Read Yucateco Apocalipsis 12 Bible Online

Apocalipsis 12 - Yucateco bible

Apocalipsis 12

¹Ca j chíicpaj túun te j ca'ano' jun p'éel nojoch chíiculal: jun túul co'olel u búucbesmubáa yéetel le kiino', yéetel le ujo' ti' yaan tu yáanal u yoque', tu poole' yaan jun p'éel péet jo'ol yaan doce eeko'ob ti'.

²Le co'olela' koja'an ti' chaan pal, cu yawat tu yo'olal u ki'inamil u síijsaj, tumen táan u mukyaj u ti'al u síijsaj.

³Cu dzo'ocole' j chíicpaj te j ca'ano' u láak chíicul: jun túul nojoch chac can yaan siete u poolo'ob, diez baaco'ob yéetel yaan jun p'éel péet jo'ol ti' jujun p'éel u pool.

⁴Tu jíiltaj yéetel u neje' jun p'éel ti' u yóox jaatzil u eekilo'ob ca'an ca tu pulaj yóokol le lu'umo'. Le caana' j wa'alaj actáan ti' le co'olel cu síijsajo' u ti'al u jaant le paal chéen p'el u síijilo'.

⁵Le co'olelo' tu síijsaj jun túul xiibi' paal, leti'e' yaan u beetic u jalachil yóokol tuláacal le múuch' caajo'obo' yéetel jun p'éel x p'isib beeta'an yéetel hierro. Tu séeblaquil le Paalo' j lukesa'ab ti' le co'olelo' ca j bisa'ab ti' Ku yéetel ti' u jala'ach káanche'.

⁶Le co'olelo' j púudze' ca j bin ti' jun p'éel x tocoy lu'um, tu'ux nu'ucbesa'an tumen Ku jun p'éel cúuchil u ti'al leti' u ti'al ca tzéenta'ac te'elo' tu yáam mil doscientos sesenta kiino'ob.

⁷Cu dzo'ocole' yanchaj jun p'éel ba'atel teen ca'ano': Miguel yéetel u ángelo'obe' ba'atelnajo'ob u ti'al u beeto'ob loob ti' le caano'. Le caan yéetel u ángelo'obe' ba'atelnajo'ob,

⁸ba'ale' bin kaasil ti'ob ti' le ba'atelo'; ma' yanji' cúuchil u ti'alo'ob te j ca'ano'.

⁹Bey túuno' j pu'ul táancab le nojoch caano', le úuchben caan cu Kaaba'intic Kasiba'al wa Satanaso', le máax tusic tuláacal yóokolcaabo'. Leti' yéetel u ángelo'obe' j pu'ulo'ob yóokolcaab.

¹⁰Ca tin wu'uyaj jun p'éel ka'amcach t'aan te j ca'ano', táan u ya'alic: Dzo'oc u kuchul le tocsajilo', le páajtalilo' yéetel u ajawil Ku, yéetel u páajtalil u Cristo; tumen dzo'oc u pu'ulul táancab u j tacpool c sucu'uno'ob, le máax taquic u poolo'ob yéetel kiin yéetel áakab tu táan c Ku.

¹¹C sucu'uno'obe' dzo'oc u dzáanche'etico'ob le j tacpoolo' tu yo'olal u ki'ikel le aj Tamano' yéetel tu yo'olal le u t'aanil jaajcunajil tu dzáajo'obo'; tumen ma' tu ch'a'ajo'ob sajaquil ti' quíimili'.

¹²¡Qui'imacchajac túun a wóole'ex, ca'ane'ex, yéetel te'ex caja'ane'ex ti'ob! ¡Ba'ale' Óotzilo'ob le máaxo'ob caja'ano'ob te j lu'umo' yéetel te j ka'anabo'! Tumen le kasiba'alo' dzo'oc u yéemel ichile'ex, p'uja'an, tumen yojel chéen jun p'íit kiin p'aatal ti'.

¹³Le caano' ca tu yilaj dzo'oc u pu'ulul lu'ume' jo'op' u ch'a'apachtic le co'olel tu síijsaj le xiibi' paalo'.

¹⁴Ba'ale' ti' le co'olelo' j dza'ab ca'a p'éel u xiik nojoch cóot ti' u ti'al ca páatac u xiknal tac tu cúuchil te x tocoy lu'umo', náach ti' le caano', tu'ux unaj u tzéenta'al tu yáam óox p'éel ja'ab ca'a tac táancoch.

¹⁵Le caano' yéetel u chi'e' tu láalaj ja' u ti'al u beetic jun p'éel áalcab ja' ca u jíilt le co'olelo'.

¹⁶Ba'ale' le lu'umo' tu yáantaj le co'olelo', tumen le lu'umo' tu je'aj u chi'e' ca tu yukaj le ja' tu láalaj le caano'.

¹⁷Tu yo'olal lelo' le caano' sen p'u'uj ti' le co'olelo', ca j bin u beet loob ti' u yalab u ch'i'ibal le co'olelo', le máaxo'ob cu dzo'ocbesico'ob u ya'almaj t'aan Kuo' yéetel cu p'áatalo'ob yéetel chuca'an óolal ti' u jaajcunaj Jesucristo.

¹⁸Le caano' j p'at tu jáal le ka'anabo'.