Read Yucateco Apocalipsis 10 Bible Online

Apocalipsis 10 - Yucateco bible

Apocalipsis 10

¹Je'el túuna' tin wilaj u láak mu'uka'an ángel táan u yéemel te j ca'ano' bakpachta'an tumen jun p'éel múuyal, yóokol u poole' yaan jun p'éel chéel. U táan yiche' cu léembal bey kiine', u yooco'obe' bey u tóoch'bal káake'.

²Tu kabe' ti' yaan jun p'éel chan libroe' je'ekab, ca tu dzaj u x no'oj ooque' tu yóokol le ka'anabo', u x dzíic ooque' tu yóokol le lu'umo'.

³Ca túun ka'am awatnaj je'el bix u yáacan jun túul leóne', le ca j awatnaje' siete quíilbal cháac tu beetaj u yu'uba'al u t'aano'ob.

⁴Cu dzo'ocol u t'aan le siete quíilbal cháaco'obo', tene' bin in ca'aj in dzíibt ca'achi; ba'ale' tin wu'uyaj jun p'éel ca'anil t'aan tu ya'alaj teen: Ta'ac le ba'ax tu ya'alaj le siete cháaco'obo' yéetel ma' a dzíibtic.

⁵Tu séeblaquile' le ángel u dzaamaj jun dzíit u yooc yóokol le ka'anabo' yéetel jun dzíit yooc yóokol le lu'umo', tu líiksaj u x no'oj kabil tu tojil le ca'ano',

⁶ca tu ya'alaj tu kaaba' le máax cuxa'an u ti'al ja'abo'ob mina'an u xuulo', le máax beet le ca'ano', le lu'umo', le ka'anabo' yéetel tuláacal le ba'alo'ob yano'ob ti'obo', táan u ya'alic: Bejela'e' ma' táan u yantal xáantalil;

⁷tumen le quéen kuchuc u kiinil u paxic u séptimo ángel u trompetae', dzo'oc u dzo'ocpajal u tuucul Ku, je'el bix tu dzaj u yojéelt u aj bóobato'ob máaxo'ob u palitzilo'ob.

⁸Le t'aan cu jóokol te j ca'an tin wu'uyajo' j t'anaj tu ca'a téen tin wéetel ca tu ya'alaj teen: Xeen, ch'a'a le chan libro je'ekab yaan tu kab le ángel wa'alcbal yóokol le ka'anabo' bey xan yóokol le lu'umo'.

⁹Ca j binen tu yicnal le ángelo' ca tin káataj ti' ca tu dzaj teen le chan libroo'; leti'e' ca tu ya'alaj teen: Ch'a'e', jaante. Ta chi'e' yaan a wu'uyic ch'ujuc je'el bix caabe', ba'ale' yaan u káajtal ta jobnel.

¹⁰Je'el túuna' tin ch'a'a le chan libro tu kab le ángelo' ca tin jaantaj; tin chi'e' ch'ujuc je'el bix caabe', ba'ale' cu dzo'ocol in jaantique' ca j suunaj káajil tin jobnel.

¹¹Cu dzo'ocole' a'ala'ab teen: Yaan a wa'alic tu ca'a téen ba'ax cu ya'alic Ku tu yo'olal ya'abcach caajo'ob, múuh'ul caajo'ob, jejeláas t'aano'ob yéetel ajawo'ob.