Read Yucateco Jueces 3 Bible Online

Jueces 3 - Yucateco bible

Jueces 3

¹Yuumtzile' tu p'ataj le múuch' cajtalo'oba' u ti'al u túuntaj óolal le israelitaob ma' síijico'ob ca'ach le ca'aj ba'atelnajo'ob Israel u ti'al u jáanpaytic Canaán.

²Yuumtzile' tu p'atajo'ob u ti'al u canico'ob j ba'atel le máaxo'ob mix jun téen anaco'ob tu cúuchil ba'atel.

³Cinco náacom filisteos p'áato'ob, tuláacal ca'analilo'ob, sidonitaob yéetel heveob le caja'ano'ob tu witzil Baal-hermón tac tu beelil Hamat.

⁴Yéetelo'obe' Yuumtzile' tu yóoltaj u túunt yóolo'ob le j israelitaob u ti'al u yilic wa je'el u dzo'ocbesico'ob u nu'ucbe'en t'aano'ob le j dzaab ti'ob u yúuchben ch'i'ibalo'ob tu kab ti' Moisés.

⁵Beyo' le israelitaob chúunpaj u cajtalo'ob ichil le j cananeobo', hetitaob, amorreob, ferezeob, heveob yéetel jebuseob,

⁶U j xibil paalal yéetel u x ch'upul paalal le israelitaobo' dzo'oc u beelo'ob yéetel u j xibil paalal yéetel u x ch'upul paalal le u cajnáalilo'ob le lu'umo', ca tu kultajo'ob u kuob.

⁷Le ba'alo'ob tu beetaj le j israelitaob kaas tu yich Yuumtzil tumen tu tu'ubsajo'ob, ca tu kultajo'ob jejeláas yoochelo'ob le beetbil ku cu kaaba'intic Baal yéetel Astarté.

⁸Le t o'olal Yuumtzile' p'u'uj yéetelo'ob ca tu kubajo'ob tu kab Cusan-risataim, u ajawil Mesopotamia. Le israelitaob ocho ja'abo'ob táan ca'ach meyajtico'ob Cusan-risataim,

⁹tac ca tu káat óoltajo'ob ti' Yuumtzil ca áanta'aco'ob, Yuumtzil túune' tu beetaj u líikil máax méektáatico'ob. Otoniel u paal Cenaz, u yíidzin Caleb le ca'ach líik u ti'al méektéantico'obo':

¹⁰U pixan Yuumtzil j taal yóokol Otoniel, leti'e' tu yáantaj le j israelitaobo'; jóok u ba'atelt Cusan-risataim Yuumtzile' tu beetaj u bin utzil ti'.

¹¹Cu dzo'ocole' cuarenta ja'abo'ob yanchaj jéedzel te j lu'umo'. Cu dzo'ocol u quíimil Otoniele'

¹²Le j israelitaobo' tu ca'a beetajo'ob ba'ax kaas tu yich Yuumtzil, le t o'olal Yuumtzil tu dzáa ti' Eglón u ajawil Moabe' tip'a'an páajtalil, ti' Israele' ma'.

¹³Eglone' tu beetaj jun p'éel nup t'aan yéetel le j amonitaob bey xan yéetel le j amalecitaob, ca tu pulajuba'ob yóokol Israel, ca tu ch'a'ajo'ob le u caajil xa'ano'ob.

¹⁴Diez yéetel ocho ja'abo'ob j máan le j israelitaob yanchaj u meyajtico'ob Eglón,

¹⁵yanchaj u káat óoltico'ob ti' Yuumtzil, leti'e' tu beetaj u líikil máax méektáantico'ob. Le bíin u méektáanto'obo' jun túul j dzíic kab cu kaaba'intic Aod, u paal Gera, ti' u ch'i'ibal Benjamín. Jun p'éel kiine' le j israelitaobo' tu túuxtajo'ob yéetel Aod ba'alo'ob ti' Eglón.

¹⁶Aode' tu beetaj jun p'éel máascab ca'a mat u yej bey táancoch metro chowaquil ca tu kaxnaktaj yaanal u nook tu x no'oj;

¹⁷cu dzo'ocole' j bin u bis le bo'ol ti' Eglono', Eglón ca'ache' jach poloc.

¹⁸Cu dzo'ocol u kubic ti' Eglón le bo'olo', Aode' jóok te tu'ux yano'ob le j taalo'ob ca'ach yéetelo',

¹⁹táan ca'ach u kuchul tu'ux yaan le beetbil kuobo' naadz ti' Gilgal, Aode' suunaj tu'ux yaan Eglón ca tu ya'alaj: Yaan ti' teen jun p'éel péectzil u ti'al a tzicbe'enil, chéen ba'ale' kabéet in t'aan chéen ta juunal. Tu túuxtaj túun le j ajawo' ti' u meyajo'obe' ma' u t'aano'ob yéetel ma' u p'áatalo'ob te'elo'.

²⁰P'elac p'áatic tu juunal Aod yéetel Eglón, ti' ca'ach culucbal tu najil yáax kiin, tu nadzajubáa Aod ca tu ya'alaj: Le t'aan quin taasic ti' techa' u t'aan Ku. Ca tu yu'ubaj Eglone' j líik tu jalach káanche',

²¹Aod ca'ach j dzíic kabe', tu bisaj u x dzíic kab tu x no'oj ca tu jóoksaj u máascabe' ca tu lomaj tu nak.

²²Tu lomaj jach yéetel jaaj óolal, le máascabo' láaj ooc tac tu'ux cu machic, ca'aj p'áat piixil yéetel u tzaatzel Eglón, tumen Aode' ma' tu luquesaj ti'.

²³Cu dzo'ocole' Aode' tu kalaj le u jool le najo' ca tu ch'otaj ma'alobo', cu dzo'ocole' jóok tu calon kiin.

²⁴Le ca'aj dzo'oc u bine' j taalo'ob le máaxo'ob meyajtic le ajawo', ca tu yilajo'ob láaj k'ala'an le jool najo' tu tucultajo'obe' tu kalajubáa tu najil yáax kiine', tumen yaan wal ba'ax mucul cu beetique'.

²⁵Cu dzo'ocol u sen pa'atico'ob ma' yu jóokol le ajawo', jo'op' u káat chi'itico'ob ba'axten ma' tu jóokol. Tu ch'a'ajo'ob túun u nu'ucul u je'ico'ob le ca tu je'ajo'obe' tu yilajo'ob u dzuulile' tudzucbal j lu'um.

²⁶Ca'aliquil táan u máan kiine' Aode' j púudzi', cu dzo'ocol u máan tu'ux yaan le beetbil kuob Gilgal tu ta'acbesicubáa Seirat.

²⁷Ca j kuch tu lu'umil israele' tu jóopsaj le paax tu witzil Efraín u ti'al u t'anic le j israelitaob, tuláacalo'obe' j éemo'ob te j witzo' ti' yaan Aod táanile'.

²⁸Aode' tu ya'alaj ca xi'ico'ob tu paach tumen Yuumtzile' bíin u pa'a' u muuk le j moabitaob u aj p'eeco'obo', ca'aliquil leti'obe' j bino'ob u yáalcabpachto'ob, ca tu ch'a'ajo'ob u koosilo'ob Jordán, yéetele' ma' tu cha'ajo'ob u máan mix máac.

²⁹Ti' le kiino' tu quíimso'ob diez mil moabitaob, tuláacalo'ob mu'uka'ano'ob, xiixib máaco'ob u ti'al ba'atel. Mix jun túul j púudz cuxa'ani'.

³⁰Bey úuchic u pa'abal u muuk le j moabitaob tumen le j israelitaob, cu dzo'ocole' yanchaj jéedzel óol ti' le lu'umo' ochenta ja'abo'ob.

³¹U láak méektáan ca'ache' Samgar u paal Anat, le máax tu quíimsaj ca'ach seiscientos filisteob yéetel u xúul. Samgare' tu yáantaj xan Israel.