Read Yucateco Apocalipsis 20 Bible Online

Apocalipsis 20 - Yucateco bible

Apocalipsis 20

¹Cu dzo'ocole' tin wilaj jun túul ángel táan u yéemel ti' ca'an yéetel u llaveil le jach taamcach ch'e'eno', yéetel jun p'éel cadena tu kab.

²Le ángela' tu machaj le nojoch caano', lela' kasilba'al wa Satanás, ca tu kaxaj tu yáam mil ja'abo'ob.

³Ca tu pulaj te jach taamcach ch'e'eno', tu'ux tu kalaj ca tu pakaj u jool, u ti'al ma' u tusic le múuch'; caajo'obo', p'is u máan mil ja'abo'obe'. Cu dzo'ocol u máan le mil ja'abo'obo', yaan u jáalkabta'al dze'edzec kiin.

⁴Cu dzo'ocole' tin wilaj jala'ach káanche'ob, tu'ux culucbalo'ob le máaxo'ob tu kamajo'ob páajtalil u ti'al u p'is óolo'obo'. Tin wilaj xan u pixano'ob le máaxo'ob xo'ot u poolo'ob tu yo'olal u jaajcunajil Jesús yéetel tu yo'olal u t'aan Ku, máaxo'ob ma' tu kultajo'ob le nojoch ba'alche'ob mix u yoochel, mix tu cha'ajo'ob u dza'abal u chíiculal tu táan jo'olo'ob mix tu kabo'ob. Tin wilaje' lelo'oba' j cuxlajo'ob tu ca'a téene' ca tu beetaj u jalachilo'ob yéetel Cristo tu yáam mil ja'abo'ob.

⁵Ba'ale' le u láak quimeno'obo' ma' cuxlajo'ob tu ca'a téeni' p'iis máanic le mil ja'abo'obo'. Lela' leti' le yáax ca'a púut cuxtalo'.

⁶Qui' u yóol yéetel quili'ich le máax yaan u táacpajal ti' le ca'a púut cuxtalo'. Le ca'a quíimilo' mina'an mix jun p'íit u páajtalil tu yóokol lelo'oba', ba'ale' bíin u beet u aj kiinilo'ob u ti'al Ku bey xan u ti'al Cristo, yaan xan u beetic u jalachilo'ob tu yéetel Cristoe' tu yáam mil ja'abo'ob.

⁷Le quéen máanac le mil ja'abo'obo' Satanase' yaan u jáalkabta'al.

⁸Yaan u jóokol u tuus múuch' caajo'ob ti' u yóokolcaabo'. Yaan u jóokol u tuus Gog bey xan Magog, yaan u much'quintic ba'atel máaco'obe' u ti'al u ba'atel, u ya'abilo'obe' bey le sa'am lu'um yaan tu jáal ka'anabo'.

⁹Bey túuno' j na'aco'ob ti' tuláacal u cóochil le lu'umo' ca tu bakpachto'ob u cajtalil le máaxo'ob quili'icho'obo', bey xan le caaj yaabilta'ano'. Ba'ale' Kue' tu beetaj u yéemel káake', ca tu láaj tóocajo'ob.

¹⁰Le kasilba'al máax tuso'obe' j pu'ul ichil u káakil azufre, tu'ux pu'ul le nojoch ba'alche'o' yéetel le tuusil aj bóobato'. Ti' cun mukyajo'ob yéetel kiin bey xan yéetel áakab u ti'al ja'abo'ob mina'an u xuul.

¹¹Tin wilaj túun jun p'éel nojoch sac jala'ach káanche' yéetel máax culucbali'. Tu táane' jun puli' p'áat mina'an le lu'umo' mix le ca'ano', mix tu'ux caxta'abo'ob.

¹²Ca tin wilaj le quimeno'obo', nuuctaco'ob yéetel mejentaco'ob, wa'alacbalo'ob tu táan Ku; ca je'ekabta'ab le libro'obo', je'ekabta'ab xan u láak libro, lela' u libroil le cuxtalo'. Le quimeno'obo' p'is óolta'abo'ob tu yo'olal le ba'axo'ob u beetmajo'obe' je'el bix dzíibta'anil ti' le libro'obo'.

¹³Le ka'anabo' tu kubaj le quimeno'ob yaan ichilo', le quíimilo' yéetel u cúuchil le quimeno'obo' tu kubajo'ob xan le quimeno'ob yaan ti'obo'; tuláacalo'ob p'is óolta'abo'ob je'el bix le ba'alo'ob u beetmajo'obe'.

¹⁴Le quíimilo' yéetel u cúuchil le quimeno'obe' j pu'ulo'ob ichil u káakil azufre. Le káaka' leti' le ca'a quíimilo';

¹⁵ti' j pu'ulo'ob le máaxo'ob ma' dzíibta'an u kaaba'ob tu libroil le cuxtalo'.