ob ma'alobi'. Cu dzo'ocole' j bin cajtal ti' le áactun yaan tu witzil Etamo'.

⁹Le j filisteobo' j taalo'obe', ca j je'elo'ob Judá, ca j kucho'ob tac Lehi,

¹⁰ca j káat chi'ita'ab ti'ob tumen le judiobo': ¿Ba'ax o'olal j taale'ex a ba'atelto'one'ex? Leti'obe' tu núucajo'ob: J taalaja'ano'on u ti'al c mach Sansón, u ti'al u bo'otic le ba'ax tu beetaj ti' to'ono'.

¹¹Le ca tu yu'ubajo'obe', le tres mil xiibo'ob ti' u múuch' cajtalil u yotochnáalo'ob Judáe' j bino'ob te j áactun yaan tu witzil Etame' ca tu ya'alajo'ob ti' Sansón: ¿Ma' wa a wojele' le j filisteob tip'a'an u páajtalilo'ob ti' to'on? ¿Ba'axten ca dzáico'on tu chi' quíimil? Sansone' tu núucaj: Tene' chéen tin beetaj le kaas beeta'ab ti' teeno'.

¹²Leti'ob túune' tu ya'alajo'ob ti': To'one' j taalaja'ano'on c machech u ti'al ca c kubech ti' le j filisteobo'. Sansone' tu núucaj: Dza'ex teen a jalach t'aanil ma' te'ex bíin a quíimsene'exi'.

¹³Leti'obe' tu jach a'alajo'ob ti': Ma', to'one' ma' t bin j quíimsech. Chéen j káat machech u ti'al c kubiquech ti' le j filisteobo'. Ca túun tu kaxajo'ob yéetel ca'a p'éel túumben suume', ca tu jóokesajo'ob te tu'ux u ta'acbesmubáa ca'acho'.

¹⁴Le ca j kucho'ob Lehie', le j filisteobo' jóoko'ob u pa'ato'ob táan u yawato'ob yéetel qui'imac óolal. Ba'ale' u pixan Yuumtzile' ooc ti' Sansón, ca tu t'ocaj le suumo'ob kaxa'anil u kabo'ob, bey suum beeta'ano'ob yéetel tóocbil kuuche'.

¹⁵Cu dzo'ocole' tu ch'a'aj jun p'éel u cama'ach burro yaan ca'ach te'elo', ma'ili' jach tijique', yéetel lela' tu quíimsaj mil filisteob.

¹⁶Cu dzo'ocole' tu ya'alaj: Yéetel u cama'ach jun túul burroe' tin beetaj jun múuch' yéetel ca'a múuch'o'ob; yéetel u cama'ach jun túul burroe' tin quíimsaj mil xiibo'ob.

¹⁷Cu dzo'ocole' tu pulaj le cama'acho' le t óolale' le cúuchilo' cu kaaba'intic Ramat-lehi.[3]

¹⁸Tu yo'olal sen ukaj ca'ache' Sansone', tu t'anaj Yuumtzil ca tu ya'alaj ti': ¿Bix úuchic u páajtal a dzáic ti' teen le nojoch pa'amuuka', ba'ale' bejela'e' ca a p'atiquen j quíimil yéetel ukaj tu kab le j ma' ocsaj óolo'obo'?

¹⁹Ku túune' tu je'aj le jool yaan Lehio', Sansone' tu yukaj ja' cu jóokol te j kóomo', ca tu yu'ubaj yaan yóol. Let o'olale', le sayab yaan tac bejela'a' Lehio' dza'ab u kaaba'int En-hacore.[4]

²⁰Sansone' tu méektáantaj Israel veinte ja'abo'ob, ti' le kiino'ob le j filisteobo' yaan u páajtalilo'ob te j lu'umo'.