Read Yucateco Jueces 7 Bible Online

Jueces 7 - Yucateco bible

Jueces 7

¹Gedeón, le máax cu ya'ala'al Jerobaalil, yéetel tuláacal le máaxo'ob yano'ob yéetele', j líiko'ob ma'ili' sáaschajaque' ca j bino'ob je'elel tu tzéel u sayabil Harod. U cúuchil tu'ux jelecbalo'ob le j madianitaobo' cu p'áatal túun ti'obe' j xaman ti' le táax lu'um yaan tu chuun u witzil More'.

²Yuumtzile' tu ya'alaj ti' Gedeón: Sen ya'ab máaco'ob ca taasic ta wéetel, wa ca in beet u pa'abal u muuko'ob le madianitaob tumen le j israelitaobo'; yaan u nojba'alcunsicuba'ob tin táan, yaan u tucultico'obe' tu juunal tu tocajuba'ob.

³Let óolale' a'al ti' le máaco'obo' je'el máax yaan sajaquil ti'e' je'el u páajtal u bin tu yotoche'. Bey úuchic u túulalo'ob tumen Gedeón, ca j bino'ob veintidós mil máaco'ob, j p'áato'ob diez mil.

⁴Ba'ale' Yuumtzile' tu ca'a a'alaj: Láili' ya'abo'obe'. Biso'ob u yuko'ob ja', te'elo' teen bíin in dza'ob ti' túuntajil, teen bíin in wa'al ti' teech máaxo'ob cun bino'ob ta wéetel, máaxo'ob ma'.

⁵Gedeón túune' tu bisaj le máaco'ob u yuko'ob ja'o' ca j a'ala'ab ti' tumen Yuumtzil: Dzáa jun páay le máaxo'ob cu yukico'ob ja' yéetel u kabo'ob, le táan u léedzico'ob beyo'ob peeko'obe', jun páaycunt xan le máaxo'ob cu xoltalo'ob u yuko'ob le ja'o'.

⁶Le máaxo'ob tu yukajo'ob ja' yéetel u kabo'obe' táan u léedzico'ob beyo'ob peeko'obe', chúucpaj trescientos. Tuláacal le u chuca'ano'obe' xolajo'ob u ti'al u yukico'ob le ja'o'.

⁷Yuumtzil túune' tu ya'alaj ti' Gedeón: Yéetel le trescientos máaco'oba' bíin in toque'ex, yaan in pa'ic u muuk le j madianitaobo'. Tuláacal le u chuucáano'obo' je'el u páajtal u bino'obe'.

⁸Gedeón túune' tu ya'alaj ti' tuláacal u chuucáano'obe' ca suunaco'ob tu chuybil najo'ob; ba'ale' ma'ili' u binbalo'obe' tu ch'a'aj ti'ob u p'uulo'ob yéetel u baac j tamano'ob. Chéen j p'áat yéetel le trescientos máaco'ob yéeya'ano'ob, ca je'elo'ob ti' jun p'éel ca'anal pu'uc, le j madianitaobo' ti' jayacbalo'ob ca'ach j táax lu'ume'.

⁹Ti' le áakabo' Yuumtzile' tu ya'alaj ti' Gedeón: Líikene' ca éemequech u ti'al ca xi'iquech a ba'atelt le j madianitaob, tumen bíin in ca'aj in kubo'ob ta kab.

¹⁰Ba'ale' wa sajaquech a ba'atelte', éemen táanil yéetel Fura a palitzil te tu'ux cu je'elelo'ob.

¹¹Ch'en xiquint ba'ax cu ya'alico'ob. Cu dzo'ocole' yaan a wu'uyicabáa yaan a wo'ol u ti'al ca a ba'atelte'. Gedeón túune' j éem yéetel Fura u palitzil tac te j cúuchilo'ob yano'ob táanil tu'ux cu pa'atico'ob u ba'atelo'ob le aj p'eeco'obo'.

¹²Le j madianitaob, le j Amalecitaob yéetel le j lakinilo'obo' u ki'itbesmajuba'ob te j táax lu'umo' bey u múuch'ulo'ob j sáako'obe'. Yaan ya'abcach camello'ob je'el bix u ya'abil le sa'am lu'um yaan tu jáal le ka'anabo'.

¹³Le ca'aj náadz Gedeón te tu'ux cu pa'atajo'ob le aj p'eeco'obo' tu yu'ubaj táan u tzicbaltic jun túul aj ba'atele' ti' u láak le ba'ax tu wayaktaje', táan u ya'alic: Tin náaytaje', jun p'éel u waajil cebada táan u taal u balkalaanquil tac c jaato, le ca tu jadzubáa ti' jun p'éel chubil naj ca tu beetaj u lúubul.

¹⁴Le u yéet aj ba'atelo' tu núucaj: Lelo' ma' u láak ba'al wa ma' u máascab Gedeón, u paal Joás le j israelitao'. Kue' bíin u kuub tu kab Gedeone' le j madianitaob yéetel tuláacal u chuybil najo'ob.

¹⁵Le ca tu yu'ubaj bix tzicbalta'abic le wayak yéetel bix na'ata'abique', Gedeone' tu kultaj Yuumtzil. Cu dzo'ocole' suunaj tu'ux much'ucbalo'ob le j israelitaob ca tu ya'alaj: ¡Líikene'ex tumen Yuumtzile' bíin u kub to'on tu'ux cu much'talo'ob le j madianitaobo'!

¹⁶Tu séeblaquile' tu jatzláantaj le trescientos aj ba'atelo'ob óox tzúucul, ca tu dzaj u baac j tamano'ob ti' tuláacal yéetel p'úulo'ob táan bisico'ob ichilo'obe' tajche'ob t'aba'antaco'ob.

¹⁷Ca tu ya'alaj ti'ob: Le quéen kuchuquen tu láak u jun tzéel tu'ux much'ucbalo'ob aj p'eeco'ob, pactene'exi' u ti'al ca a beete'ex le ba'ax bíin in beeté.

¹⁸Le quéen in jóops le baac yéetel le máaxo'ob cu bino'ob tin wéetela', te'ex xane' jóopse'ex tu bakpach tuláacal le tu'ux cu much'talo'ob yéetel awte'ex: ¡Tu yo'olal Yuumtzil yéetel tu yo'olal Gedeón!

¹⁹Bey túuno', Gedeón yéetel u aj ba'atelo'obe' j kucho'ob tu láak jun tzéel tu'ux much'ucbalo'ob, le táan u ke'exel u aj cananitaob le chúumuc áakabo'. Ca túun tu jóopsajo'ob u baac j taman ca tu pa'ajo'ob u p'úulo'ob cu bisico'obe',

²⁰le óox tzúucul aj ba'atelo'ob ti' le súutuco' tu jóopsajo'ob u baac j taman, ca tu pa'ajo'ob u p'úulo'ob. Ti' u x dzíic kabo'obe' cu bisico'ob ca'ach le t'aba'an taj che'obo', tu x no'oj kabo'obe' cu bisico'ob ca'ach u baaco'ob le j tamano', táan xan u yawatico'ob: ¡Ba'atel! ¡Tu yo'olal Yuumtzil yéetel tu yo'olal Gedeón!

²¹Le j isarelitaobo' p'áato'ob ma' tu péeco'ob tu cúuchilo'ob tu bakpach le jaato; tuláacal u aj ba'atelo'ob le j madianitaobo' jóoko'ob áalcabil táan u yawato'ob.

²²Ca'aliquil le trecientos israelitaobo' táan ca'ach u bin u jóopsico'ob u baaco'ob le j tamano'obo', Yuumtzile' tu beetaj u ba'atelo'ob le j madianitaob tu baatzilo'ob, yéetel ca jóokoco'ob táan u púudzulo'ob tac Bet-sita, tu beelil Zerera, tac xan tu xuul u lu'umil Abel-mehola, naadz ti' Tabat.

²³J t'a'an túun le j israelitaob ti' u múuch' cajtalilo'ob u yotochnáalo'ob Neftalí, Aser yéetel tuláacal Manasés u ti'al ca u yáalcabpachtajo'ob le j madianitaobo'.

²⁴Gedeone' tu túuxtaj aj bisaj t'aano'ob tu witzilo'ob Efraín, táan u túuchi'itic ti' u cajnáalilo'ob le múuch' cajtalilo'oba' ca jóokoco'ob u ba'atelto'ob le j madianitailo'ob yéetel ca u dzajuba'ob tu'ux cu páajtal u ch'actico'ob u áalcab ja'il Bet-bara yéetel tu yáalcab ja'il Jordán, ma'ili' kuchco'ob leti'obe'. Le j Efranitaobo' tu dzo'ocbesajo'ob le t'aano',

²⁵bey xan tu machajo'ob ca'a túul u náacomo'ob le j madianitaob cu kaaba'intico'ob Oreb yéetel Zeeb. Orebe' tu quíimsajo'ob te j cháaltuun kaj óolta'an bejela'e' bey u cháaltuunil Oreb, Zeebe' quíimsa'ab ti' le cúuchil cu bisic u kaaba'o', le cúuchil tu'ux ca'ach cu pe'epe'echa'ata'al le uvao' u ti'al u jóokesa'al ca'ach u kaab. Cu dzo'ocol u yáalcab pachtico'ob le j madianitaobo', tu bisajo'ob ti' Gedeón ti' yaan ca'ach tu láak u tzéelil Jordán u pool Oreb yéetel u pool Zeeb.