Read Yucateco Apocalipsis 5 Bible Online

Apocalipsis 5 - Yucateco bible

Apocalipsis 5

¹Tu x no'oj kab le máax culucbal te j jalach káanche'o' tin wilaj jun p'éel libro, dzíibta'an tu ca'a tzéelil, kala'an yéetel siete chíiculo'ob.

²Tin wilaj jun túul mu'uka'an ángel táan u káatic yéetel ka'am t'aan: ¿Máax cu najmatic u je'ic le libro yéetel u jatic le chíiculo'ob?

³Ba'ale' mix te j ca'ano' mix te j lu'umo' mix te yáanal le lu'umo' yanji máax ca páatac u je'ic le libro mix u pactic.

⁴Tene' sen okolnajen tumen ma' caxta'ab mix máac ca u najmat u je'ic le libroo' mix u xoquic, mix u pactic.

⁵Ba'ale' jun túul ti' le u nuuquilo'ob u caajil Israel tu ya'alaj teen: Ma' wokol, tumen u leónil u chi'ibalil Judá, le máax taal ti' u ch'i'ibal ajaw Davide', dzo'oc u dzáancha'atic le kaaso' u ti'al ca páatac u je'ic le libro yéetel u jatic le siete chíiculo'ob.

⁶Tin wilaj jun túul j taman wa'alacbal chúumuc ti' le jalach káanche'o', bakpachta'an tumen le ca'a túul cuxa'an ba'alo'obo' yéetel tumen le u nuuquilo'ob u caajil Israel. Le j tamano' yaan u chíiculal ti' tu'ux quiimsa'abi. Yaan siete u dzíitil u baac yéetel siete u p'éelel u yich; le u yicho'obo' u siete pixano'ob Ku túuxta'ano'ob ti' tuláacal yóokolcaab.

⁷Le j tamano' náadze' ca tu ch'a'aj le libro yaan tu x no'oj kab le máax culucbal te jalach káanche'.

⁸Le ca tu ch'a'a le libroo', le ca'a túul cuxa'an ba'alo'ob yéetel le veinticuatro u nuuquilo'ob u caajil Israel xolajo'ob actáan ti' le j tamano'. Tu ju jun túul u nojchil u caajil Israele' yaan jun p'éel arpa ti', yaan ti'ob xan copaob beeta'an yéetel oro, chuuptac yéetel incienso, lela' u payalchi'ob le máaxo'ob quili'icho'obo'.

⁹Táan u kayico'ob le túumben kaaya': Teche' a najmatic a ch'a'ic le libroo' yéetel a jatic u chíiculo'ob; tumen quiimsabech, yéetel a ki'ikele' ta manajo'on u ti'al Ku ti' tuláacal ch'i'ibal, táan, caaj, bey xan u múuch'ul caaj.

¹⁰Dzo'oc a beetico'on ajawo'on yéetel j kiino'on u ti'al c Ku, yaan c beetic c jalachil tu yóokolcaab.

¹¹Cu dzo'ocole' j paacatnajen, ca tin wu'uyaj u t'aan ya'abcach ángelo'ob ti' yano'ob tu bakpach le jalach káanche'o', yéetel tu táan le cuxa'an ba'alo'obo' yéetel u nuuquilo'ob u caajil Israelo'. Ti' yaan u millonesil yéetel u millonesil ángelo'ob,

¹²táan u ka'am a'alico'ob: Le j Taman quiimsa'ab ca'acho' cu najmatic u kamic le páajtalilo', le ayikalilo', le na'atilo', le muukilo', le tziiquilo', le nojbe'enilo' yéetel le qui'iqui' t'aanilo'.

¹³Tin wu'uyaj xane' tuláacal le ba'alo'ob u beetmaj Kuo', le yano'ob te j ca'ano', te j lu'umo' yéetel tu yáanal le lu'umo', bey xan le yano'ob ka'anabo' yéetel tuláacal le ba'axo'ob yaan ti'obo' táan u ya'alico'ob: Le qui'iqui'it'aano', le tziiquilo', le nojbe'enilo' yéetel le páajtalilo' dza'abac ti' le máax culucbal te jalach káanche'o' yéetel ti' le j tamano' u ti'al ja'abo'ob mina'an u xuul.

¹⁴Le can túul cuxa'an ba'alo'obo' táan u ya'alico'ob: ¡Amén! Le veinticuatro u nuuquilo'ob u caajil Israelo' j xolajo'obe' ca tu kultajo'ob le máax cuxa'an u ti'al ja'abo'ob mina'an u xuulo.