Read Yucateco Apocalipsis 15 Bible Online

Apocalipsis 15 - Yucateco bible

Apocalipsis 15

¹Tin wilaj u láak jun p'éel nojoch yéetel jak óol chíicul te j ca'ano': siete ángelo'ob yéetel le u dzo'oc siete núumyajo'obo'; yéetel lelo'oba' cu kuchul tu xuul u p'u'ujul Ku.

²Tin wilaj xan jun p'éel ba'al chica'an ti' jun p'éel sáaskale'en ka'anab xa'aka'an yéetel káak; le máaxo'ob dzo'oc u kuchul u dzáancha'ato'ob le nojoch ba'alche'o' bey xan u yoochelo' yéetel u númeroil u kaaba'e', wa'alacbalo'ob tu tzéel le sáaskale'en ka'anabo' yéetel arpaob dza'an ti'ob tumen Ku.

³Táan u kayico'ob u kay Moisés, u palitzil Ku, yéetel u kaayil le Aj tamano', táan u ya'alico'ob: Nojoch yéetel jakbe'en tuláacal ba'ax a beetmaj, Yuumtzil Ku ti' máax yaan tuláacal páajtalil; tojtac yéetel jaajtac a beelo'ob, u Ajaw múuch' caajo'ob.

⁴¿Máax ma' bíin u ch'a'a teech sajaquilil, Yuumtzil? ¿Máax ma' bíin u nojbe'encunt a kaaba'i? Tumen chéen teech quili'ichech; bíin taalac u kultech tuláacal múuch' caajo'ob, tumen dzo'oc u yila'al jach toj tuláacal ba'ax ca beetic.

⁵Cu dzo'ocol lela' ca tin wilaj u je'epajal te j ca'ano' le quili'ich kulnaj tu'ux líiksa'an u ya'almaj t'aan Ku.

⁶Te j quili'ich cúuchilo' jóoko'ob le siete ángelo'ob cu bisico'ob le siete núumyajo'obo'. U búuco'obe' sac lino táan u léembal. Yaan kaxnak tu tzemo'ob beeta'an yéetel oro.

⁷Tu séeblaquile' jun túul ti' le can túul cuxa'an ba'alo'obo' tu dzáa ti jujun túul ti' le siete ángelo'obo' jun p'éel copa beeta'an yéetel oro chuup yéetel u p'u'ujul Ku, máax cuxa'an u ti'al ja'abo'ob mina'an u xuul.

⁸Le quili'ich cúuchilo' j chu'up yéetel buudz cu taal ti' u nojbe'enil yéetel ti' u páajtalil Ku, yéetel mix máac cu páajtal u yocol te'elo' wa ma' p'is u dzo'ocol le siete núumyajo'ob cu bisa'al tumen le siete ángelo'obo'.