Read Yucateco Rut 1 Bible Online

Rut 1 - Yucateco bible

Rut 1

¹Le ba'ax cu tzicbalta'ala' j úuch tu kiinilo'ob cu méektáano'ob tu lu'umil Israel aj nu'ucbesaj ba'atelo'ob, ti' u kiinilo'ob yanchaj wi'ij tu yóokol tuláacal le lu'umilo'obo'. Jun túul j xiib j Belenil tu lu'umil Judá cu kaaba'intic ca'ach Elimelec, j bin cajtal dze'edze'ec kiino'ob tu lu'umil Moab. J bin tu yéetele' u yatan cu kaaba'intic ca'ach Noemí, yéetel ca'a túul u paalal, Mahlón yéetel Quelión. Tuláacalo'obe' efratailo'ob[1] u káat u ya'ale' j Belenilo'ob. kucho'ob túun Moab, ca j p'áato'ob cajtali'.

³Jun p'éel kiine' quíim Elimelec, u yíincham Noemí, ca j p'áat Noemí tu juunal yéetel ca'a túul u paalal.

⁴Cu máan kiine', leti'obe' j dzo'oc u beelo'ob yéetel ca'a túul co'olelo'ob x moabilo'ob; jun túule' cu kaaba'intic ca'ach x Orfa u láak jun túule' cu kaaba'intic ca'ach x Rut. Le ca j máan diez ja'abo'obe',

⁵Mahlón yéetel Quelione', j quíimo'ob xan, ca j p'áat túun Noemí x ma' íicham bey xan x ma' paalal.

⁶Jun p'éel u kiinile' Noemie' tu yu'ubaj u ya'ala'al; Moabe', Yuumtzile' dzo'oc ca'ach u beetic utz ti' u caajal, let o'olale' dzo'oc u máan u kiinil wi'ij tu caajil Israel.

⁷Tu nu'ucbesubáa túune' u ti'al u suutbal tu caajil Judá láakinta'an tumen u yilibo'ob, jóoko'ob Moab te tu'ux ca'ach caja'ano'obo'.

⁸Ba'ale' x Noemie' tu ya'alaj ti'ob te j bejo': U'uye'ex, suunene'ex ta wotoche'ex u ti'al ca cajlaque'ex yéetel a maamaex. Yuumtzil ca u beet ti' te'ex utz, je'el bix te'ex ta beetaje'ex utz ti' teen yéetel ti' in paalal.

⁹U yóolt Yuumtzil ca dzo'ococ a beele'ex tu ca'a téen yéetel ca yanac ti' te'ex jun p'éel qui'imac óol otoch. Cu dzo'ocole' x Noemie' tu dzaj ti'ob jujun p'éel u dzu'udzil ca xi'ic utzil ti'ob, leti'ob túune' jo'op' u yokolo'ob.

¹⁰Ca tu ya'alajo'ob ti': ¡Ma', To'one' táan c bin ta wéetel ta caajal!

¹¹X Noemie' tu ca'a a'alaj: In x ch'upul paale'ex suunene'ex ta wotoche'ex. ¿Ba'ax u biilal ca taque'ex tin wéetel? Tene' ma' bíin yanac u láak in j xibil aalo'ob u ti'al ca dzo'ococ a beele'ex yéetelo'obi'.

¹²Suunene'ex ta wotoche'ex. Tene' jach x núuquen u ti'al ca dzo'ococ in beel tu ca'a téen. Yéetele' quex wa ca páatac, u ca'a dzo'ocol in beel ti' le áakaba', ca kuchuc yantal in paale',

¹³¿te'exe' je'el wa a pa'atiquexo'ob tac quéen nuucchajaco'ob u ti'al ca dzo'ococ a beele'ex tu yéetelo'obe'? ¿Je'el wa a p'áatale'ex x ma' dzo'ocol beel iquil a pa'atique'exo'obe'? Ma' in x ch'upul paale'ex, lela' ma' tu páajtal u yúuchul beyo'. Yuumtzile' tu cha'aj in sen mukyaj, ba'ale' in yaj óolale' je'el u asab ya'abtal wa ca in wil a mukyaje'exe'.

¹⁴Leti'ob túune' jo'op' u ca'a okolo'ob. Tu yo'olal u sen a'alique' x Orfae' tu dzu'udzaj u maama u yíichame' ca j suunaj tu yotoch. Ba'ale' x Rute' j p'áat tu yéetel.

¹⁵Noemí túune' tu ya'alaj ti': Ile, ba'ale' táan u suut tu caajal yéetel ti' u kuob. Bey xan teech xeen tu yéetel.

¹⁶Ba'ale' Rute' tu núucaj: ¡Ma' a káat óoltic ti' teen ca in p'atech yéetel ca in jun páycuntiquinbáa ti' teech! Tene' bíin xi'iquen je'el tu'uxac ca xi'iqueche' bíin cajlaquen xan je'el tu'uxac ca cajlaqueche'. A caajale' leti' bíin in caajalte, a Junab Kue' leti' xan bíin in Kuinte.

¹⁷Bíin quíimiquen tu'ux bíin quíimiquech, ti' xan in káat ca mu'ucuqueni'. Chéen quíimil bíin páatac u jun páaycuntico'on. ¡Yuumtzile' ca u yayaj jadzen wa ca in jun páaycuntimbáa ti' teech tu yo'olal mix ba'al!

¹⁸Le ca tu yilaj x Noemí jach tu jaajil ti' u yóol x Rut j bin x yéetele', ma' tu ca'a a'alaj mix ba'al ti'i'.

¹⁹Beyo', tu ca'a túulalo'obe' j xíimbalnajo'ob tac Belén. Le ca j kucho'obe', tuláacal le caajo' ja'ak u yóolo'ob. Le co'olelo'obo' táan u ya'alico'ob: ¿Ma' wa x Noemí lela'?

²⁰Ba'ale' leti'e' cu núuquic ti'ob: Bejela'e' ma' a wa'alique'ex ti' teen Noemí: A'ale'ex teen Mara, tumen Ku ti' máax yaan tuláacal páajtalile' dzo'oc u chupiquen yéetel káajil.[2]

²¹Ya'ab ba'al yaan ti' teen ca jóoken waye', Ba'ale' Yuumtzile' dzo'oc u beetic in suut mix ba'al yaan ti' teen. ¿Ba'axten ca wa'alique'ex ti' teen Noemí, wa Yuumtzil ti' máax yaan tuláacal páajtalil dzo'oc u jadziquen yéetel tu beetaj u yajchajal in wóol?

²²Bey túun x Noemie' j luk tu caajil Moab yéetel x Rut u yilib x moabil. Kucho'ob Belén tu kiinil ca'ach táan u cáajal u joochil le cebadao'.