Read Yucateco Apocalipsis 14 Bible Online

Apocalipsis 14 - Yucateco bible

Apocalipsis 14

¹Cu dzo'ocole' j pacatnajene' ca tin wilaj le aj taman wa'alacbal yóokol u pu'uquil Siono'. Tu yéetele' yaan ciento cuarenticuatro mil máaco'ob dzíibta'an tu táan jo'olo'obe' u kaaba' le aj tamano' yéetel u kaaba' u Taata.

²Ca tin wu'uyaj jun p'éel juum ca'an u taalbal, bey u juum ya'abcach ja'obe' yéetel bey u juum ya'abcach bey arpaob táan u pa'axalo'obe'.

³Táan u kayico'ob jun p'éel túumben kay tu táan le jala'ach káanche'o', tu táan le can túul cuxa'an ba'alo'obo' yéetel tu táan le u nuuquilo'ob. Mix máac cu páajtal u canic le kaayo' wa ma' chéen le ciento cuarenticuatro mil toca'ano'ob ti' ichil u cajnáalilo'ob lu'umo'.

⁴Lelo'oba' leti' le máaxo'ob ma' tu kascuntuba'ob yéetel co'olelo'obo', p'áato'ob sujuyo'ob, yéetel táan u bino'ob tu paach le aj tamano' je'el tu'uxac ca xi'ique'. To'oco'ob ti' ichil máaco'obe' bey yáax siibal u ti'al Ku yéetel u ti'al le aj tamano'.

⁵Tu chi'obe' ma' j u'uya'ab u jóokol mix jun p'éel tuusi', mina'an u si'ipilo'ob.

⁶Ca tin wilaj túun u láak ángel táan u xiknal chúumuc le ca'ano' yaan ti'e' le ma'alob péectzil mina'an u xuulo' u ti'al u tze'ect ti' le máaxo'ob caja'ano'ob lu'umo', ti' tuláacal múuch' caajo'ob, jejeláas t'aano'ob, ch'i'ibalo'ob yéetel caajo'ob.

⁷Táan u ka'am a'alic: Ch'a'ex sajaquil ti' Ku yéetel nojbe'encunte'ex u kaaba', tumen dzo'oc u kuchul u kiinil u p'is óol. Kulte'ex le máax beet le ca'ano', le lu'umo', le ka'anabo', bey xan le sayabo'obo'.

⁸Le u ca'a túul ángelo' tu ya'alaj: Dzo'oc u lúubul, dzo'oc u lúubul le nojoch Babiloniao', tumen tu cáalcunsaj tuláacal múuch' caajo'ob yéetel u yuklil u p'u'ujul u kaakas cuxtal.

⁹Tu séeblaquile' le u yóox túul ángelo' tu ka'am a'alaj: Wa máax cu kultic le nojoch ba'alche'o' yéetel cu kultic u yoochele' yéetel cu cha'ic u dza'abal u chíicul tu táan jo'olal wa tu kabe',

¹⁰yaan u yukic u yuklil u p'u'ujul Ku, lela' nu'ucbesa'an x ma' xa'aka'anil tu nu'uculil u p'u'ujul. Yaan u beeta'al u mukyaj ti' káak xa'aka'an yéetel azufre tu táan u quili'ich ángelo'ob Ku yéetel tu táan le aj tamano'.

¹¹U buudzil u mukyaje' cu na'acal u ti'al ja'abo'ob mina'an u xuul. Mina'an je'elel yéetel kiin mix yéetel áakab ti' le máaxo'ob kultic le nojoch ba'alche'o', wa cu kultico'ob u yoochel, wa cu kamico'ob u chíicul u kaaba'.

¹²Tu yo'olal lela', le máaxo'ob quili'icho'obo' yéetel cu dzo'ocbesico'ob u ya'almaj t'aan Junab Ku yéetel cu tzaypachtico'ob Jesús yéetel jaaj óolale', kabéet ti'ob chuca'an óolal.

¹³Tin wu'uyaj túun jun p'éel t'aan ca'an u taal, táan u ya'alic: dzíib lela': Qui' u yóolo'ob bejela'e' tac le kiino'ob cu taalo'obo' le máaxo'ob cu quíimilo'ob u yocsmaj u yóolo'ob ti' Yuumtzilo'. Bey, cu ya'alic le Quili'ich Pixano', tumen cu je'elelo'ob ti' u meyajo'ob, ba'ale' le ma'alob ba'alo'ob u beetmajo'obe' cu p'áatal tu yéetelo'ob.

¹⁴Ca j pacatnajene' ca tin wilaj jun p'éel sac múuyal; tu yóokol le múuyalo' yaan jun túul máax culucbali', lela' chica'an ti' u Paal Máac. Tu poole' yaan jun p'éel péet jo'ol beeta'an yéetel oro, yéetel tu kabe' jun p'éel lóobche' jach yaan u yej.

¹⁵Ti' le kulnajo' jóok u láak ángel táan u ka'am a'alic ti' le máax culucbal yóokol le múuyalo': Jup a lóobche', joochnen; tumen dzo'oc u kuchul u kiinil, u joochil yóokolcaabe' dzo'oc u kantal.

¹⁶Tu séeblaquile' le máax culucbal yóokol le múuyalo' tu jupaj u lóobche' yóokolcaabe' ca tu líi'isaj u joochil yóokolcaab.

¹⁷U láak ángel túune' jóok ti' le kulnaj yaan te j ca'ano', ti' leti'e' yaan xan jun p'éel lóobche' jach yaan u yej.

¹⁸Ti' le u multuunil kultajo' jóok u láak ángel, leti'e' yaan u páajtalil u yóokol káak, ca tu ka'am t'aanaj le ángel ti' máax yaan le lóobche' jach yaan u yejo', táan u ya'alic ti': Jup a lóobche', mol u yich le uva yaan yóokolcaabo', tumen dzo'oc u kantal.

¹⁹Le ángelo' tu jupaj u lóobche' yóokolcaab, tu xotaj u yich u uvail yóokolcaabe', ca tu láalaj ti' jun p'éel nojoch nu'ucul u ti'al ca ye'edzec, lela' cu ye'esic u nojoch p'u'ujul Ku.

²⁰Le uvaobo' ye'edzo'ob paachil ti' le caajo', ti' le nu'ucul tu'ux ye'edzo'obo' jóok ki'ik, lela' kuch u ca'anlile' tac tu jokni' le tzíimino'obo', yéetel u náachile' tac trescientos kilómetros.