Read Yucateco 1 Samuel 1 Bible Online

1 Samuel 1 - Yucateco bible

1 Samuel 1

¹Ti' jun p'éel cúuchil ti' u pu'uquilo'ob Efraín, cu kaaba'intic Ramae', cajacbal ca'ach jun túul j xiib sijnal tu yotoch Suf, cu kaaba'intic Elcana. U paal ca'ach Jeroham u yáabil Eliú. Leti'e' u j ca'a áabil Tohu u paal Suf, sijnal tu ch'i'ibalo'ob Efraín.

²Elcanae', yaan ca'ach ca'a túul u yatano'ob. Jun túule' cu kaaba'intic ca'ach x Ana, u láake', x Penina. X Peninae' yaan ca'ach u paalalo'ob, ba'ale' x Anae' mina'an mix jun túul ti'i'.

³Ja'abenja'ab cu lukul ca'ach Elcana tu caajale', cu bin tu caajil Silo u kult yéetel u táambes quíimsbil ba'alche'ob ti' Yuumtzil máax ti' yaan tuláacal páajtalil. Te'elo', yaan ca'ach ca'a túul u paalal aj kiin Elí, cu kaaba'intico'ob Ofni yéetel Finees leti'ob xane' u aj kiino'ob Yuumtzil.

⁴Le quéen xi'ic ca'ach Elcana u táanbes quíimsbil ba'alche'obe', cu dzáic ti' x Penina yéetel ti' u j xibil paalal bey xan ti' u x ch'upul paalal le buca'aj janal cu ti'alintico'obo',

⁵ba'ale' ti' x Anae' cu dzáic le buca'aj u jóokesmaj chéen u ti'al x letio', tumen jach u yaabiltmaj quex tumen Yuumtzil ma' tu yóoltic ca'ach ca yanac u paalo'ob.

⁶Tu yo'olal lelo', x Penina máax x éet atan x yéetele', cu sen chi'ichnacuntic yéetel cu p'a'astic, tu yo'olal lelo' cu beetic u okom óolta'al tumen ma' tu yóoltic Yuumtzil ca yanac u paal.

⁷Tu jujun ja'ab u ti'al ca'ach u binbalo'ob tu kulnaj Yuumtzile', cu chi'ichnancunta'al tumen x Penina; let o'olal x Anae' cu sen okol, ma' xan tu janal.

⁸Cu ya'ala'al ca'ach túun ti' tumen Elcana u yíicham: ¿X Ana ba'axten ca wokol? ¿Ba'axten luba'an a wóol, mix xan ta janal? ¿Ma' wa asab utzil a ti'alintmailen ti' diez a paalo'obi'?

⁹Jun téenac ca'aliquil ti' yano'ob Siloe', x Anae' j líik cu dzo'ocol u janal. Aj kiin Elie' culucbal ca'ach ti' jun p'éel noj káanche' naadz ti' u jool najil u kulnaj Yuumtzil.

¹⁰X Ana ca'aliquil táan u yokol yéetel yaayaj óole', jo'op' u payalchi' ti' Yuumtzil

¹¹ca tu beetaj le séebchi'a': Yuumtzil ti' máax yaan tuláacal páajtalil: Wa ca beet utz a pactic u mukyaj a x palitzil u ti'al ca ka'ajaquen ti' teech tu yo'olal a dzáic teen jun túul in j xibil paale', tene' bíin in jun páaycunt tuláacal u kiinilo'ob u cuxtal u ti'al u meyajtech, cu dzo'ocole' u ti'al u chíiculal le jun páaycunajo' ma' bíin ko'osoc u tzo'otzel u pooli'.

¹²Ba'ale' bey x Ana sen xáanchaj táan u payalchi'e', j pacta'ab u chi' tumen Elí;

¹³ba'ale' leti'e', táan ca'ach u x mucul payalchi'. Ma' tu yu'uba'al ca'ach u t'aan; chéen u chi' cu yila'al u péec. Elí túune' tu tucultaj x cala'an ca'ache'

¹⁴ca tu ya'alaj ti': ¿Ba'ax kiin bíin jáawac a cáaltal? ¡P'at a wukic le vinoo'!

¹⁵X Anae' tu núucaj: Ma' cala'aneni' in yumen, wa ca wiliquen beya' ma' tumen wa in wukmaj vinoi', mix in wukmaj ba'ax cu cáalcunaj ba'ale' quin wu'uyquimbáa sen yaj in wóol, táan in jóokesic u yajil in wóol tu táan Yuumtzil.

¹⁶Ma' a tucultic wa x kaakas co'olelen, ba'ax cu yúuchule' táan in sen payalchi', tumen ma' utz in wóol in wu'uyiquimbái' sen yaj in wóol.

¹⁷Elie' tu núucaj: Xi'ic teech utzil, beyxan ca u dzáa ti' teech u Ku Israel ba'ax dzo'oc a káatic ti'.

¹⁸Anae' tu núucaj: Ku bíin u bo'ot ti' teech. Cu dzo'ocole' x Anae' j suunaj tu'ux u lukbale', ca j bin janal, mix jun téen j suunaj yaj óoltal.

¹⁹Tu ja'atzcabil u láak kiine' j líiko'ob ma' qui' sáaschajaqui', cu dzo'ocol u kultico'ob Yuumtzile' j suunajo'ob tu yotocho'ob, tu lu'umil Ramá. Cu dzo'ocole' Elcanae' tu nupubáa yéetel x Ana, Yuumtzil xane' j ka'aj ti' u káat óol x Ana.

²⁰X Anae' x yo'omchaji, le ca tu chucaj u kiinil u síijsic u paale' tu dzáa u kaaba'int Samuel,[1] tumen káatbil tu beetajil ti' Yuumtzil.

²¹Cu dzo'ocole' Elcanae', j bin tu lu'umil Silo yéetel tuláacal u yotoch u dzo'ocbes u séebchi' yéetel u táanbes u quíimsbil ba'alche'il le ja'abo';

²²ba'ale' x Anae' ma' j bini' tumen tu ya'alaj ti' u yíicham: Ma' bíin xi'iquen ma'ili' in lukes u chu'uch le chan xi'ipalo'. Cu dzo'ocole' bíin in bis u ti'al in jun páaycunt ti' Yuumtzil u ti'al ca p'áatac junpuli' te'elo'.

²³Elcana u yíichame', tu núucaj ti': Beet je'el bixac ca tucultique'. P'áaten a pa'at u kuchul u kiinil a lukesic u chu'uch. Yuumtzil ca u dzo'ocbes u séebchi'. Beyo' leti'e' j p'áat u tzéent u yaal tac ca tu pa'ataj u kuchul u kiinil u lukesic u chu'uch.

²⁴Le ca tu lukesaj u chu'uch le chan paal, ca'aliquil chichano', tu bisaj tu kulnaj Yuumtzil tu lu'umil Silo. Tu bisaj xan óox túul mejen wacax, veinte yéetel ca'a p'éel u wuudzil trigo, yéetel jun chúuj vino.

²⁵J quíimsa'ab túun jun túul le chan wacaxo', ca j ku'ub le chan j xi'ipal ti' Elio'.

²⁶X Ana túune' tu ya'alaj ti': Sa'ates in si'ipil in yumen, ba'ale' jach tu jaajil je'el bix cuxa'anilecho', bey tu jaajil teen le co'olel payalchi'inaj ti' Yuumtzil naadz ti' teche'.

²⁷Tin káataj ti' Yuumtzil ca u dzáa ti' teen le j xibil paala', leti'e' tu dzáa ti' teen.

²⁸Teen xane' dzo'oc in jun páaycuntic ti' Yuumtzil, tuláacal u kiinilo'ob bíin cuxlaque', jun páaycunta'an u ti'al Yuumtzil. Elí túune' noclaj lu'um tu táan Yuumtzil.