Read Yucateco Jueces 5 Bible Online

Jueces 5 - Yucateco bible

Jueces 5

¹Ti' le kiino', x Débora yéetel j Barac, u paal Abinoam, kaaynajo'ob beya':

²Qui'iqui' t'anta'ac Yuumtzil tumen tuláacal, tumen yaan Israel xiixib máaco'ob u ti'al j ba'atel, tumen tac bejela'e' yaan ichil u caajal j xiixib máaco'ob cu éejemtico'ob j ba'atel.

³¡Ajawe'ex, te'exe' u'uyene'exi'! ¡Te'ex máaxe'ex ca méektáane'ex u'uyene'exi'! ¡Bin in caaj kaay ti' Yuumtzil! ¡bin in caaj kaay ti' u Junab Ku Israel!

⁴Yuumtzil, le ca Jóokech Seir; le ca j binech tu lu'umilo'ob Edome', quíilbalnaj le lu'umo', le ca'ano' j péecnaji, le múuyalo'obo' tu beetajo'ob u káaxal ja'.

⁵Ta táane', Yuumtzil, ta táane', teech u Kuil Israel, Quíilbalnaj witzilo'ob, quíilbalnaj Sinaí.

⁶Tu kiinilo'ob Samgar, u paal Anat, tu kiinilo'ob Jael, Le cu bino'ob caajal caajo' tu p'atajo'ob le bejo'obo' ca j máano'ob ti' koklemac bejo'ob;

⁷U x péet caajilo'ob Israele' p'áato'ob tuláacal xúump'atta'ano'ob Let o'olal tene' j líiken, ¡Teen, x Débora, jun túul x maamail Israelil!

⁸Yaan máax tu yéeyaj túumben kuob ca'aliquil táan le ba'atel tu jool caaj, ba'ale' ma' tu yila'al chimal mix julte' ichil cuarenta mil israelitaob.

⁹¡Tene' quin dzáic in pucsi'ikal tu yo'olal u nuuquilo'ob Israel, tu yo'olal u cajnáalilo'ob in caajal máaxo'ob tu éejemtajo'ob ba'atel le ca j t'a'ano'obe'! ¡Tuláacale' u qui'iqui' t'aan Yuumtzil!

¹⁰Te'ex, máaxe'ex ca nat'ique'ex sac poos x burraob a'ale'ex, te'ex máaxe'ex ca cutale'ex tu yóokol qui'ichquelem táaspacho'ob bey xan te'ex le ca bine'ex caajal caajo'ob; a'ale'ex

¹¹¡te tu'ux cu dza'abal u yuk ja' le ba'alche'obo', ca'aliquil táan u juum le paaxo', ka'ayte'ex u dzáanche'etajo'ob Yuumtzil, u dzáanche'etajo'ob u x péet caajilo'ob Israel!

¹²¡Aajen, x Débora, aajen, líiken a kay jun p'éel kaay! ¡Teech Barac, u paal Abinoam, líiken a bis le wíinico'ob ta chucajo'obo'!

¹³Le israelitaob j éemo'ob túun u ba'atelto'ob le mu'uka'ano'obo'; u aj ba'atelo'ob Yuumtzile' j éemo'ob tin wo'olal u ti'al j ba'atel yéetel aj ba'atel máaco'ob

¹⁴dze'edzec j Efrainilo'ob éemo'ob, kóom táax lu'um u taalbalo'ob, tu paacho'obe' j bino'ob u aj ba'atelo'ob Benjamín. Ichil le j Maquirilo'obo', éemo'ob u nuuquilo'ob, le j Zabuloinilo'obo', j taalo'ob u méektáanbalo'ob.

¹⁵Bey xan láakinta'ab Débora tumen u nojchilo'ob Isacar, Isacare' tu yáantaj ca'ach Barac, tumen bin tu paach tac le kóom lu'umo'. wa ichil u tzúucul u aj ba'atelo'ob Rubén yaan nucuch máaco'ob chuca'an yóol u pucsi'ikalo'obe',

¹⁶¿Ba'axten j p'áato'ob ichil u cootil u j tamano'ob, táan u yu'ubico'ob u t'a'analo'ob u j tamano'ob tumen u aj canano'ob? ¡ichil u tzúucul Rubene' yaan nucuch máaco'ob yéetel sajac óol pucsi'ikalo'ob!

¹⁷Galaade' j p'áat je'elel tu láak u tzéel u yáalcab ja'il Jordán; Dane' j p'áat tu tzéel le cheemo'ob, Aser xane' j p'áat tu jáal ka'anab ma' j péecnaj te tu'ux cu kuchul le cheemo'obo';

¹⁸Ba'ale' tu ca'analil le káaxo'obo', Zabulón yéetel Neftalí tu dza jo'ob u cuxtalo'ob tu chi' quíimil.

¹⁹Le ajawo'ob túuno' j taalo'ob Taanac, tu jáal u ja'ilo'ob Meguido; u ajawo'ob ca'analilo'ob j taalo'ob yéetel u tuuculil ba'atel ba'ale' ma' tu najmato'ob mixba'ali' mix taakin yanchaj ti'obi',

²⁰Likbal j ca'an, likbal tu beel le eeko'obo', ba'atelnajo'ob u ti'al u beetic loob ti' Sísara;

²¹T'óol ja', le úuchben t'o'ol ja'o', le u t'o'ol ja'il Cisón tu láaj míistajo'ob, ¡Bíin a bidz u yúul le máaxo'ob yaan u páajtalilo'obo'!

²²¡Táan u juum u maay le tzíimino'ob! ¡Áalcab xíimbal u bin le mu'uka'an tzíimino'obo'!

²³U ángel Yuumtzil cu ka'aytic: ¡Ca lúubuc jun p'éel nojoch loolob t'aan yóokol Meroz yéetel yóokol u cajnáalilo'ob! tumen ma' jóoko'ob bey xiixib máaco'ob, u ti'al u yáantico'ob Yuumtzili'.

²⁴¡Qui'iqui' t'anta'ac Jael ichil le co'olelo'obo', u yatan Heber le j quenitao'! ¡qui'iqui' t'anta'ac ichil u co'olelilo'ob le cajtalilo'!

²⁵J Sísarae' tu káataj ja'; leche dza'ab ti' tumen Jael ¡u yoodzel tu dzaj ti', ti' jun p'éel qui'ichquelem lac!

²⁶Ca'aliquil táan u machic le x ch'iquib che' yéetel u x dzíique' le x bajabo' tu machaj yéetel u x no'oj, ca tu bajaj tu pool sísara ca tu púut lomaj u xu'uk yich.

²⁷Sísarae' tu ch'o'och'o'otubáa tu yooc x Jael; ichil u yaayaj ch'o'och'o'otcubáe' lúub lu'um te tu'ux j lúubo' te j p'áat quíimeni'.

²⁸U maama j Sisarae' táan u yaayaj tuucul. Ch'eenebnaj ti' le calom kiine' ca tu ya'alaj: ¿Ba'axten cu sen xáantal u kuchul u bolan? ¿Ba'axten cu xáantal u bolanil u ba'atel?

²⁹Wa jay túul co'olelo'ob cu tuclicuba'ob jach x na'ato'obe' cu núuquico'ob, bey xan leti' cu ya'alic:

³⁰Táan wal u t'oxico'ob le ba'ax tu náajalto'ob te j ba'atelo' jun túul x palitzil wa ca'a túul, u ti'al jujun túul aj ba'atel; u ti'al Sísarae' jejeláas nooko'ob jun p'éel wa ca'a p'éel, chuya'an yéetel jejeláas boonolil, u ti'al u caal le máax jach xiibo'.

³¹¡Yuumtzil, bey ca láaj xu'ulsa'ac a aj p'eeco'ob, léenbalnac le máaxo'ob cu yaabiltiquecho'obo' je'el bix le kiin cu léenbal yéetel tuláacal u muuko'! Cu dzo'ocol lelo' yanji jéedzel cuarenta ja'abo'ob, te j cúuchilo'.