Read Yucateco 1 Samuel 10 Bible Online

1 Samuel 10 - Yucateco bible

1 Samuel 10

¹Cu dzo'ocole' Samuele' tu cha'aj jun p'éel chan nu'ucul chuup yéetel aceitee', ca tu wecaj tu pool Saule', ca tu ya'alaj ti': Yuumtzile' cu jun páaycuntiquech bejela'a u ti'al u méektáanil u caajal Israel. Teech bíin méektáantic u ti'al a toc tu kab u aj p'eeco'ob baakpachmailo'. Je'el u chíiculal dzo'oc u jun páaycuntiquech Ku u ti'al a méektáant u caajala':

²Le quéen lukuquech tin wicnale', bíin a nuptáant ca'a túul j xiibo'ob naadz ti' u mucnal Raquel, tu lu'umil Selsa tu lu'umilo'ob Benjamín. Leti'obe' bíin u ya'alo'ob ti' teech dzo'oc u nactáanta'al le x burraob joka'anech a caxto'obo', a taatae', ma' tu tucultic le x burraobo', ba'ale' táan u tuucul ta wo'olale'ex, bey xan táan u káat chi'itic tu baatzil ba'ax bíin u beet ta wo'olal.

³Cu dzo'ocole' le quéen kuchquech tu béequil Tabore', bíin jóokoc u kamech óox túul j xiibo'ob cu na'acalo'ob Betel u kulto'ob Ku. Jun túul ti'obe' táan u bisic óox túul j yuuco'ob, u láake' óox p'éel waajo'ob, u yóox túule' jun chúuj u kéewelil vino.

⁴Bíin u tziquecho'ob bíin xan u dza'ob ti' teech ca'a p'éel waajo'ob. Kam ti'ob.

⁵Cu dzo'ocole' bíin kuchuquech Gabaa u ti'al Ku, tu'ux yaan jun múuch' aj ba'atelo'ob j filisteob. Le quéen oocoquech te j caajo' bíin a nuptáant jun múuch' aj bóobato'ob táan u tze'eco'ob ca'aliquil táan u yéemelo'ob te j quili'ich najo'. Táanil ti'ob bíin xi'ic máaco'ob táan u paxico'ob salteriob, pandero'ob, flautaob, yéetel arpaob.

⁶U pixan túun Yuumtzile' bíin u ch'a'ech u ti'al ca tze'ecnaquech je'el bix leti'obe', bíin a sutabáa yanal j xiibil.

⁷Le quéen úuchuc ti' teech le ba'alo'oba' beet le ba'ax bíin a tucult utze', tumen Ku bíin u yáantech.

⁸Cu dzo'ocole' xeen táanil ti' teen Gilgal, tu'ux bíin in much'ajinbáa ta wéetel u ti'al ca in táanbes le ba'alche'ob cu láaj tóocalo'obo', bey xan u quíimsbil ba'alche'ilo'ob ca'a bisajbáil. Pa'at siete kiino'ob te'elo', le quéen kuchquene', quin wa'alic ti' teech ba'ax bíin a beete.

⁹Tu séeblaquil úuchic u lukbal Saúl tu yicnal Samuel u ti'al u binbale', j ke'ex u pucsi'ikal tumen Ku; ti'ili'e' kiino' úuchla'aj tuláacal le chíiculalo'obo'.

¹⁰Cu dzo'ocole', le ca j kuch Saúl yéetel u palitzil Gabae', le múuch' aj bóobato'ob táan u tze'eco'obo', jóoko'ob u ti'al nuptáantico'ob. U pixan túun Kue', j ooc ti' Saule', ca j jo'op' u tze'ec je'el bix leti'obe'.

¹¹Ba'ale' le ca j ila'ab táan u tze'ec ichil le aj bóobato'ob tumen le máaxo'ob kaj óoltmaile', jo'op' u ya'alico'ob tu baatzilo'ob: ¿Ba'ax cu yúuchul ti' u paal Cis? ¿Tac xan Saúl jun túul aj bóobat?

¹²Jun túul ti' leti'obe' tu ya'alaj: ¿Máax túun u aj ca'anbesajo'ob? Ti' cu taal le t'aan cu ya'alic: ¿Saule' jun túul aj bóobat xan?

¹³Cu dzo'ocol u máan le súutuc táan le tze'eco', Saule' j kuch tu yotoch.

¹⁴U dzeyuume' tu káat chi'itaj ti' leti' yéetel ti' u palitzil: ¿Tu'ux bine'ex? Saule' tu núucaj: J bino'on u ti'al c caxant le x burraobo'. Ba'ale' le ca t ilaj ma' tu chíicpajlo'obe', j bino'on c ila'a Samuel.

¹⁵U dzeyuum Saule', tu ya'alaj: Beet utz a tzicbaltic ti' teen ba'ax tu ya'alaj.

¹⁶Saule' tu núucaj ti' u dzeyuum: Tu ya'alaj ti' to'on dzo'oc u caxta'al le x burraobo'. Ba'ale' Saule', ma' tu tzicbaltaj mix ba'al ti' u dzeyuum ti' le ba'ax j a'ala'ab ti' tumen Samuel tu yo'olal le ajawilo'.

¹⁷cu dzo'ocole' Samuele' tu t'anaj le j israelitaob u ti'al u kulto'ob Yuumtzil tu lu'umil Mizpa.

¹⁸Te'elo' tu ya'alaj ti'ob: Yuumtzil u Junab Ku Israele', cu ya'alic: J israelile'ex teen tin jóokese'ex Egipto, le ca tin tocaje'ex tu kab le j egipciob yéetel tu kab tuláacal le múuch' caajo'ob yedzmaile'exo'.

¹⁹Ba'ale' bejela'e', te'exe' ca kéex óoltique'ex a Kuex le máax tu tocaje'ex ti' tuláacal a talam mukyaje'ex yéetel a yaayaj óolale'exe', ca dzáique'ex jun tzéelil u ti'al a káatique'ex ca dza'abac jun túul ajaw u ti'al méektáantique'ex. Bey túuno' dzáaba'ex tu táan Yuumtzil tuláacal u múuch' cajtalilo'ob a láaktzilile'ex yéetel u láaktzililo'ob a cajtalile'ex.

²⁰Cu dzo'ocole' Samuele', tu túuchi'itaj ca u nadzajubáa tuláacal u ch'i'ibalo'ob Israele', ca j lúub le buul tu yóokol u cajtalil u láaktzililo'ob Benjamín.

²¹Cu dzo'ocole' tu túuchi'itaj ca u nadzajuba'ob u múuch' cajtalil u láaktzililo'ob Benjamine', ca j lúub le buul tu yóokol u láaktzililo'ob Matri, cu dzo'ocol le buulo', j lúub yóokol Saúl u paal Cis. Chéen ba'ale' le ca j jo'op' u caxta'ale', ma' j nuptáanta'abi',

²²bey túuno' ca'a káatajnajo'ob ti' Yuumtzil u ti'al u sáasilcunta'al ti'ob tu'ux yaan. Yuumtzile' tu ya'alaj ti' yaan naadz ti'obe', chéen ba'ale' u ta'acbesmajubáa ichil u to'ilo'ob cuuch.

²³J bino'ob túun áalcabil u jóokeso'ob tu'ux u ta'acbesmajubáa. Le ca tu ye'esubáa Saúl tu táan le caajo', j ila'ab mix jun túul j israelita cu píit máan tu queléembal.

²⁴Samuele' tu káat chi'itaj ti' tuláacalo'ob: ¿Dzo'oc a wilique'ex máax yéeya'ab tumen Yuumtzil u ti'al u beet u ajawil? ¡Mina'an mix jun túul j israelita je'el u queticubáa tu yéetele'! Le j israelitaobo' tu ya'alajo'ob: ¡Xi'ic utzil ti' c ajaw!

²⁵Tu séeblaquile', Samuele', tu tzol t'antaj ti' le caaj u ya'almaj t'aanilo'ob le ajawo', ca tu dzíibtaj ti' jun p'éel ju'une', ca tu dzaj tu quili'ich naj Yuumtzil. Cu dzo'ocole' Samuele', tu túuchi'itaj ti' tuláacalo'ob ca suunaco'ob tu yotocho'ob.

²⁶Tac Saúl xane' j bin tu yotoch yaan Gabaa, ba'ale' Yuumtzile' tu dzaj tu tuucul dze'edzec j xiibil máaco'ob u ti'al láakintic.

²⁷Ba'ale' yanchaj aj tac t'aano'ob u ya'alo'ob beya': ¿Leti' wa le máac bíin toquico'ona'? Leti'obe' tu p'a'astajo'ob ma' tu chíinpooltajo'obi', ba'ale' Saule' tu beetaj bey ma' tu yilaje'.