Read Yucateco Jueces 20 Bible Online

Jueces 20 - Yucateco bible

Jueces 20

¹Tuláacal túun le j israelitaob likul tu lu'umil Dan tac Beerseba yéetel Galaad, tu much'ajuba'ob Mizpa tu táan Yuumtzil bey chéen jun túul wíinique'.

²tuláacal u nuuquilo'ob u ch'i'ibalo'ob Israel, ti' u caajal Kue' much'lajo'ob cuatrocientos mil xíimbal aj ba'atelo'ob.

³U múuch' cajtalil u yotochnáalo'ob Benjamine' tu yojéeltajo'ob dzo'oc u much'talo'ob Mizpa le u láak u ch'i'ibalo'obo' le j israelitaobo'. Le j israelitaobo' tu káatajo'ob ti' le j levitao' bix úuchic u quíimsa'al le co'olelo'.

⁴Le j levita u yíicham ca'ach le x quimeno' tu ya'alaj: Tene' j kuchen yéetel in x keech tu caajil Gabaa, tu lu'umil u múuch' cajtalil u yotochnáalo'ob Benjamín, u ti'al in máansic áakab.

⁵ti' le áakabo' u cajnáalilo'ob le caajo' tu bakpachtajo'ob le naj tu'ux bin c je'elel ca'acho', yéetel u tuuculil u quíimsiqueno'ob, tu yo'olal ya'ab wíinico'ob j chilajo'ob x yéetele' j quíimi'.

⁶Teen túune' tin ch'a'aj u quimen wíinclile' ca tin xo'oxotaj, u ti'al in túuxtic u xéexet'al ti' tuláacal u caajilo'ob Israel, u ti'al ca ojéelta'ac le kaakas quíimsaj beeta'abo'.

⁷Bejela'e' te'ex tu yo'olal israelitaexe' unajmal a wa'alique'ex yéetel a xot t'antique'ex ba'ax no'oja'an kabéet u beeta'al.

⁸Bey chéen jun túul xiibe', tuláacal j líiko'ob ca tu ya'alajo'ob: Mix jun túul ti' to'on bíin xi'ic tu chuybil naj wa tu yotoch.

⁹Je'el le ba'ax unajmal c beetica' co'ox ilic ich buul máaxo'ob unaj u bino'ob u ba'atelt le j Gabailo'.

¹⁰Ti' jun túul ti' diez j xiibo'ob ti' tuláacal le múuch' cajtalil u yotochnáalo'obe' yaan u yilic bix u caxtic janal u ti'al le aj ba'atelo'obo'; u láako'obo' yaan u bino'ob u dza'ob ba'ax u najmal u beeta'al ti' Gabaa tu yo'olal le talam subtzil ba'al j beeta'ab tu lu'umil Israel.

¹¹Tuláacal le j israelitaob tu nupajuba'ob bey chéen jun túul xiibe' ca j bino'ob ba'atel te j caajo'.

¹²Táanile' tu túuxtajo'ob aj bisaj t'aano'ob ti' tuláacal u lu'umilo'ob u múuch' cajtalil u yotochnáalo'ob Benjamín u ti'al u ya'alico'ob: ¿Ba'ax loobil dzo'oc u beetic dze'edzec ti' te'ex?

¹³Kube'exo'ob ti' to'on le dze'edzec loolob wíinico'ob yaan Gabaa, u ti'al quíimisico'ob beyo' c beetic u yutsil áanta'al Israel ti' le loobo'. Ba'ale' le j Benjaminilo'obo' ma' tu yu'ubajo'ob u t'aan u sucu'uno'ob le j israelitaobo',

¹⁴ma' chéen le je'elo'obo' ba'ale' tuláacal le j benjaminilo'obo' caja'ano'ob ti' u láak caajo'obo' tu much'ajuba'ob Gabaa u ti'al u bino'ob u ba'atelto'ob le israelitaob u láaktzilo'obo'.

¹⁵U aj ba'atelo'ob u cajtalil Benjamine' le tu tzolajubaob ca'ache' veintiseís mil, le máaxo'ob ma' j xo'oco' setecientos j xiibo'ob yéeya'ano'ob Gabailo'ob ca'acho'.

¹⁶Ichil tuláacal le j xiibo'oba' yaan ca'ach setecientos cu meyajo'ob yéetel u x dzíic kab ma'alobo'ob u ti'al j ch'iin ca'ach yéetel yúuntun cu páajtal ca'ach u tzayico'ob ti' jun cúul tzo'otz mix jun téen cu p'áatal wa ma' tu tza'ayal.

¹⁷Le j israelitaob bey xan tu much'quintajo'ob cuatrocientos mil aj ba'atelo'ob u yojelo'ob jach ma'alob le ba'atelo'.

¹⁸Le j israelitaob j bino'ob Betel, te'elo' tu káat óoltajo'ob ti' Ku ca a'ala'ac ti'ob máax ti' u ch'i'ibalo'ob unaj u bin ba'atelt le j Benjaminitaob. Yuumtzile' tu ya'alaj Judá unaj u bin táanil.

¹⁹Bey túuno' le j israelitaob líiko'ob táan u píik sáastale' ca j je'elo'ob actáan ti' Gabaa.

²⁰Xíimbalnajo'ob táan u nadzicuba'ob ti' u lu'umil Benjaminitaobo' ca tu tzolajuba'ob actáan ti' Gabaa ti' u tzoolol ba'atel.

²¹Ba'ale' le j Benjaminitaobo' jóoko'ob te j caajo' ca tu quíimsajo'ob veintidós mil israelitaob.

²²Le beetic le j israelitaob j bino'ob tac Betel táan u yawat okol tu táan Yuumtzil tac ocnal kiin, te'elo' tu káat chi'itajo'ob wa yaan u bino'ob u ba'atelto'ob u láaktzilo'ob u ch'i'ibalo'ob Benjamín. Yuumtzile' tu ya'alaj ca xi'ico'ob, bey túuno' yanchaj u yóolo'ob, tu láak kiine' j suunajo'ob u ba'atelto'ob le j Benjaminilo'ob láili' ti' le yáax cúuchilo'.

²³

²⁴

²⁵Ba'ale' tu ca'a téene' le j Benjaminilo'ob jóoko'ob Gabaa ca tu pa'ajo'ob u muuk le j israelitaob, ca j quíimsajo'ob u láak Dieciocho mil aj ba'atelo'ob.

²⁶Tuláacal túun u aj ba'atelo'ob Israel yéetel tuláacal le caajo' ca'a j bino'ob Betel, táan u yokolo'ob tu táan Yuumtzil. Tuláacal le kiino' su'ukinajo'ob, ca tu táanbesajo'ob ti' Yuumtzil láaj tóocbil ba'alche' yéetel quíimsbil ba'alche' ca'a bisajbáa.

²⁷Ti' le kiino'obo' u ba'asche'il u nup t'aan Ku ti' yaan ca'ach Betel, yéetel u aj kiin Ca'ache' Finees, u paal Eleazar u yáabil Aarón. Le j israelitaob tu káat chi'itajo'ob ti' Yuumtzil. ¿Unaj c bíin ba'atelt tu ca'a téen yéetel le c láako'ob u ch'i'ibalo'ob Benjamín, wa ca xúump'atte? Yuumtzile' tu ya'alaj ti'ob: Pulaba'ex yóokolo'ob, sáamale' teen bíin in dzáa ti' te'ex ca'a pa'ex u muuko'ob.

²⁸

²⁹Bey túuno' dze'edzec aj ba'atelo'obe' tu ta'acbesicuba'ob tu bakpach Gabaa,

³⁰ca'aliquil u láako'obo' tzol xíimbalnajo'ob le óox kiino'ob ca tu tzolajuba'ob u ti'al j ba'atel actáan ti' Gabaa, láili' je'el bix le u láak ca'a téene'.

³¹U láak jun téen, le j múuch' cajtalil u yotochnáalo'ob Benjamín jóoko'ob te j caajo', táan u bin náachtalo'ob u ti'al ba'atel yéetel le j israelitaob. Ca tu quíimsajo'ob bey treinta israelitaob tu bejil Betel yéetel Gabaa bey xan tu káaxilo'ob.

³²Tu tucultajo'obe' táan ca'ach púudzulo'ob ti'ob le j israelitaob je'el bix le yáax ca'a téene'. Ba'ale' le j israelitaob táan u náachtalo'ob ti' noj caajo' u ti'al ca ch'a'apachto'ob tumen u aj p'eeco'ob tac te j bejo'obo'.

³³Le israelitaob téec jóoko'ob te tu'ux u ta'acbesmajuba'ob ca tu tzolajuba'ob ba'atel Baal-tamar; le u ta'acbesmajuba'ob ichil le pakalo'obo', yéetel le yano'ob tu bakpach Gabaa, jóoko'ob.

³⁴Ca tu pulajuba'ob yóokol le caajo'. Diez mil ca'ach u ma'alob aj ba'atelo'ob le j israelitaob ca tu ba'atelto'ob Gabaa. Le ba'atelo' yaachaji', le j Benjaminitaob ma' u yojelo'ob ca'ach wa ta'itac u pa'abal u muuko'obi'.

³⁵Tumen Yuumtzil tu dzaj ti' le j Israelitaob u páajtalil u ti'al u dzánche'etico'ob le j benjaminitaob, le kiino' le j israelitaob tu quíimsajo'ob veinticinco mil yéetel cien u aj ba'atelo'ob u múuch' cajtalil u yotochnáalo'ob Benjamín.

³⁶Le benjaminitaob tu yu'ubajo'obe' dzo'oc u pa'abal u muuko'ob. Le j israelitaob tu náachcunsajuba'ob ti' u ba'atel le j benjaminitaob tumen u yojelo'ob u ta'acbesmajuba'ob le aj ba'atelo'ob u ti'al u ba'atelto'ob Gabaa.

³⁷Le aj ba'atelo'oba' tu téec pulajuba'ob yóokol Gabaa ca tu quíimsajo'ob yéetel tuláacal u cajnáalilo'ob le noj caajo'.

³⁸Le u ta'acbesmajuba'ob u ti'al u pulicuba'ob yóokol le caajo' tu dza t'antajuba'ob yéetel u láak israelitaob, le quéen u yilo'ob u tuulbal jun p'éel nojoch buudze' leti' u chíiculal dzo'oc u ch'a'ico'ob le caajo'.

³⁹Le quéen u yilajo'ob le j israelitaob táan u tuul le buudzo' ti' le súutuc bey táan ca'ach u púudzulo'obe', ca suunaco'ob u pa'ato'ob le j Benjaminitaobo'. Le benjaminitaob páatchaj u quíimsico'ob bey treinta israelitaob le beetic x ma' sajaquil tu tuclajo'ob dzo'oc u dzáancha'atico'ob, je'el bix le yáax ba'atelo';

⁴⁰Ti' lelo' chu'unpaj u jóokol buudz te j caajo', le j benjaminitaob le ca j suunaj u paacato'obe' tu yilajo'ob táan ca'ach u tóoch'bal le káak yéetel u buudzil tuláacalo' le caajo' cu kuchul tac ich múuyalo'ob.

⁴¹Le j israelitaob túuno' j wa'alajo'ob u ba'atelto'ob, le j benjaminitaob le ca tu yilajo'ob dzo'oc u pa'abal u muuko'obe' lúub yóolo'ob.

⁴²Ca jóoko'ob áalcabil púudzico'ob ti' le j israelitaob tu tojil le x tocoy lu'umo', ba'ale' ma' tu páajtal u púudzulo'ob, tumen le cu jóokolo'ob te j caajo' cu káat bejta'alo'ob, cu quíimsa'alo'ob.

⁴³Le j benjaminitaob j p'áato'ob bakpachta'ano'ob tumen le j israelitaob, le j ch'a'apachta'abo'obo' dzáanche'eta'abo'ob líikbal Menúha tac tu lakin Gabaa.

⁴⁴Bey quíimic dieciocho mil aj ba'atelo'ob u múuch' cajtalil u yotochnáalo'ob Benjamín.

⁴⁵le u láako'obo' tu sutajuba'ob ca jóoko'ob táan u púudzulo'ob tu tojil le x tocoy lu'umo', tu suytuunil Rimón, Ba'ale' cinco mil ti'obe' quíimsa'abo'ob te j bejo'. Le j israelitaobo' tu ch'a'apachtajo'ob, ca tu xe'exe'et'o'ob, tu quíimsajo'ob dos mil j xiibo'ob.

⁴⁶Ti' le kiino' quíimo'ob veinticinco mil u ma'alobil aj ba'atelo'ob u múuch' cajtalil u yotochnáalo'ob Benjamín.

⁴⁷Ba'ale' seiscientos bejaminitaob suunajo'ob, ca j púudzo'ob tu tojil x tocoy lu'um, ca j p'áato'ob can p'éel winalo'ob tu suytuunil Rimón.

⁴⁸Le j israelitaob ba'atelnajo'ob yéetel u láaktzilo'ob le j benjaminitaob ca tu quíimsajo'ob yéetel yej xotob le j xiibilo'ob ti' jujun p'éel u cajtalilo'ob, tu quíimsajo'ob xan le ba'alche'ob yéetel tuláacal ba'al cu yilico'ob bej, bey xan tu tóocajo'ob le noj caajo'obo'.