Read Yucateco Jueces 9 Bible Online

Jueces 9 - Yucateco bible

Jueces 9

¹Abimelec, u paal Jerobaale', j bin Siquem u ti'al j t'aan yéetel u láaktzilo'ob u maama. Ca tu ya'alaj ti'ob:

²Tu kaaba' c láaktzilo'one'exe', quin káat óoltic ti' te'ex ca a wa'alex ti' u cajnáalilo'ob Siqueme', asab ma'alob ca méektáanta'aco'ob chéen tumen jun túul máac, ma' tumen tuláacal u setenta paalal Jerobaali'.

³Tu yo'olal láaktzil Abimeleque', leti'obe', tu dzajuba'ob tu tzéel, ca j bino'ob j t'aan yéetel le j Siquemilo'obo' u ti'al ca u éejemto'ob.

⁴Tu ch'a'ajo'ob xan setenta sac taakin tu kulnaj baal-berit ca tu dzajo'ob ti' Abimelec, yéetel le taakino', Abimeleque' tu bo'otaj dze'edzec quíimsaj wíinico'ob u ti'al ca xi'ico'ob tu paach. Le wíinico'obo' j bino'ob yéetel,

⁵Ofra, tu'ux cajlaj ca'ach u taata Jerobaal, chéen ti' jun p'éel tuuniche' quíimsa'ab setenta u sucu'uno'ob Abimelec. Chéen tu ta'acbesicubáa Jotam, u chichnil u paalal Jerobaal.

⁶Cu dzo'ocole' tuláacal le j Siquemilo'ob yéetel Bet-milo'obe' tu much'quintajuba'ob tu yicnal jun cúul béec naadz xan ti' le quili'ich tuunich yaan Siquemo', ca tu wa'acuntajo'ob Abimelec bey ajawe'.

⁷Le ca tu yojéeltaj Jotame', j na'ac tu witzil Gerizim, te'elo' awatnaj ka'am u ti'al ca u'uya'ac tumen tuláacal: ¡U'uyene'ex ma'alob, u j xiibile'ex Siquem! ¡Bey xan ca u'uyaque'ex tumen Ku!.

⁸Jun p'éel kiine' le che'obo' tu yóoltajo'ob ca yanac jun túul u ajaw, ca tu ya'alajo'ob ti' le olivoo' ca u beet u ajawil.

⁹Ba'ale' le olivoo' tu ya'alaj ma', tumen u ti'al ca in beet u ajawil le che'obo' kabéet in p'atic in dzáic aceite, le cu meyaj u ti'al u tzi'iquil máaco'ob, bey xan u tzi'iquil Ku.

¹⁰Le che'ob túuno' tu káat chi'itajo'ob ti' u che'il higo ca u bee u ajawil ichilo'ob.

¹¹Ba'ale' u che'il le higo tu ya'alaj ma' tu páajtal, tumen u ti'al ca in beet u ajawil le che'obo' kabéet u p'atic u dzáic ch'ujuc yéetel u qui'iqui' higo'ob.

¹²Le che'ob túuno' tu ya'alajo'ob ti' u che'il uva ca u beetubáa u ajawilo'ob.

¹³Ba'ale' le u che'il le uvao' tu ya'alaj ti'obe' ma', tumen u ti'al ca u beetubáa u ajawil le che'obo' yaan u p'atic u dzáic u kaab uva, le cu meyaj u ti'al u qui'imactal u yóol máaco'ob bey xan u qui'imactal u yóol Ku.

¹⁴Tu dzoocbalaque' le che'obo' tu ya'alajo'ob ti' le x cojquéejo' ca u beet u ajawil ichilo'ob.

¹⁵Le x cojquéejo' tu núucaj, wa jach a káate'ex ca in beetinbáa ajawil ichile'exe', tuláacal yaan wal u dzáicubáa yáanal u bo'oy; ba'ale' wa ma' a káate'ex ca in beet in ajawil ichile'exe', yaan u jóokol ichile'exe' jun p'éel káak bíin u xu'uls u kuulche'ilo'ob le Líbano'.

¹⁶Bejela'e' teen quin káat chi'itique'ex: ¿Ta beetaje'ex ba'ax ma'alob yéetel ba'ax utz iquil ta wa'acuntjilaque'ex Abimelec bey ajawe'? ¿Ta beetaje'ex ba'ax ma'alob ti' u yotochnáalo'ob Jerobaal je'el bix leti' tu beetaj ta wéetele'exe'?

¹⁷Tumen in taatae' tu dzaj u cuxtal le ca j ba'atelnaj u ti'al a to'ocole'ex ti' u páajtalil le j madianitaobo'.

¹⁸Te'exe', dzo'oc a sutique'ex a paache'ex ti' u yotochnáalo'ob in taata, dzo'oc xan a quíimsique'ex setenta u paalal ti' jun p'éelili' tuunich. Cu dzo'ocole' bey báaxale' ta wa'acuntaje'ex Abimelec bey ajawe', u paal Jerobaal yéetel u x keech, chéen tumen leti'e' a láaktzile'ex.

¹⁹Tene' quin wa'alic ti' te'ex bejela'e': Wa te'ex ta beetaje'ex utz ti' Jerobaal yéetel u yotochnáalo'obe', xi'ic te'ex utzil;

²⁰wa ma'e', ¡jóokoc ti' Abimelec jun p'éel káak ca u xu'uls tuláacal Siquemilo'ob yéetel Bet-milo, yéetel ca jóokoc ti' Siquem yéetel Bet-milo jun p'éel káak u xu'uls Abimelec!.

²¹Cu dzo'ocol u ya'alic lela', Jotame' púudzi ca j bin cajtal Beer, tumen tu ch'a'aj sajaquil ti' u sucu'um Abimelec.

²²Abimeleque' tu beetaj ba'ax tu yóoltaj ti' le j israelitaob óox p'éel ja'abo'ob.

²³Kue' tu dzaj jun túul kaakas pixan ichil Abimelec yéetel le j Siquemilo'obo', u ti'al ma' dzo'ocbesico'ob u t'aan Abimelec.

²⁴u ti'al u bo'otic Abimelec iquil tu wequilac ki'ik le ca tu quíimsaj u setenta paalal Jerobaal, le j Siquemilo'obo' bíin u bo'oto'ob tu yo'olal tu yáantjilaco'ob.

²⁵Le j Siquemilo'ob yaan ca'ach máaco'ob ichilo'ob u ta'acmajuba'ob j káax u ti'al u beetico'ob loob, ti' je'enque'ex máax cu máano'ob naadz te j bejo'. Abimeleque' tu yojéeltaj.

²⁶Jun p'éel kiine', Gaal, u paal Ebedes j máan Siquem yéetel u sucu'uno'ob ca j lúubo'ob utzil ti' le noj caajo',

²⁷j bino'ob ich cool u ti'al u molico'ob uva ca tu beetajo'ob vino yéetel, ca tu beetajo'ob jun p'éel nojoch kiinbesaj táan u janalo'ob táan u cáaltalo'ob tu yotoch u kuob yéetel táan u loolob t'antico'ob Abimelec.

²⁸Gaal túune' cu ya'alic ca'achi': ¿Máax cu tuculticubáa le Abimeleca'? Ma' wa chéen jun túul u paal Jerobaal yéetel Zebule' u yáantaj. To'one' j Siquemilo'on, ¿Máaxo'on u ti'al ca máanaco'on beyo'on u palitzilo'ob tu táano'obe'? Co'ox cuxtal bey u palitzilo'ob Hamor, le máax líikes u caajil Siquem, ma' u palitzilo'on Abimelequi'.

²⁹¡Quexi', wa teen a nojchile'exe', tu séeblaquil je'el in lukesic Abimeleque'! bey xan tu ya'alaj: ¡Xeen, Abimelec much'quint a aj ba'atelo'ob co'oten j ba'atel!

³⁰Le ca tu yu'ubaj Zebul u j méektáan le caajo', le ba'ax cu máan u ya'al Gaale', sen kuuxilnaji

³¹ca tu túuxtaj a'albil ti' Abimelec, ti' yaan ca'ach Aruma. Gaal u paal Ebede', j taal yéetel u sucu'uno'ob Siquem, táan u líiksaj óoltic u cajnáalilo'ob le caaja'.

³²Let o'olale' jóoken a ta'acbesabáa yéetel áakab te j káaxo', pa'ate' yéetel a aj ba'atelo'ob.

³³Ja'atzcab, le quéen jóokoc kiine' pulabáa yóokol le caaja', le quéen jóokoc Gaal yéetel u aj ba'atelo'ob j ba'atel ta wéetele', beet ti' leti'ob, je'el ba'ax a káate'.

³⁴Bey túuno', Abimelec yéetel tuláacal u aj ba'atelo'obe', jóoko'ob yéetel áakab ca tu ta'acbesjucuba'ob tu bakpach Siquem, u t'oxmajuba'ob can múuch'.

³⁵Le ca jóok Gaal tu jool le caajo', Abimelec yéetel u aj ba'atelo'ob jóoko'ob tu'ux tu ta'acbesajuba'ob.

³⁶Ca tu yilaj Gale' tu ya'alaj ti' Zebul: ¡Ile, yóokol le jo'ol lu'umo'obo' táan u taal u yéemel jun múuch' aj ba'atelo'ob! Tu núucaj Zebule': Ma' chéen u yoochelo'ob le jo'ol lu'umo'ob, chica'an ti' wíinico'ob.

³⁷Ba'ale' Gaale' tu ca'a a'alaj: ¡Bey xan te j pu'uco' cu kaaba'intic Tuuch lu'um táan taal u yéemel jun múuch' aj ba'atelo'ob! ¡yaan u láak jun múuch' cu taal tu beel Béequil le aj na'ato'obo'!

³⁸Tu ya'alaj Zebul: ¡T'aanen bejela'e', j nonojbáil! ¡Teech, ca wa'alic, Abimeleque' mix ba'al u ti'al ca u palitzilto'on! te yaan u aj ba'atelo'ob le mix ba'al a ti'alo'. ¡Xeen jóoken u ti'al ba'atel yéetelo'ob bejela'e'!

³⁹Gaale' jóok ba'atel, tu nactáantaj u cajnáalilo'ob Siquem yéetel Abimelec.

⁴⁰Abimeleque' tu ch'a'apachtaj, Gaale' j púudz ti', tac tu jool le noj caajo', yanchaj ya'ab quimeno'ob.

⁴¹Abimeleque' j p'áat Aruma, Zebule' tu jóokesaj Gaal yéetel u sucu'uno'ob Siquem.

⁴²Tu láak kiine' u cajtalilo'ob Siqueme' jóoko'ob j káax, le ca tu yojéetaj Abimeleque',

⁴³tu jóoksaj óox jaatz ti' u aj ba'atelo'ob ca tu ta'acbesajubáa te j káaxo'; le ca tu yilaj u jóokol le Siquemilo'ob te j caajo' jóok tu'ux u ta'acbesajuba'o' ca tu pulajubáa yóokolo'ob.

⁴⁴Leti' yéetel le jun jaatz j bino'ob tac tu jool le caajo' ca tu ch'a'ajo'ob, ca'aliquil le u láak ca'a jaatz tu pulajuba'ob yóokol le cu máano'ob te j káaxo' ca tu quíimso'ob;

⁴⁵u yalab le kiino' tu máansaj Abimelec táan u ba'ateltic Siquem, tac ca tu ch'a'aj. Tu xu'ulsaj le caajo' ca tu quíimsaj tuláacal u cajnáalilo'ob, ca tu pakaj ta'ab te j caajo'.

⁴⁶Le ca tu yojéeltajo'ob le j Migdal-siquen ba'ax dzo'oc ca'ach u beetic Abimeleque', j bino'ob tu bo'oy u tuulumil kulnaj El-berit.

⁴⁷Ca tu yojéeltaj Abimelec tuláacal ti' much'ucbalo'obi'.

⁴⁸Bin yéetel tuláacal u aj ba'atelo'ob tu káaxil Salomón yéetel jun p'éel báat ca tu ch'acaj u kab jun cúul che'; cu dzo'ocole' tu dzaj tu queléembal, ca tu ya'alaj ti' tuláacal u aj ba'atelo'ob ca u beeto'ob xan beyo'.

⁴⁹Tuláacalo'ob tu ch'a'aco'ob u kab che' ca j bino'ob tu paach Abimelec tu tuulumil kulnaj tu'ux tu tzolajo'ob u kab le che'obo' ca tu t'abajo'ob, ca tu quíimso'ob tuláacal le j Migdal-siquem, tu pa'ate'ile' mil j xiibo'ob yéetel co'olelo'ob.

⁵⁰Cu dzo'ocole' Abimeleque' xíimbalnaj tac Tebes, tu nu'uctaj le ba'atelo' ca j bin yóokolo'obe' ca tu ch'a'aj.

⁵¹Chúumuc le caajo' yaan ca'ach jun p'éel witzil naj te'elo' tu ta'acbesicuba'ob tuláacal u cajnáalilo'ob le caajo' j xiibo'ob yéetel x co'olelo'ob, tu kalajo'ob ma'alob u jool najilo'obe' ca j na'aco'ob tu yóokol;

⁵²ba'ale' Abimeleque' kuch tac tu jool najil le witzil najo' ca tu tuclaj u beetic loob ti'ob, táan u dzáicubáa u tóoc ca'achi',

⁵³le ca j pu'ul tumen jun túul co'olel jun p'éel u ca'il juuch', ca j lúub tu pool ca j pa'ab u baaquel u jo'ol

⁵⁴Abimeleque' tu t'anaj u yáantaj le cu bisic nu'ucul u ba'atele' ca tu ya'alaj ti'; jóokes a máascab ca quíimsen tumen ma' in káat ca a'ala'aque' jun túul co'olel tu quíimsajen. U j yáantaj túune' tu póot lomtaj yéetel u máascab, bey quíimico'.

⁵⁵Le j israelitaob ca tu yilajo'ob dzo'oc u quíimil Abimelec, suunajo'ob tu yotocho'ob.

⁵⁶Bey úuchic u beetic Ku, u bo'otic Abimelec le loob tu beetaj ti' u yotochnáalo'ob u taatae', ca tu quíimsaj setenta u sucu'uno'ob.

⁵⁷Bey xan tu beetaj Ku, ca u bo'ot le j Siquemilo'ob tuláacal máaco'ob tu quíimsajo'obe'. Beyo' dzo'ocbesa'ab le loolob t'aan tu beetaj Jotam, u paal Jerobaal.