Read Yucateco Jueces 8 Bible Online

Jueces 8 - Yucateco bible

Jueces 8

¹U múuch' cajtalilo'ob u yotochnáalo'ob Efraine' kuuxilnajo'ob ca j sacach t'aanajo'ob yéetel Gedeón tu yo'olal ma' j túuxta'abo'ob t'anbil le ca jóok ba'ateltbil le j madianitaobo'.

²Ba'ale' Gedeone' tu núucaj: ¿Ma' tu páajtal a wilique'ex, te'exe' ta beetaje'ex asab ya'ab ti' le tin beetajo'? Le jun p'íit ta beetaje'exo' asab co'oj u tojol, ti' le buca'aj t beetaj to'ono'.

³Kue' tu kubaj ti' te'ex Oreb yéetel Zeeb, u náacomo'ob le j madianitaobo'. ¿tene' ba'ax tin beetaj cu páajtal u que'etel yéetel le ta beetaje'exo'? Le ca j u'uya'ab tumen le j Efrainilo'ob u t'aan Gedeone' jáaw u kuuxilo'ob ti'.

⁴Gedeón yéetel u trescientos aj ba'atelo'obe' j kucho'ob Jordán ca tu ch'actajo'ob quex sen ca'ana'ano'ob tu yo'olal tu yáalcabpachtajo'ob le aj p'eeco'obo'.

⁵Sucote', Gedeone' tu káataj ti' u cajnáalilo'ob: Beete'ex utz, dza'iquex wa ba'ax u ti'al u jaant le máaxo'ob cu taalo'ob tin wéetela', tumen sen ca'ana'ano'ob. Táan c máanbal áalcab pachtic u ajawo'ob Madianitaob, Zeba Yéetel Zalmuna.

⁶Ba'ale' u nojochilo'ob Sucote' tu ya'alajo'ob: ¿Dzo'oc wa a machic Zeba yéetel Zalmuna u ti'al ca j tzéent a aj ba'atelo'ob?

⁷Gedeone' tu núucaj: ¡cu dzo'ocol u ku'ubul ti' teen tumen Yuumtzil Zeba yéetel Zalmuna, quin suut in tzi'ict a bakele'ex yéetel ki'ixo'ob yéetel u x cojquéejil le x tocoy lu'umo'!

⁸Le ca j luk te'elo' j bin tac Penuel, tu'ux tu káataj láili' le tu káataj Sucoto', le j penuelilo'obo' tu ya'alajo'ob jach je'el bix a'ala'abic ti' Sucote'.

⁹Gedeone' tu ya'alaj ti'ob: ¡Le quéen suunaquen béeychaj ba'atele' quin jutic le x witzil najo'!

¹⁰Zeba yéetel Zalmunae' ti' yano'ob ca'ach Carcor yéetel míin bey quince máaco'obe', le jaaj p'áatal ti' j lakin aj ba'atelo'ob, tumen dzo'oc ca'ach u quíimil ciento yéetel veinte mil ti'obi'.

¹¹Gedeone' j náachchaj u xíimbal te j bej cu bakpachtic le x tocoy lu'umo', tu lakin Noba yéetel Jogbeha, ca j bino'ob yóokol tu'ux jelecbalo'ob, ma' táan ca'ach u pa'atico'ob.

¹²Zeba yéetel Zalmunae' jóoko'ob áalcab táan u púudzlo'ob, ba'ale' Gedeone' tu yáalcabpachtajo'ob ca tu macho'ob, tu beetaj u láaj ch'a'ico'ob sajaquil le aj ba'atelo'obo'.

¹³Ca'aliquil táan u suut Gedeón ti' le ba'atel tu bejil Heres,

¹⁴tu machaj jun túul j xi'ipal j Sucotil ca tu káat chi'itaj; le j xi'ipalo' dzíibtbil tu kubjilac u kaaba'ob setenta yéetel siete u nuuquilo'ob yéetel u nuuquilo'ob Sucot.

¹⁵Gedeón túune' j bin Sucot ca tu ya'alaj ti' le caajo': ¿Kaja'an wa te'ex bix ta che'ejtilaquene'ex tu yo'olal Zeba yéetel Zalmuna? ¿kaja'an ti' te'ex ma' ta wóoltaje'ex a dza'ex waaj ti' in aj ba'atelo'ob jach ca'ana'ano'ob, le ca ta wa'alaque'ex ma' c machico'obi'? ¡je'el leti'oba'!

¹⁶Gedeón túune' tu machaj ki'ixo'ob yéetel u x cojquéjil le x tocoy lu'umo', yéetelo'ob tu jadzaj u nuuquilo'ob Sucot.

¹⁷Bey xan tu jutaj u witzil najil Penuel, yéetel tu quíimsaj u cajnáalilo'ob le caajo'.

¹⁸Cu dzo'ocole' tu káat chi'itaj ti' Zeba yéetel ti' Zulmuna: ¿Bix le máaco'ob ta quíimsaje'ex Taboro'? Leti'obe' tu núucajo'ob: Chica'ano'ob ca'ach ti' teech tu jujun túulo'obe' bey jun túul u paal ajawe'.

¹⁹Gedeón túune' awatnaji: ¡In sucu'uno'ob! ¡Ta quíimsaje'ex in wéet ki'ikelo'ob! Jach jaajil, je'el bix jach jaaj cuxa'anil Yuumtzile', wa te'ex ma' táan ca'ach a quíimsique'exo'obe', jach tu jaajile' mix teen bíin in quíimse'ex ca'achi.

²⁰Ca tu ya'alaj ti' Jefer, u yáax paal: ¡Líiken quíimso'ob! Ba'ale' Jefere' jach paal ca'achi', ma' tu yóoltaj u jóokes u máascabi'.

²¹Zeba yéetel Zalmuna' túune' tu ya'alajo'ob ti' Gedeón: ¡Quiimso'on túun teechi'! ¡wíinique' kaj óolta'an tu yo'olal u jach xixib máaquiil! Gedeone' j líike' ca tu quíimsajo'ob, ca tu chá'aj le ba'alo'ob jadzutztac cu bisico'ob tu caalo'ob u camello'ob Zeba yéetel Zalmuna.

²²Le j israelitaob túuno' tu ya'alajo'ob ti': Bey dzo'oc a toquico'on ti' u páajtalil le j madianitaobo', j káate', teech yéetel a paalale' ca a méektáanto'one'ex.

²³Ba'ale' Gedeone' tu núucaj: Mix teen, mix in j xibil paal bíin u méektáante'ex. Yuumtzil bíin u méektáante'ex.

²⁴Ba'ax in káate' ca dza'abac teen le x dzipito'ob ta ch'a'aje'exo'. Le x dzipito'ob oro u ca'aj cu dzáico'ob ca'ach le aj ba'atelo'ob, le c aj p'eeco'obo' tumen leti'obe' ti' caja'ano'ob ca'ach x tocoy lu'ume'.

²⁵Le j israelitaobo' tu jayajo'ob jun p'éel nook te j lu'umo', ca tu láalajo'ob yóokol le x dzipito'ob tu ch'a'ajo'obo', ca tu ya'alajo'ob ti' Gedeón: je'el lo'oba' ch'a'e'.

²⁶Tuláacal u oroil le x dzipito'obo' tu p'isaj óoli' diez yéetel nueve kilos, ma' j xo'oc le u láak jadzutz ba'alo'obo' mix le co'oj ba'alo'obo', mix le chacjome'en nook cu bisico'ob u ajawilo'ob Madián, mix u léech caal u camello'ob.

²⁷Yéetel le oroo', Gedeone' tu beetaj jun p'éel efod, ca tu ta'acaj tu caajil Ofra, u noj caajal, tuláacal israele' ma' tu kex óoltajo'ob Yuumtzil tu yo'olal le efodo', tumen suunaj jun p'éel táabsaj ti' Gedeón yéetel u yotochnáalo'ob.

²⁸Bey úuchic u palitzilta'al le j madianitaob tumen Israel, mix bikin suunajo'ob u líiksico'ob jo'ol. Cuarenta ja'abo'ob j máani', ca'aliquil cuxa'an Gedeone', yanchaj jéedzel ti' le cúuchilo'obo'.

²⁹Jerobaal, wa Gedeone', j bin cajtal jach tu yotoch; yanji setenta u paalal, tumen ya'ab ca'ach u yatano'ob.

³¹Jun túul u x keech yaan ca'ach ti' Siqueme', bey xan tu dzaj jun túul paal ti', ca tu dzaj u kaaba'int Abimelec.

³²Gedeone' quíim jach nuxib, ca j mu'uc tu mucnal Joás u taata, tu caajil Ofra, u noj caajil u cajtalil yotochnáalo'ob Abiezer.

³³Cu dzo'ocol u quíimil Gedeone', le j israelitaobo' tu xúump'attajo'ob Yuumtzil u ti'al u kultico'ob le u jejeláas yoochelo'ob Baal ca tu yéeyajo'ob Baal-berit bey u kuobe'.

³⁴Tu tu'ubsajo'ob Yuumtzil u Ku, le máax toco'ob ca'ach ti' tuláacal u aj p'eeco'ob bakpachmailo'obe'.

³⁵Yéetel ma' tu sutajo'ob u jel le utz, ti' u yotochnáalo'ob Jerobaal, u káat u ya'ale' Gedeón, tu yo'olal tuláacal u ma'alob ba'alo'ob tu beetaj ca'ach ti'olalo'ob.