Read Yucateco Apocalipsis 11 Bible Online

Apocalipsis 11 - Yucateco bible

Apocalipsis 11

¹Ca j dzaab teen jun p'éel jalal bey jun p'éel x p'isibche'e' ca j a'ala'ab teen: líiken p'is u kulnaj Ku, le le u multuunil kultajo', bey xan le máaxo'ob cu kultajo'ob te'elo'.

²Ba'ale' ma' a p'isic u táancabil le kulnajo', tumen dzo'oc u ku'ubul ti' le máaxo'ob ma' judíobo', leti'obe' yaan u xanabcha'atico'ob le quili'ich caajo' tu yáam cuarentidos winalo'ob.

³Tene' yaan in túuxtic in can túul jaajcunajo'ob, u ti'al ca t'aanaco'ob tin wo'olal tu yáam mil doscientos sesenta kiino'ob, u búuquintmajo'ob box búuco'ob.

⁴Le ca'a túul jaajcunajo'oba' leti' le ca'a cúul olivo'ob yéetel le ca'a p'éel x t'uchub sáasilo'ob dza'ano'ob tu táan u Yuumtzil le lu'umo'.

⁵Wa yaan máax u káat u beet loob ti'obe', leti'obe' cu jóoksico'ob káak tu chi'ob, cu chuca'an tóoquic u aj p'eeco'ob, beya' yaan u quíimil je'el máaxac ca yóolt u beet loob ti'obe'.

⁶Le jaajcunajo'oba' yaan páajtalil ti'ob u ti'al u kalico'ob le ca'ano' tu yo'olal ma' u káaxal ja' ca'aliquil táan u tze'eco'ob; yaan xan páajtalil ti'ob u ti'al u sutico'ob ki'ikil le ja'o', yéetel u beetico'ob u mukyaj le lu'umo' yéetel u jejeláasil núumyajo'ob je'el jay téen u káato'obe'.

⁷Ba'ale' le quéen dzo'ococ u meyajo'obe', le nojoch kasilba'al cu jóokol ti' le jach taamcach ch'e'eno' yaan u pulicubáa tu yóokolo'ob, yaan u dzáanche'etico'ob yéetel yaan u quíimsico'ob.

⁸U quimen wíinclilo'obe' yaan u p'áatal jilicbalo'ob ti' le nojoch caaj tu'ux si'in c Yuumtzil ti' cruzo'; le nojoch caaj ichil queet t'aane' cu kaaba'intic Sodoma, cu kaaba'intic xan Egipto.

⁹Tu yáam óox p'éel kiino'ob ca tac táancoche' u máaquilo'ob le caajo'obo', le ch'i'ibalo'obo', le jejeláas t'aano'obo' yéetel le múuch' caajo'obo' yaan u yilico'ob u quimen wíinclilo'obo'. Ma' tu cha'abal u mu'uculo'ob.

¹⁰U cajnáalilo'ob le lu'umo' yaan u qui'imactal u yóolo'ob úuchic u quiimsa'al le jaacunajo'obo' yéetel yaan u yu'ubicuba'ob sen utzil yanilo'ob, beyo' yaan u túuxtico'ob siibalo'ob tu baatzilo'ob; tumen le ca'a túul aj bóobato'obo' jun p'éel yaayaj óolal u ti'alo'ob.

¹¹Ba'ale' cu dzo'ocol le óox p'éel kiino'ob ca tac táancocho', cuxquinsa'abo'ob yéetel líiksa'abo'ob tu ca'a téen tumen Ku. Tuláacal le máaxo'ob j ilo'obe' chu'upo'ob yéetel sajaquilil.

¹²Tu séeblaquile' le ca'a túul jaacunajo'obo' tu yu'ubo'ob jun p'éel k'a'amcach t'aan te j ca'ano' táan u ya'alic ti'ob: Na'aquene'ex waye'. Ca j na'aco'ob ca'an ti' jun p'éel múuyal, táan u yila'alo'ob tumen u aj p'eeco'ob.

¹³Ti' le súutuquilo' yanji jun p'éel nojoch quíilbal lu'um, jun p'éel ti' u diez jaatzil caajo' jutchaji ca j quíim siete mil máaco'ob tu yo'olal le quíilbal lu'umo'. U yalab le máaco'obo' j chu'up yéetel saajquile', tu nojbe'encunto'ob Ku yaan te j ca'ano'.

¹⁴Dzo'oc u máan le ca'a p'éel loobo'; ba'ale' séeba'an u taal u yóox p'éel.

¹⁵Le séptimo ángelo' tu paxaj u trompetae', ca j u'uya'ab ka'ancach t'aano'ob te j ca'ano' táan u ya'alico'ob: U ajawililo'ob yóokolcaabe' dzo'oc u kuchul ti'alinta'al tumen c Yuumtzil yéetel u Cristo. Leti'e' yaan u beetic u jalachil u ti'al ja'abo'obo' mina'an u xuul.

¹⁶Bey túuno' le veinti cuatro u nuuquilo'ob u caajil Israel culucbalo'ob tu jalach káache'ob tu táan Kuo' j noclajo'obe' ca tu kultajo'ob Ku,

¹⁷táan u ya'alico'ob: C dzáic teech nib óolal, Yuumtzil, Ku yaan teech tuláacal páajtalil, bey tumen teche' yanech, yanili'eche' yéetel bíin taalaquech, tumen dzo'oc a ch'a'ic a nojoch páajtalil, yéetel dzo'oc a cáasic a beetic a jalachil.

¹⁸Le múuch' caajo'obo' dzo'oc u kuuxilo'ob, ba'ale' dzo'oc u kuchul u kiinil u jaadz, bey xan u kiinil a p'is óoltic le quimeno'obo' yéetel a dzáic le siibal cu najmatic a palitzilo'ob cu t'aano'ob ta kaaba'o', le máaxo'ob u kubmajo'ob u yóolo'ob ti' techo' yéetel le máaxo'ob cu tziquico'ob a kaaba'o', mejentaco'ob wa nuuctaco'ob, yéetel u kiinil a xu'ulsic le máaxo'ob loobiltic le lu'um.

¹⁹Ca túun je'epaj u kulnaj Ku yaan te j ca'ano' ca ila'ab u nu'ucul u nup t'aan te j kulnajo'. Ca yanchaj léembal cháaco'ob, quíilbal lu'um yéetel káax ka'amcach bat.