Read Yucateco Jueces 18 Bible Online

Jueces 18 - Yucateco bible

Jueces 18

¹Ti' le kiino'obo' mina'an ca'ach ajaw Israel. U múuch' cajtalil u yotochnáalo'ob Dane' mina'an lu'um u ti'alinto'ob, le beetic táan ca'ach u kaxtico'ob tu'ux u cajtalo'ob.

²Let o'olal le j Danilo'obo' tu túuxtajo'ob líikbal Zora yéetel Estaol cinco u asab jach j xiibil cajnáalilo'ob u ti'al u xakalt ilo'ob u múuch' cajtalilo'obo' le cúuchilo'. Le cinco xiibo'oba' j bino'ob tu pu'uquilo'ob Efraín ca j kucho'ob tu yotoch Micaía, tu'ux j p'ato'ob u máanso'ob le áakabo'.

³Táan u náadzalo'ob tu yotoch Micaía ca tu yu'ubajo'ob u t'aan jun túul xi'ipal ca tu kaj óolto'ob jun túul j Leví, ca j bino'ob u káat chi'ito'ob ti': ¿máax taasech waye'? ¿Ba'ax o'olal yanilech waye'? ¿Ba'ax ca caxtic te'ela'?

⁴Le j levio' tu tzicbaltaj ti'ob le kax t'aan tu beetaj yéetel Micaía je'el bix xan le nup t'aan u ti'al ca u beetubáa bey u aj kiine'.

⁵Leti'ob túune' tu ya'alajo'ob ti': Káatchi'it ti' Ku, u ti'al ojéeltic wa je'el u bin to'on utz ti' le xíimbala'.

⁶Tu núucaj le aj kiin levio': Xeene'ex x ma' sajaquil, Yuumtzil bíin u yáante'ex je'el tu'ux ca máanaque'exe'.

⁷Le cinco xakal ilaj lu'umo'oba' j bino'ob tac Lais. U cajnáalilo'ob le cúuchila' jach jedzecnac cajacbalico'ob, je'el bix suuc ti' le j sidonitaob; x ma' sajaquil caja'anilo'ob, jach jedzecnac; yaan jéedzel ca'achi ti'ob, mix máac cu ba'atel yéetelo'ob, mix cu yocsicuba'ob yéetelo'ob tuláacal ba'ax yaan ti'ob. Le j sidonitaobo' náach caja'ano'ob, let o'olal yéetel mix máac cu bisicuba'ob.

⁸Le cinco xakal ilaj caajo'ob túuno' suunajo'ob tu caajilo'ob Zora yéetel Estaol, tu'ux j p'áato'ob u yéet xíimbalo'obo', ca j káat chi'ita'ab ti'ob: ¿Bix binic te'ex? Leti'obe' tu núucajo'ob:

⁹Xíimbaltaj le múuch' cajtalo'obo' ca t ilaj le lu'umo' sen ma'alob. ¡Líikene'ex! ¡co'ox ba'ateltico'ob! ¡Ma' a p'áatale'ex culucbale'ex, ma' táan a beetique'ex mixba'al! ¡Yaan c bin jáanpayt le lu'umo'!

¹⁰Le quéen kuchuque'ex te'elo' yaan a wilique'ex máaco'ob jejedzquilo'ob caja'anilo'ob yaan ya'ab u lu'umilo'ob, mixba'al cu bineltic ti'ob, Ku bíin u dzáa ca a ch'a'ex.

¹¹Seiscientos u j xiibilo'ob u ch'i'ibalo'ob Dane' jóoko'ob Zora yéetel Estaol táan u bisico'ob u nu'ucul ba'atel.

¹²Le ca j kucho'ob Judae' je'elo'ob tu chikin Quiriat-jearim, le cúuchil cu kaaba'intic bejela'e' u Jaato Dan.

¹³j líiko'ob Te'elo' ca j bino'ob tu pu'uquilo'ob Efraín ca je'elo'ob tu yotoch Micaía.

¹⁴Le cinco máaco'ob taalo'ob ca'ach u xakalt ilo'ob u múuch' cajtalilo'ob Laise' tu ya'alajo'ob ti' u yéet xíimbalo'obe': ¿A wojele'ex jun p'éel ba'al? te j najo' yaan jun p'éel efod yéetel jejeláas kuob bey xan jun p'éel póolbil ku to'an yéetel plata. ¿Ba'ax ca tucultique'ex a beetique'ex?

¹⁵Le aj xakalt ilaj caajo'obo' náachchajo'ob ti' le u yéet xíimbalo'obo' ca j bino'ob tu yotoch le j xi'ipal levio', u káat ya'ale' tu yotoch Micaía, ca tu te'escuntajo'ob.

¹⁶Ca'aliquil le seiscientos aj ba'atelo'ob j danilo'ob yéetel u nu'ucul ba'atele' táan pa'atajo'ob tu jool le najo'.

¹⁷Le cinco j xakal caajo'obo' j ooco'ob táanil te j najo' ca tu ch'a'ajo'ob le póolbil ku to'an yéetel plata, le efod yéetel u kuob le j otochnáalo'obo', ca'aliquil le aj kiino' j p'áat tu jool le naj yéetel le seiscientos aj ba'atelo'obo'.

¹⁸Ca tu yilaj le aj kiin le cinco j ooco'ob tu yotoch Micaía táan u bisico'ob le póolbil ku, le efod yéetel le otochnáalo'ob kuob, tu ya'alaj ti'ob: ¿Ba'ax ca beetique'ex?

¹⁹Leti'obe' tu núucajo'ob: ¡Mac a chi', co'oten t éetel! ¡J káate' ca a meyajto'on bey aj kiine' yéetel ca beeyaquech bey jun túul taata ichilo'one'! ¿Ma' ta wilic ma'alob ca beetabáa aj kiin ti' tuláacal u múuch' u ch'i'ibalo'ob Israel, ma' chéen jun p'éel u yotoch jun túul j xiibi'?

²⁰Lela' utzchaj ti' le aj kiino' ca tu ch'a'aj le póolbil kuobo' le efodo' yéetel u kuob le j otochnáalo'obo', ca j bin yéetelo'ob le j danilo'obo',

²¹Ca j xíimbalnajo'ob tu ca'a téene' táan u bisico'ob táanile' le mejen paalalo'obo', u wacaxo'ob je'el bix tuláacal ba'ax yaan ti'ob.

²²Dzo'oc ca'ach u xíimbaltico'ob ya'abe', Micaía yéetel u yéet cajtalilo'ob, ca j bino'ob u ch'a'apachto'ob.

²³Le j danilo'obo' tu yu'ubajo'ob u yawato'ob le máaxo'ob ch'a'apachtico'obo' ca tu sutajuba'obe' ca tu káat chi'itajo'ob ti' Micaía: ¿Ba'ax cu yúuchul teech? ¿Ba'axten ca wawtico'on beya'?

²⁴Micaíae' tu núucaj: Te'exe' táan a bisique'ex le kuob tin beetajo', bey xan in aj kiin, táan a p'atiquene'ex yéetel mix ba'al, ¿cu dzo'ocole' ca káat chi'itique'ex teen ba'ax cu yúuchul teen?

²⁵Le j danilo'obo' tu núucajo'ob: Ma' ka'am awatico'on, ma' xan ca yanac máaxo'ob ichilo'on ca p'u'ujuco'obe' ca u loobiltecho'ob, cu dzo'ocole' ca quíisa'aquech yéetel a wéet otochnáalo'ob.

²⁶Ca tu yilaj Micaía ya'abo'obe', leti'e' j suunaj tu yotoch; ba'ale' le j danilo'ob túuno' j bin u xíimbalo'ob

²⁷yéetel le ba'alo'ob tu beetaj Micaía yéetel xan u aj kiin, ca j kucho'ob tac Lais. Te'elo' u caajnáalilo'obe' utz u bisicuba'ob, let o'olal ca j cóojo'ob le j danilo'obo' tu quíimsajo'ob tuláacalo'ob ch'acbil yéetel máascab ca tu tóocajo'ob le caajo'.

²⁸Tu yo'olal náach yanil le caaj ti' Sidone', yéetel ma' tu bisicuba'ob yéetel mix máaque', ma' yanchaj máax áantico'obi'. Ti' yaan ca'ach te j táax lu'um cu ti'alintic Bet-rehob. Cu dzo'ocole' le j danilo'obo' tu ca'a líiksajo'ob le caajo' ca j p'áato'ob cajtali'.

²⁹Quex cu kaaba'intic ca'ach Laise', leti'obe' tu dzajo'ob u kaaba'int Dan, u ti'al tziquico'ob u máanja'an ch'i'ibal bey u kaaba' ca'ach jun túul u paal Israel.

³⁰Te'elo' le j danilo'ob tu dzajo'ob u póolbil kuo' u ti'al u kultico'ob, u aj kiin ca'ache' Jonatán, u paal Gersón yéetel u yáabil Moisés. Cu dzo'ocole' u ch'i'ibalo'ob Jonatán tu beeto'ob ca'ach aj kiin ti' le j danilo'obo', ti' yano'ob ca'ach táanxel lu'ume'.

³¹Te'elo' tu p'atajo'ob ichilo'obe' le póolbil ku tu beetaj ca'ach Micaía, tuláacal le kiino'obo' ti' yanji u quili'ich naj Yuumtzil Siloe'.