Read Yucateco Jueces 21 Bible Online

Jueces 21 - Yucateco bible

Jueces 21

¹Le j israelitaob tu jalach t'antajo'ob Mizpa ma' bíin u cha'ob ca dzo'ococ u beel u x ch'upul paalal yéetel mix jun túul bejaminita.

²Cu dzo'ocole' tu much'ajuba'ob Betel ca j bino'ob tu táan Ku tac ocnal kiin, táan u yáacam okolo'ob:

³¡Yuumtzil, u Junab Ku Israel! ¿Ba'axten úuchto'on le ba'al beya'? ¿Bix úuchic u p'áatal mina'an jun p'éel u ch'i'ibalo'ob Israel?

⁴Tu láak kiine' le j israelitaob líiko'ob p'elac u sáastal, ca tu beetajo'ob u multuunil kultaj ca tu táanbesajo'ob ti' Yuumtzil u quíimsbil ba'alche'il ca'a bisajbáil.

⁵Yéetel táan u káat chi'iticuba'ob: ¿Máax ichil tuláacal ma' j bin j much'tal Mizpai? tumen tu jalach t'antajo'ob ca'ach yaan u quíimsa'al le máaxo'ob ma' j much'lajo'ob Mizpao'.

⁶Le j israelitaob yaan okom óolal ti'ob tu yo'olal le ba'alo'ob tu beetajo'ob u sucu'uno'ob le j benjaminilo'ob, táan ya'alico'ob: Ti' le kiina' dzo'oc u xo'oto'l ti' Israel jun p'éel ti' u múuch' cajtalilo'ob u yotochnáalo'ob.

⁷¿Ba'ax bíin c beet u ti'al caxtic co'olelo'ob u ti'al le benjaminitaob cuxa'ano'obo'? To'one' dzo'oc jalach táantic tu táan Yuumtzil ma' bíin c cha'a x ch'úupal paalal ca dzo'ococ u beel tu yéetelo'obi'.

⁸¿Yaan wa jun túul j israelil ma' j bin tu táan Yuumtzil Mizpai? Ca túun j ka'aj ti'obe' le Jabeso'ob ti' u lu'umil Galaad mix máac j bini',

⁹Tumen le ca j úuch xoc u kaaba'obe' mix máac ichilo'ob núuque'.

¹⁰Tuláacal le caajo' tu túuxtajo'ob doce mil u ma'alobilo'ob u aj ba'atelo'ob yéetel u ya'almaj t'aanil ca u quíimso'ob ch'acbil yéetel máascab tuláacal le j jabesilo'obo' pa'ate' yéetel mejen paalal yéetel x co'olelo'ob ma' x sujuyo'obi'.

¹²Ichil le caja'ano'ob Jabeso' yaan ca'ach cuatrocientos x ch'úupal ma' j chilaco'ob yéetel j xiibi', ca j taasa'abo'ob Silo, tu lu'umil Canaán tu'ux cu je'elelo'ob.

¹³Tuláacal túun le caajo' tu ya'alaj ca taasa'ac le j benjaminitaob yano'ob ca'ach tu suytuunil Rimón, ca tu káat óolta'ab ti'ob ca u p'ato'ob le ba'atelo' u ti'al ma' u suut yantal ba'atel ichilo'ob.

¹⁴Le j Benjaminilo'ob suunajo'ob ca j dza'ab tumen le j israelitaob le x co'olelo'ob taasa'abo'ob ca'ach tac Jabes. Ba'ale' ma' yanji co'olelo'ob u ti'al tuláacali'.

¹⁵Le j israelitaob yanji okom óolal ti'ob tu yo'olal u múuch' cajtalil u yotochnáalo'ob Benjamín, tumen Yuumtzile' dzo'oc ca'ach u p'atic x ma' jun múuch' u ch'i'ibalo'ob Israel.

¹⁶U nuuquilo'ob le caajo' táan u káat chi'iticuba'ob: ¿Ba'ax je'el c beetic u ti'al dzáic co'olelo'ob ti' u láak j xiibo'ob, wa xu'ulsa'ab u x co'olelilo'ob le j benjaminitaob?

¹⁷U múuch' cajtalil u yotochnáalo'ob Benjamine' u najmal u p'áatalo'ob tu cúuchilo'ob, tu yo'olal le cuxa'ano'obo', u ti'al ma' u bineltic mix jun múuch' ti' u ch'i'ibalo'ob Israel.

¹⁸Ba'ale' to'one' ma' tu páajtal c dzáic x ch'upul paalal u ti'al ca dzo'ococ u beel yéetelo'ob, tumen tuláacal le j israelitaobo' tu jalach t'antajo'ob ma' bíin u dza'ob u x ch'upul paalal ti' le j benjaminitaob, wa c dzáique' c loolob t'anta'al.

¹⁹Chéen ba'ale', ti' ja'abal ja'abe' yaan jun p'éel nojoch kiinbensajil u ti'al Yuumtzil Silo le yaan tu xaman Betel, j lakin ti' le bej cu bin Betel tac Siquem, tu noojol Lebona.

²⁰U nuuquilo'ob Israel túune' tu túuxtajo'ob le péectzil ti' le j benjaminilo'ob: Xeene'ex, ta'acbesajba'ex ichil u pakalilo'ob uva naadz ti' Silo,

²¹yéetel ma' u náayal a wóole'ex, le quéen jóokoco'ob jujun múuch'il táan yóokoto'ob le u x lo'obayanilo'ob Siloe', te'exe' jóokene'ex tu'ux a ta'acbesmaba'exe' ca u yocolt jujun túul ti' te'ex jun túul x ch'úupal, cu dzo'ocole' xeene'ex ta lu'ume'ex.

²²Wa u taata wa u sucu'un le x ch'úupalal cu taalo'ob u beeto'ob wa ba'ax tzáaj t'aanile', c a'alic: Bey jun p'éel utz ca beetique'ex ti' to'one' ca a sa'atso'one'ex, tumen ma' páatchaj caxtix co'olel u ti'al tuláacalo'ob ti' le ba'atel beetaj ti' le Jabesilo'obo', u láak ba'ale' ma' te'ex kube'ex ti'obi', tu jaajile' te'exe' ma' sipa'ane'ex ti' le jalach t'aano'.

²³Le j benjaminitaob tu éejemtajo'ob le ba'ax a'ala'ab ti'ob, beyo' ti' jujun túule' tu yoclaj jun túul x ch'úupal ichil le táan u yóokoto'obo' ca tu bisaj. Cu dzo'ocole' suunajo'ob tu lu'umo'ob, ca tu ca'a beetajo'ob u noj caajo'ob ca j cajlajo'obi'.

²⁴Le u láak j israelitaobo' j bino'ob, tu jujun túule' j suunaj jach tu lu'umil u ch'i'ibalo'ob yéetel ti' u cajtalilo'ob.

²⁵Ti' le kiino'obo' mina'an ca'ach ajaw Israel, let o'olal jujun túule' cu beetic je'el ba'axac u káate'.