Read Yucateco Jueces 17 Bible Online

Jueces 17 - Yucateco bible

Jueces 17

¹Tu witzilo'ob Efraine' caja'an ca'ach jun túul j xiib cu kaaba'intic Micaía,

²leti'e' tu cáantaj ti' u maama: Le mil yéetel cien sac taakin le j ocolta'ab ti' teecho', ca ta loolob t'antaj le j oocolo', ti' teen yaan. Tumen teen tin woclaj ti' teech; ba'ale' bejela'e' quin sutic ti' teech, tumen tin wu'uyaj a wa'alique' a jun páaycuntamaj ca'ach ti' Yuumtzil u ti'al a túuxtic beetbil jun p'éel ku pola'an yéetel to'an yéetel plata. Ca tu sutaj le platao'. U na' túune' tu ka'am a'alaj: ¡Yuumtzil u qui' t'anteech, in j xiibil aal!

⁴Cu dzo'ocol u sutic le taakin Micaía ti' u maamae', leti'e' tu kubaj ti' jun túul máax cu beetic kuob, doscientos sac taakin u ti'al u beetic jun p'éel beetbil ku to'an yéetel plata, cu dzo'ocole' Micaía tu bisaj tu yotoch.

⁵Micaía u beetmaj ca'ach tu yotoche' jun p'éel cúuchil tu'ux cu kultic u kuob. Ca tu beetaj jun p'éel efod yéetel jejeláas kuob, ca tu ya'alaj ti' jun túul u paale' ca u beet u aj kiinil.

⁶Ti' le kiino'obo' mina'an ajaw tu lu'umil Israel, le beetic je'el máaxaque' cu beetic je'el ba'axac u káate'.

⁷Yaan ca'ach tu caajil Belén jun túul j táanquelem xi'ipal j táanxel caajil ti' u ch'i'ibalo'ob Judá, leti'e' j levita ca'achi.

⁸Le j xi'ipala' jóok Belén táan u caxtic u láak cúuchil u ti'al u cajtal, Táan u máanbal tu pu'uquilo'ob Efraine' ca j cóoj tac tu yotoch Micaía.

⁹Tu káat chi'itaj Micaía ti': ¿tu'ux a taalbal? Tu núucaj le j xi'ipalo': Belen in talbal, j Levíen, táan in caxantic tu'ux bíin caajlaquen.

¹⁰J A'ala'ab ti' tumen Micaía: p'áaten way tin wicnale', u ti'al ca a beetabáa in aj kiin bey xan ca béeyaquech in taata, tene' quin bo'otic teech diez sac taakin ti' jun ja'ab, bey xan quin dzáic ti' teech nook yéetel janal.

¹¹Le j levio' tu éejemtaj, ca j p'áat cajtal tu yotoch Micaía, j máan kiine' ca a j p'áat bey jun túul u paalale'.

¹²Micaía tu beetaj u aj kiinil, j p'áat cajtal le j xi'ipal te'elo'.

¹³Bey túuno' Micaía tu tuclaje', yéetel lelo' yaan ti' u qui' t'aano'ob Ku, tumen ti' yaan yéetele' jun túul j leví bey u aj kiine'.