Read Yucateco Apocalipsis 22 Bible Online

Apocalipsis 22 - Yucateco bible

Apocalipsis 22

¹Cu dzo'ocole' le ángelo' tu ye'esaj teen jun p'éel áalcab ja' sac u ja'il, lela' u ja'il cuxtal. Sáaskale'en bey cristale' cu jóokol tu jala'ach káanche' Ku yéetel tu jala'ach káanche' le j Tamano'.

²Tu chúumuc kíiwiquil le caajo' yéetel tu can tzéelil le áalcab ja'o' cu ch'íijil u che'il le cuxtalo', cu dzáic doce u yicho'ob. Cada winale' cu dzáic u yich, u le' le che'o' cu meyaj u ti'al u dza'acal le múuch' caajo'obo'.

³Te'elo' ma' bíin yanac loolob t'aani'. U jala'ach káache' Ku yéetel le j Tamano' ti' cun yantal te j caajo'. Yaan u kulta'al Junab Ku tumen u palitzilo'ob.

⁴Bíin u yilo'ob u táan u yich, u kaaba'e' bíin yanac tu táan jo'olo'ob.

⁵Te'elo' ma' bíin yanac áakabi'; le máaxo'ob caja'ano'ob te'elo' ma' bíin kabéetchajac x t'uchub sáas ti'obi', mix u sáasil kiin, tumen Yuumtzil Kue' leti' cun sáasilcuntico'ob. Leti'obe' bíin u beet u jalachilo'ob u ti'al kiino'ob mina'an u xuul.

⁶Cu dzo'ocole' le ángelo' tu ya'alaj teen: Le t'aano'oba' jach tu jaajil u jaajilo'ob. Le Yuumtzile', le Junab Ku cu sáasilcuntic u na'at le aj bóobato'obo', dzo'oc u túuxtic u ángel u ti'al u ye'es ti' u palitzilo'obe' le ba'alo'ob cun úuchul tu séeblaquilo'.

⁷¡Séeba'an in taal! ¡Qui' u yóol le máax cun dzo'ocbesic le dzíibo'ob dzíiba'an ti' le ju'una'!

⁸Teen, Juan, tin wu'uyaj yéetel tin wilaj le ba'alo'oba'. Cu dzo'ocol in wu'uyico'ob yéetel in wilico'obe', j xolajen tu ni' u yooc le ángel e'es teen le ba'alo'oba' u ti'al in kultic.

⁹Ba'ale' leti'e' tu ya'alaj teen: Ma' a beetic lelo'; tumen tene' u palitzilen Ku je'el bix teche' yéetel je'el bix a sucu'uno'ob le aj bóobato'obo', bey xan je'el bix tuláacal le máaxo'ob dzo'ocbesic le t'aano'ob dzíiba'an ti' le ju'una'. Kult Junab Ku.

¹⁰Tu ya'alaj xan: Ma' a ta'aquic u t'aan Ku dzíiba'an ti' le ju'una', tumen dzo'oc u náadzal u kiinil u dzo'ocpajal.

¹¹Ca'aliquile' le máax kasa'ane' p'áatac kasa'anil; le máax kóokole' p'áatac kóokolil; ba'ale' le máax toje' xi'ic u bin u beetic le ba'ax toje', yéetel le máax quili'iche' p'áatac quili'ichil.

¹²Bey, séeba'an in taal; yéetel táan in taasic le siibal quin in dzaj ti' cada jun túulo' je'el bix ba'ax u beetmaje'.

¹³Teen u yáax chúun yéetel u xuul, u cáajbal yéetel u dzoocbal, le Alfao' yéetel le Omegao'.

¹⁴Qui' yóolo'ob le máaxo'ob cu p'o'ic u nooko'ob, u ti'al ca páatac u ti'alintico'ob u yich u che'il le cuxtalo', u ti'al beyo' ca páatac u yocolo'ob tu jool najilo'ob le caajo'.

¹⁵Ba'ale' yaan u p'áatalo'ob táancab le máaxo'ob kaas u cuxtalo'obo', le j pulya'ajo'obo', le j nup kebano'obo', le j quiimsaj wíinico'obo', le cu kultico'ob beetbil kuo'obo', bey xan tuláacal le máaxo'ob u yaabiltmajo'ob le tuuso' yéetel cu tuuso'obo'.

¹⁶Teen, Jesús, dzo'oc in túuxtic in ángel u ti'al u ya'al te'ex tuláacal le ba'alo'oba' te Iglesiaobo'. Teen u ku'uk yéetel u ch'i'ibal ajaw David, teen xan le ja'atzcab eek cu léembalo'.

¹⁷Le Quili'ich Pixan yéetel le Atantzilo' cu ya'alico'ob: Co'oten. Le máax cu yu'ubaje' u ya'al: Co'oten. Le máax ukaje' yéetel u káate', taalac ca u yuk x ma' bo'olile' u ja'il le cuxtalo'.

¹⁸Ti' tuláacal le máaxo'ob cu yu'ubico'ob le t'aano'ob dzíiba'an ti' le ju'una' quin beetic u yojéeltic lela': Wa yaan máax cu tzayic wa ba'ax ti' le ba'alo'oba', Kue' yaan u tzayic ti'e' le núumyajo'ob dzíiba'an ti' le ju'una'.

¹⁹Wa yaan máax cu lukesic wa ba'ax ti' le t'aano'ob dzíiba'an ti' le ju'uno'oba', Kue' yaan u lukesic ti'e' le ba'ax cu ti'alintico' ti' u che'il le cuxtalo' bey xan ti' le quili'ich caajo', je'el bix dzíiba'anil ti' le ju'una'.

²⁰Le máax cu dzáic ojéeltbil le ba'alo'oba' cu ya'alic: Bey séeba'an in taal. Amén. ¡Co'oten, Yuumtzil Jesús!

²¹U siibal utzil c Yuumtzil Jesuse' ca yanac yéetel tuláacale'ex. Amén.