Read Yucateco Apocalipsis 2 Bible Online

Apocalipsis 2 - Yucateco bible

Apocalipsis 2

¹Dzíibnen ti' u iglesiail u ángel Efeso: Bey cu ya'alic le máax yaan le siete eeko'ob tu x no'oj kabilo', le máax cu máan xan ichil le siete x t'uchub sáasilo'ob beeta'an yéetel oroo'.

²Tene' in wojel tuláacal ba'ax ca beetic, in kaj óol a talam meyaj bey xan a chuca'an óolal, in wojel ma' táan u páajtal a mukyajtic le kaakas máaco'obo'. In wojel bix úuchic a túuntic u yóol le máaxo'ob cu ya'alicuba'ob apóstolo'obo', yéetel dzo'oc in wilic ma' leti'obi' ba'ale' chéen táan u tuuso'ob.

³Chúucpaj a wóol, mukyajnaje'ech yéetel meyajnajech ya'ab tin wo'olal, mix jun téen j lúub a wóol.

⁴Ba'ale' yaan teen jun p'éel tac pool ta wo'olal: mina'an teech le yaacunaj yanji teech tu yáax chuune'.

⁵Le o'olale' ka'ajac teech tu'ux lúubech; kex a cuxtal yéetel beet le ba'ax ta beetaj tu yáax chuune'. Wa ma' ta beetic beyo', tu séeblaquil quin taal in lukes a x t'uchub sáasil tu cúuchil, wa ma' ta kexic a cuxtal.

⁶Ba'ale' yaan teech jun p'éel ba'al ma'alob: a p'ectmaj le ba'ax cu beetic le Nicolaitaobo', lela' teen xane' in p'ectmaj.

⁷Le máax yaan u xiquine', ca u yu'ub ba'ax cu ya'alic Quili'ich Pixan ti' le iglesiaobo': Ti' le máaxo'ob cu dzáancha'atic le kaaso' bíin in dzáa u jaant u yich u che'il cuxtal yaan tu cúuchil u qui'imac óolal Ku.

⁸Dzíibnen xan ti' u ángel u iglesiail Esmirna: Bey cu ya'alic le máax u yáax chuun yéetel u xuulo', le máax quíimo' yéetel dzo'oc u ca'a púut cuxtal:

⁹Tene' in wojel tuláacal ba'ax ca beetic; in kaj óol a mukyajo'ob, bey xan a wóotzilil, quex tumen u jaajile ayikalech. In wojel bix u yúuchul t'aan kaas ta wo'olal tumen le máaxo'ob cu ya'alicuba'ob judíob ba'ale' chéen u múuch'cabil u ocsaj óolalo'ob satanás.

¹⁰Ma' u yantal teech sajaquil ti' ba'ax bíin a mukyajte; tumen le kaasil ba'alo' yaan u beetic u ka'alal dze'edzec ti' te'exe' tu yo'olal u túunta'al a wóole'ex tuláacalile'ex; bíin mukyajnaque'ex tu yáam diez kiino'ob. Ba'ale' chuca'anchajac a wóol tac tu kiinil a quíimil, teen túune' bíin in dzáa teech u péet jo'olil cuxtal.

¹¹Le máax yaan u xiquine' u yu'ub ba'ax cu ya'alic Quili'ich Pixan ti' le iglesiobo': Le máax cu dzáancha'atic le kaaso' ma' bíin loobilta'ac tumen le ca'a quíimilo'.

¹²Dzíibnen xan ti' u ángel u iglesiail Pérgamo': Bey cu ya'alic le máax ti' yaan le máascab pupudzquil ca'amat u yejo'.

¹³Tene' in wojel tuláacal ba'ax ca beetic, in wojel xan ti' cajacbalech tu'ux cu dzo'ocbesic u yóol Satanaso', chéen ba'ale' teche' táan a beetic in meeyjul. Ma' a p'at a wocsaj óoltiqueni', mix ti' u kiinilo'ob le ca quiimsa'ab Antipas in jach chuca'an óol jaacunaj, máax quiimsa'ab ichile'ex te tu'ux cajacbal Satanaso'.

¹⁴Ba'ale' yaan teech dze'edzec ba'alo'ob ta wóokol: Yaan teech te Pérgamo dze'edzec máaxo'ob ma' u káat u p'ato'ob u ca'ansaj Balaam, le máax tu tzol xiquintaj Balac ca u beet u kebanchajal le j israelitaob iquil u jaantico'ob le ba'alo'ob kuba'an ti' le beetbil kuo'obo' yéetel iquil u yantalo'ob ti' kaakas cuxtalil.

¹⁵Bey xan yaan teech te'elo' dze'edzec máaxo'ob ma' u káat u p'ato'ob u ca'ansaj le Nicolaitaobo', le ca'ansaj in p'ectmaj.

¹⁶Tu yo'olal lelo' kex a tuucul; tumen wa ma' ta kexique', bin in ca'a tu séeblaquil ta wicnal, bíin ba'atelnaquen xan tu yéetelo'ob yéetel le máascab cu jóokol tin chi'o'.

¹⁷Le máax yaan u xiquine' u yu'ub ba'ax cu ya'alic le Quili'ich Pixan ti' le iglesiaobo': Le máax cu dzáancha'atic le kaaso' bíin in dzáa u jaant le manaj ta'aca'ano'; bíin dzáa xan ti'e' jun p'éel sac tuunich, ti' le tuunicho' dzíiba'an jun p'éel túumben kaaba' mix máac kaj óoltmail wa chéen le máax kamico'.

¹⁸Dzíibnen xan ti' u ángel u iglesiail Tiatira: Bey cu ya'alic u Paal Ku, le máax yaan u yicho'obe' bey u tóoch'bal káake' yéetel u yooco'obe' bey bronce dzidzibquie':

¹⁹Tene' in wojel tuláacal ba'ax ca beetic; in kaj óol a yaacunaj, a wocsaj óolal, a meyaj bejela'e' ma' je'el bix ca'ache'.

²⁰Ba'ale' yaan teen jun p'éel ba'al ta wóokol: tumen ca cha'ic u ca'ansaj le co'olel cu kaaba'itic Jezabel cu ya'alic táan u t'aan tu kaaba' Kuo', ba'ale' chéen táan u tusic in palitzilo'ob yéetel u ca'ansaj u ti'al u beet u nupkebantalo'ob yéetel u jaanto'ob ba'alo'ob kuba'an ti' beetbil kuo'ob.

²¹In dzaamaj ti' leti' kiin u ti'al ca u kex u tuucul, ba'ale' ma' u yóolt u kex u tuucul u ti'al ca u p'at u nupkebani'.

²²Bejela'e' bin in ca'aj in beet u lúubul ti' koja'anil tu kam yéetel ca ya'abchajac u mukyaj le máaxo'ob cu nupkebano'ob tu yéetelo', wa ma' tu kexic u tuuculo'ob ca u p'ato'ob le ba'axo'ob cu beetic leti'o'.

²³Bíin in quiims u paalalo'ob leti'. Beyo' tuláacal le iglesiaobo' yaan u yojéeltico'obe' tene' in kaj óol tac u sen taamil le tuuculo', bey xan u sen taamil le pucsi'ikalo'; ti' jujun túul ti' te'exe' yaan in bo'otic je'el bix a beetmaje'exe'.

²⁴Ba'ale' ti' tuláacal máaxe'ex yane'ex Tiatira, máaxe'ex ma' táan a bine'ex tu paach le ca'ansajo' mix a kaj óoltmaje'ex le ba'axo'ob cu ya'ala'al u ta'acbil ba'alilo'ob Satanaso', quin wa'alic te'exe' ma' táan in dzáic te'ex u láak cuuch.

²⁵Ba'ale' canante'ex le ba'ax yaan te'exo' tac quéen taalaquen.

²⁶Le máax cu dzáancha'atic le kaaso' yéetel cu beetic in meyajo'ob tac tu xuule', bíin in dzáa páajtalil ti'e' yóokol nucuch caajo'ob,

²⁷je'el bix in Taata tu dzaj teen páajtalile', yaan in beetic u jalachil tu yóokol nucuch caajo'obo' yéetel chichich kab, bíin u xe'exet'o'ob je'el bix u xe'exet'a'al katil cuume'.

²⁸Bíin in dzáa xan ti'e' le ja'atzcab kiin eeko'.

²⁹Le máax yaan u xiquine', u yu'ub ba'ax cu ya'alic Quili'ich Pixan ti' le iglesiaobo'.