Read Yucateco Jueces 6 Bible Online

Jueces 6 - Yucateco bible

Jueces 6

¹Le ba'alo'ob tu beetajo'ob ca'ach le j israelitaobo' kaastac tu yiljilac Yuumtzil, let o'olal Yuumtzile' tu kubajo'ob siete ja'abo'ob tu kab le j madianitaob.

²Tu yo'olal xi'ic u bin u ye'edzelo'ob le j israelitaob tumen le j madianitaob, tu yo'olal u sajaquilo'obe', tu beetajo'ob cúuchilo'ob u ti'al u ta'acbesicuba'ob te j pu'uco'obo', ti' áactuno'ob yéetel ti' le cúuchilo'ob tu'ux talam u kuchul máaqui'.

³Le quéen yanac ca'ach u pakalo'obe' le j israelitaobo', le j madianitaob, le j amalecitaob yéetel u cajnáalilo'ob j lakine' cu pulicuba'ob yóokolo'ob.

⁴Cu je'elo'ob ca'ach tu lu'umil Israel, cu kascuntico'ob u yich u pakalo'ob tac tu lu'umil Gaza, ma' tu p'atico'ob mixba'al ti' le j israelitaob u ti'al u jaanto'ob, mix ti' u j tamano'ob, mix ti' u wacax, mix ti' u burro'ob.

⁵Tu chupajo'ob le lu'umo' Yéetel u nookil najo'ob bey xan yéetel u wacaxo'ob u kascuntico'ob tuláacal ba'al. Cu taalo'ob yéetel u camello'ob beyo'ob u muulut sáako'obe'.

⁶Tu yo'olal le madianitaobo' le j israelitaobo' cu máansico'ob ya'abcach óotzilil, p'is tu káatilaco'ob áantaj ti' Yuumtzile'.

⁷Le ca tu káatajo'ob áantaj le j israelitaob ti' Yuumtzil u ti'al ca to'ococo'ob ti' le j madianitaobo',

⁸Yuumtzile' tu túuxtaj jun túul aj bóobat a'alic ti'ob: Bey u ya'alic Yuumtzil u Junab Ku Israel: Teen tin jóokesajech ti' u lu'umil Egipto, tu'ux caja'ane'ex ca'ach beye'ex palitzile'.

⁹Ma' chéen tin tocaje'ex ti' le j egipciobo', bey xan ti' tuláacal le máaxo'ob yedzique'ex ca'acho'. Leti'obe' jujun p'íit tin tojolch'intajo'ob ta táane'ex, ca tin dzaj ti' te'ex le u lu'umo'obo'.

¹⁰Ca tin wa'alaj ti' te'exe' teen Yuumtzil a Junab Kuex, yéetel ma' unajmal a ch'a'ique'ex sajaquil ti' u kuob le j amorreobo', le lu'um tu'ux cajacbale'ex bejela'a'; ba'ale' te'exe' ma' ta wu'uyaje'ex in t'aani'.

¹¹J taal túun u ángel Yuumtzile' ca j culaj yáanal jun cúul béec le yaan ca'ach Ofrae', u ti'al ca'ach Joás, u cajtalil u yotochnáalo'ob Abiezer, Gedeón u paal Joase', táan ca'ach u x mucul xíixtic le trigo tu cúuchil tu'ux cu jóoksa'al u kaab uva, u ti'al ma' u yila'al tumen le j madianitaobo'.

¹²U ángel Yuumtzile' chíicpaje' ca tu ya'alaj ti': ¡Yuumtzile' ti' yaan ta wéetele' mu'uka'an yéetel j xiibil máac!

¹³Ca tu núucaj Gedeón: in yuumen Sa'ates ti' teen, wa jaaj ti' yaan Yuumtzil t etele', ¿ba'axten cu yúuchul to'on tuláacal le ba'alo'oba'? ¿Tu'ux yaan tuláacal le chíiculal beeta'ab, cu tzicbalta'al to'on tumen le c úuchben c ch'i'ibalo'ob, iquil u ya'alico'ob tu jóokesajo'on Yuumtzil tu lu'umil Egipto? Yuumtzile' dzo'oc u xúump'atico'on, yéetel dzo'oc u kubico'on ti' u páajtalil le j madianitaobo'.

¹⁴Pacta'ab tumen Yuumtzil ca j a'ala'ab ti': Dzáa j meyaj le muuk yaan ti' teecho' u ti'al ca xi'iquech a toc Israel ti' u páajtalil le j madianitaobo'. Teen máax túuxtiquech.

¹⁵Ba'ale' Gedeone' tu ca'a núucaj: U láak jun téen Yuumtzil, Sa'ates ti' teen, ¿Bix bíin in toc Israel? u cajtalil in wotochnáalo'obe' leti' asab otzilil ichil tuláacal u ch'i'ibalo'ob Manasés, yéetele', teen u chichanil ichil in wéet otochnáalo'ob.

¹⁶Yuumtzile' tu núucaj ti': je'el u páajtal a beetique' tumen tene' ti' yaanen ta wéetele'. Yaan a pa'ic u muuko'ob le j madianitaob je'el bix u pa'abal u muuk chéen jun túul máaque.

¹⁷Gedeón túune' tu ya'alaj: Wa ti' yanech tin wéetele', dzáa ti' teen jun p'éel chíiculal, jach tu jaajil teech le ca t'aan tin wéetel.

¹⁸Quin káat óoltic ti' teech ma' a lukul waye' beet utz a pa'atic in suut yéetel jun p'éel ti'ibil óolal in káat in kub ti' teech. Ca j a'ala'ab ti' tumen Yuumtzil: Way quin p'áatal in pa'at a suute'.

¹⁹Gedeone' j bine' ca tu máakantaj jun túul chan j yuuc, yéetel veinte wutz sacan ca tu beetaj wa jay p'éel péenchuc yéetel túumben sacan; cu dzo'ocole' tu dzaj le bak ti' jun p'éel xaaque' yéetel u kaabe' ti' jun p'éel cuum, ca tu bisaj tuláacal tac tu'ux yaan ca'ach le béeco'.

²⁰U ángel Yuumtzile' tu ya'alaj ti' u ti'al ca u dzáa yóokol jun p'éel nojoch tuunich le bako' yéetel le waaj beeta'an yéetel túumben juuch', yéetel u wequic u kaabo'. Cu dzo'ocol u beetic Gedeón tuláacal le ba'ax a'ala'ab ti'e',

²¹le ángelo' tu takaj u ni' le xóolte' yaan ca'ach tu kab ti' le bako' yéetel ti' le waajo', ti' le nojoch tuunicho' jóok káaki', ca tu tóocaj le bako' bey xan le waajo'; cu dzo'ocole' u ángel Yuumtzile' sa'at tu yich Gedeón.

²²Le ca tu yilaj Gedeón u ángel Yuumtzile', tu ya'alaj: ¡Yuumtzil, Yuumtzil! ¡Dzo'oc c paaclan c ich yéetel u ángel Yuumtzil!

²³Ba'ale' Yuumtzile' tu núucaj ti': ma' a ch'a'ic sajaquil, ma' ta quíimil. Kam in jéedzel.

²⁴Gedeón túune' tu beetaj jun p'éel u multuunil kultaj ti' u tzicbe'enil Yuumtzil, ca tu dzaj u kaaba'inte': Yuumtzile', leti'e' jéedzel. Le multuunil kultajo' tac bejela'a' ti' yaan Ofrae' u noj cajtalil u yotochnáalo'ob Abiezer.

²⁵Láili' le áakabo' Yuumtzile' tu ya'alaj ti' Gedeón: Ch'a'a jun túul xiibil wacax ti' a taata, u ca'a túul xiibil wacaxo' le yaan siete ja'ab ti', ca a jut u multuunil u kulta'al Baal, le tu beetaj a taata, ch'ac xan le quili'ich che' yaan tu tzéel u multuunil u kulta'al Baal,

²⁶tu ca'analil le tuulumo' beet jun p'éel u multuunil kultaj u ti'al Yuumtzil a Ku. Cu dzo'ocole' ch'a'a le u ca túul j xiibil wacaxo', ca a kub ti' teen bey láaj tóocbil ba'alche', ch'a'a' u si'il le quili'ich che' ta pulajo'.

²⁷Gedeón túune' tu ch'a'aj diez u palitzilil ca tu beetaj tuláacal le ba'ax túuxba'ab tumen Yuumtzilo'; chéen ma' tu beetaj yéetel kiini', ba'ale' tu beetaj yéetel áakab, tumen tu ch'a'aj sajaquil ti' u yotochnáalo'ob u taata yéetel ti' u xiibilo'ob le caajo'.

²⁸Tu láak kiine', ca j líik u cajnáalilo'ob le caajo', ca tu yilajo'ob u multuunil kulta'al Baale' dzo'oc u pu'ulul pa'ate' yéetel u quili'ich che'il yaan ca'ach tu tzéelo', bey xan tu yilajo'ob yaan jun túul wacax j ku'ub ca'ach bey láaj tóocbil ba'alche' yóokol le túumben multuunil kultajo'.

²⁹Tu jujun tuulilo'obe' jo'op' u káat chi'itic tu baatzilo'ob jujun túulil: ¿máax beet le ba'ala'? cu dzo'ocol u xakal káat péectziltico'ob máax beete', tu yojéeltajo'ob Gedeón j beete, u paal Joás, j bino'obe' ca tu ya'alajo'ob ti' Joás:

³⁰Jóokes a paal, binel ca'aj quíimse. ¡Tumen dzo'oc u pulic u multuunil u kulta'al Baal, tu ch'acaj xan le quili'ich che' yaan tu tzéelo'!

³¹Ba'ale' Joase' tu núucaj ti' le máaxo'ob bapachmailo': ¿Te'exe' a káate'ex wa a toquique'ex Baal yéetel a ba'atele'ex tu yo'olal? ¡quíimic ma'ili' sáasac le máax ca u toc Baale'! Wa Junab Ku Baale' p'ate'ex u toquicubáa tu juunal, tumen le multuunil kultaj niquicbalo' u ti'al ca'achi'.

³²Ti'ili'e' kiino' jo'op' u ya'ala'al Jerobaal ti' Gedeón, táan u ya'alico'ob: ca u tocubáa Baal ti', tumen Gedeone' tu pulaj u multuunil u kulta'al Baal.

³³Tuláacal túun le j madianitaob yéetel le j amalecitaob yéetel u cananeob j lakine', tu nupajuba'obe' ca tu ch'actajo'ob u yáalcab ja'il Jordán, ca j je'elo'ob tu táax lu'umil Jezreel.

³⁴Ba'ale' u pixan Yuumtzile' j ooc ti' Gedeón, leti'e' tu jóopsaj jun p'éel u baac j taman u ti'al ca u much'quint u cajtalil u yotochnáalo'ob Abiezer,

³⁵tu túuchi'itaj xan j t'anbil u ch'i'ibalo'ob Manasés u ti'al u much'tal yéetelo'ob, bey xan tu túuxtaj t'anbil u múuch' cajtalilo'ob u yotochnáalo'ob Aser, Zabulón yéetel Neftalí, jóoko'ob xan much'tal yéetel.

³⁶Gedeone' tu ya'alaj ti' Yuumtzil: Wa jach tu jaajil bíin a ca'aj a dzáa ti' teen u páajtalil in toquic Israele', je'el bix teech dzo'oc a wa'alico',

³⁷bíin in ca'aj in dzaj u tzo'otz kéewel jun túul j taman ti' le cúuchil tu'ux cu p'u'uchul le trigoo. Wa le quéen sáaschajac ch'uul u tzo'otzel le j tamano' yéetel p'uulja'o', ba'ale' tiquin le lu'umo', quin wojéeltique' jach tu jaajil a káat ca in meyajt teech u ti'al in toc Israel, je'el bix dzo'oc a wa'alico'.

³⁸Tu jaajile' bey úuchico' le ca j líik Gedeón le ja'atzcab kiino', tu yedzaj le j tzo'otz kéewelo' ca tu jóokesaj ti'e' jun p'éel lac chuup yéetel p'uulja'.

³⁹Chéen ba'ale' Gedeone' tu ya'alaj: Ma' a kuuxiltal tin wéetel wa quin ca'a káat óolal. In káat in túunt chéen u láak jun téen. Bejela'e' bíin a beet ca p'áatac tiquin le tzo'otzo', le p'uulja'o' ca u ch'uul le lu'umo'.

⁴⁰Ti' le áakabo' Kue' tu beetaj beyo', tu láak ja'atzcab kiine', le tzo'otzo' tiquin, tuláacal le lu'umo' ch'uul yéetel le p'uulja'o'.