Read Yucateco Jueces 4 Bible Online

Jueces 4 - Yucateco bible

Jueces 4

¹Cu dzo'ocol u quíimil Aode', le j israelitaobo' tu ca'a beetajo'ob ba'al kaas tu táan Yuumtzil,

²let o'olale' Yuumtzile' tu kubajo'ob yáanal u páajtalil Jabín u ajawil Cananeob cu méektáantico'ob u noj caajil Hazor. U náacom máax nu'uctic le ba'atelo' cu kaaba'intic Sísara, cajacbal ca'ach Haroset-goim.

³Jabine' yaan ca'ach ti' novecientos bolano'ob, túulis veinte ja'abo'ob tu sen loobiltaj le j israelitaobo', j kuch u kiinil túun ca j káat óolnajo'ob ti' Yuumtzil ca áantaco'ob.

⁴Ti' Le kiino'obo' méektáanta'an ca'ach Israel tumen jun túul co'olel, x bóobat, cu kaaba'intic x Débora u yatan Lapidot.

⁵X Déborae' suuc ca'ach u cutal yaanal jun cúul xa'an (kaj óola'an bey u xa'anil Déborae'), ti' yaan ca'ach tu pu'uquilo'ob Efraín chúumuc bej ti' Ramá yéetel Betel, le israelitaobo' cu bino'ob ca'ach tu yicnal u ti'al ca áantaco'ob ti' u paaclan ba'atelo'ob.

⁶Jun p'éel kiine', x Déborae' tu túuxtaj t'anbil jun túul j xiib cu kaaba'intic Barac u paal Abinoam, cajacbal ca'ach Cedes, jun p'éel u caajil u ch'i'ibal Neftalí ca tu ya'alaj ti': Yuumtzil u Kuil Israele', cu ya'alic ti' teech beya': Xeen tu witzil Tabor, ca much'quint ti' u ch'i'ibalo'ob Neftalí, ca tu ya'alaj ti': Yuumtzil u Kuil Israele', cu ya'alic ti' teech beya': Xeen tu witzil Tabor ca a much'quint te'elo' diez mil máaco'ob ti' ichil u múuch' cajtalilo'ob u yotochnáalo'ob Neftalí yéetel Zabulón.

⁷tene' bíin in beet u taal Sísara u náacom u aj ba'atelo'ob Jabín, tu jáal u ja'il Cisón u ti'al ca u pulicuba'ob ta wóokol ti' u bolano'ob yéetel u aj ba'atelo'ob. Tene' bíin in kub ta kab.

⁸Baraque' tu núucaj ti': chéen je'el in bine' wa ca taal tin wéetel, ba'ale' wa ma' ta taale' ma' tin bin.

⁹Ca tu núucaj x Débora: Je'el in bin ta wéetele' chéen ba'ale' u nojbe'enil le ba'atel bíin a beeto' ma' bíin a ti'alinti', tumen Yuumtzil bíin u kub Sísara' tu kab jun túul co'olel. X Débora túune' j bin yéetel Barac tac Cedes.

¹⁰Te'elo' tu much'quintaj Barac diez mil j xiibo'ob ichil u ch'i'ibalo'ob Zabulón yéetel ichil u ch'i'ibalo'ob Neftalí, ca tu nu'uctaj le ba'atelo'; x Déborae' j bin yéetel.

¹¹Naadz ti' Cedes, tu chuun u béequil Zaanaime', ti' yaan ca'ach u x péet cajtalil Heber le j quenil le máax tu jun páaycunticubáa ti' le u láak quenilo'obo', leti' xane' cu taal ti' u ch'i'ibal Hobab[1] u taata u yatan Moisés.

¹²Le ca tu yojéeltaj Sísara dzo'oc u na'acal Barac u paal Abinoam tu witzil Tabore',

¹³tu much'quintaj novecientos u bolano'ob beeta'ano'ob yéetel fierro pa'ate' yéetel tuláacal u aj ba'atelo'ob ca j xíimbalnaj yéetelo'ob líikul Haroset-goim tac tu t'o'ol ja'il Cisón.

¹⁴Débora túune' tu ya'alaj ti' Barac: ¡Xeen, tumen bejela'e' Yuumtzil bíin u kub Sísara' ta kab! ¡Yuumtzil táan u bin táanil ti' a aj ba'atelo'ob! Baraque' j éem ti' u witzil Tabor yéetel diez mil u aj ba'atelo'ob,

¹⁵Yuumtzile' tu beetaj u sen sajactal u aj ba'atelo'ob Sísara chéen p'el chúunic le aj ba'atelo'ob le ca tu yilajo'ob u máascab Barac; tac Sísara j éem tu bolan, ca j púudz xíimbal ooquil.

¹⁶Ca'aliquil Baraque' tu ch'a'apachtaj le aj ba'atelo'ob yéetel le u bolano'ob tac Haroset-goim. Ti' le kiinaco' ma' j p'áat cuxa'an mix jun túul ti' u aj ba'atelo'ob Sísarai; láaj quíimo'ob.

¹⁷Tu yo'olal utz u biscubáa Jabín u ajawil Hazore', yéetel u yotochnáalo'ob Heber j quenil, Sísara iquil u púudzule' j kuch xíimbal ooquil tac tu chuybil naj Jael, u yatan Heber,

¹⁸Jaele' jóok u ti'al u kamic ca tu ya'alaj ti': Te'ela', nojoch dzuul, co'oten waye'; ma' a ch'a'ic sajaquil. Sísarae' ca j oqui, ca j pi'ix yéetel jun p'éel nook.

¹⁹Sísara túune' tu káataj jun p'íit ja' ti', tumen sen ukaj. Jaele' tu luksaj u maac u nu'ucul tu'ux cu ta'acbesic leche ca tu dzaj u yuke; cu dzo'ocole' tu macaj tu ca'a téen.

²⁰Ca j a'ala'ab ti' tumen Sísara: p'áaten tu jool le najo' wa máax cu taal u káat wa yaan máax ichile', a'al ti'e' míix máac yaan waye'.

²¹Ba'ale' Sísarae' tu yo'olal sen ca'ana'ane' t'úub u j wenel, Jael túune' tu ch'a'aj jun p'éel x bajab yéetel jun p'éel che' jóoksa'an u ni'e' le cu meyaj u ti'al chuybil naje', ca tu cháambel nadzajubáa tac tu'ux yaan Sísarae' ca tu ch'icaj le che' tu xu'uk yich ca tu bajaj lu'um, bey quíimic Sísara.

²²Le ca j kuch Barac táan u caxtic Sísarae', Jaele' jóok u kame' ca tu ya'alaj ti': Co'oten, bíin in wées ti' teech le wíinic ca máan a caxto'. Leti'e' j ooc ichil le najo' ca tu yilaj tudzucbal Sísara te j lu'umo', quimen yéetel le che' ch'ica'an tu xu'uk yicho'.

²³Bey úuchic u t'onquinta'al Jabín u ajaw le j cananitaob tumen Yuumtzil le kiino', tu táan le israelitaobo'.

²⁴Chúunic ti' le kiino' le j israelitaobo' tu beetajo'ob u mukyaj Jabín beyo' tac ca tu xu'ulsajo'ob.