Read Yucateco Jueces 2 Bible Online

Jueces 2 - Yucateco bible

Jueces 2

¹U ángel Yuumtzile' j bin Gilgale' tac Boquim, ca tu ya'alaj ti' le j israelitaobo': Tene' tin jóokese'ex Egipto, dzo'oc in taasique'ex te j lu'um le tin séeb chi'itaj ti' a máanja'an ch'i'ibale'ex le ca tin wa'alaj: Mix bikin bíin in mixba'alcuunt in nup t'aan ta wéetele'ex,

²wa ma' ta beetique'ex mix jun p'éel nup t'aan yéetel u cajnáalilo'ob le lu'uma', ba'ale' unaj xan a xu'ulsique'ex u multuunil u kultajo'ob. Ba'ale' te'exe' ma' ta dzo'ocbesaje'ex in t'aani', ¡il a wile'ex ba'ax ta beetaje'ex!

³Let o'olal quin wa'alic ti' te'ex: ma' bíin in tojolch'int le caajo'ob yaan ta táane'exo', leti'ob yéetel u kuobe' jun p'éel táabsaj a ti'ale'ex.

⁴Le ca j dzo'oc u t'aan u ángel Yuumtzile', tuláacal le j israelitaobo' awat okolnajo'ob.

⁵Le beetic cu kaaba'intic Boquim le cúuchilo', te'elo' tu kubajo'ob quiimsbil ba'alche'ob ti' Yuumtzil.

⁶Le ca j dzo'oc u quíimil Josuee', le j israelitaobo' tu jujun túulil binico'ob u ch'a'ob le lu'um dzo'oc ca'ach u t'o'oxol ti'obo'.

⁷Ca'aliquil cuxa'an ca'ach Josuee' le j isrealitaobo' ma' tu p'atajo'ob u kultajil Yuumtzile'; bey xan ca'aliquil cuxa'ano'ob u nuuquilo'obi', le j p'áato'ob cuxa'ano'ob cu dzo'ocol u quíimil Josué, le máaxo'ob tu yilajo'ob tuláacal le nucuch ba'alo'ob tu beetaj Yuumtzil tu yo'olal Israel.

⁸Ba'ale' j quíim Josué tu ciento diez ja'abo'ob,

⁹ca j mu'uc Timnat-sera te j lu'um u ti'al ca'acho', le yaan tu xaman u witzil Gaas, tu pu'uquil Efraín.

¹⁰Láaj quíimo'ob xan le israelitaob yano'ob ca'ach tu kiinilo'ob Josuee'. Let o'olal le j síijo'ob tu dzoocbalaco' ma' tu yojéeltajo'ob mixba'al ti' le ba'alo'ob tu beetaj Yuumtzil, bix tu yáantilac Israel.

¹¹Ba'ale' le ba'alo'ob tu beetajo'ob le j israelitaob tu yich Yuumtzile' kaastac, tumen tu kultajo'ob jejeláas yoochelo'ob le beetbil ku cu kaaba'intico'ob Baal.

¹²Tu p'atajo'ob Yuumtzil, u Ku u yúuchben ch'i'ibalo'ob le máax jóokeso'ob Egiptoe', ca tu kubajuba'ob u kulto'ob u kuob le máaco'ob caja'ano'ob tu bakpache', ca tu beetajo'ob u p'u'ujul Yuumtzil.

¹³Tu p'atajo'ob Yuumtzil u ti'al u kultico'ob ku Baal yéetel u jejeláas yoochelo'ob x Astarté,

¹⁴Let o'olal Yuumtzile' j p'u'uj yéetel Israel ca tu beetaj u yocolta'al tuláacal ba'ax yaan ti'ob tumen j oocolo'ob, j pa'ab u muuko'ob xan tumen u aj p'eeco'ob le caja'ano'ob ca'ach tu bakpacho', leti'obe' ma' j páatchaj u beetico'ob mix ba'al u ti'al u toquicuba'obi'.

¹⁵Ti' je'el ba'axac kiin tu yóoltajo'ob j bin ba'atele', j bin kaas ti'ob tumen Yuumtzile' ma' tu yáantajo'obi', je'el bix u ya'almaj ca'ache'. Ba'ale' quex tumen Yuumtzil tu beetaj u mukyajo'ob le j israelitaobo',

¹⁶bey xan tu beetaj u líikil máaxo'ob áantico'ob u ti'al u to'ocolo'ob tu kab le máaxo'ob otzilcuntico'obo'.

¹⁷Ba'ale' le j israelitaobo' ma' tu yu'ubaj t'antajo'ob le máaxo'ob áantico'obo', ba'ale' tu kexajo'ob Yuumtzil ca tu kultajo'ob u yaanal kuob. U máanja'an ch'i'ibalo'obe' tu dzo'ocbesajo'ob ca'ach u ya'almaj t'aano'ob Yuumtzil, leti'obe' ma' tu beetajo'ob beyo'.

¹⁸Je'el jay téen cu beetic Yuumtzil u líikil jun túul máax méektáantico'obe' cu yáantic, ca'aliquil cuxa'an le máax áantico'ob ca'acho', le israelitaob cu to'ocolo'ob tu kab u aj p'eeco'ob, tumen Yuumtzile' cu ch'a'ic óotzilil ti'ob tu yo'olal u yaayaj okolo'ob ichil u mukyajo'ob tu kab u aj p'eeco'ob.

¹⁹Ba'ale' le quéen quíimic le máax áantico'obo', leti'obe' cu ca'a kastalo'ob, asab kastalo'ob ti' u taataob, iquil u meyajtico'ob yéetel u kultico'ob u láak kuob. Ma' tu p'atico'ob le ba'alo'ob cu beetico'obo', mix u kaakas cuxtalo'ob.

²⁰Let o'olal Yuumtzile' jach p'u'uj yéetel Israel, ca tu ya'alaj: Le máaco'oba' cu mixba'alcuuntico'ob le nup t'aan tin beetaj yéetel u máanja'an ch'i'ibalo'ob, ma' xan u káat u yu'ubo'ob in t'aani'.

²¹Let o'olalo' ma' bíin suunaquen in tojolch'int tu táano'ob mix jun p'éel ti' le caajo'ob ma' tu tojolch'intaj Josuee' ma'ili' quíimique'.

²²yéetel lela' Yuumtzil u káat u yil ca'ach wa le israelitaobo' cu máano'ob wa ma' tu ma'alob beel Yuumtzil, je'el bix tu beetajo'ob ca'ach u máanja'an ch'i'ibalo'obe'.

²³Let o'olal Yuumtzile' ma' tu téec tojolch'intaj le caajo'ob, le ma' tu kubaj tu kab Josuee', tu cha'aj u p'áatalo'ob.