Read Yucateco 1 Samuel 11 Bible Online

1 Samuel 11 - Yucateco bible

1 Samuel 11

¹Nahas u ajawil Amone', j bin Jabes Galade' ca tu nu'ucbesaj u aj ba'atelo'ob u ti'al u ba'ateltico'ob le caajo'. Ba'ale' u caajnáalilo'ob Jabese' tu ya'alajo'ob ti': Beet jun p'éel nup t'aan t éetele' ca c meyajtech.

²Nahas le j amonitao' tu núucaj: Bíin in beet jun p'éel nup t'aan ta wéetele'ex, chéen wa ca wóoltique'ex ca in ch'óopquint u x no'oj ich tu jujun túulile'ex u ti'al in sublancuunsic Israel.

³U nuuquilo'ob Jabes túune' tu núucajo'ob: Dzáa to'on siete kiino'ob u ti'al c túuchi'itic aj bisaj t'aano'ob tuláacal u lu'umilo'ob le j israelitaobo'; wa mix máac cu yóoltic taal u yáantone', c kubicbáa ti' teech.

⁴Le aj bisaj t'aano'obo' j kucho'ob Gabaa tu'ux cajacbal ca'ach Saule', ca tu dzajo'ob le péectzil ti' le caajo'. Tuláacalo'ob jo'op' u yaayaj okolo'ob.

⁵Ca'aliquil táan u yúuchul lelo' Saule' táan ca'ach u suut te j káax yéetel u wacaxo'obo', ca tu káat chi'itaj: ¿Ba'ax cu yúuchul ti' le caajo'? ¿Ba'axten cu yokolo'ob? Le caajo' tu tzicbaltaj tuláacal le péectzil j taasa'ab tumen u caajnáalilo'ob Jabeso'.

⁶Le ca tu yu'ubaj Saúl le péectzilo', j cha'ab tumen u pixan Kue', ca sen p'u'uji.

⁷Tu ch'a'aj túun ca'a túul wacaxo'obe' ca tu jóokesaj u xéexet'alo'obe' ca tu túuchi'itaj dze'edzec aj bisaj t'aano'ob u biso'ob u xéexet'al ti' tuláacal u lu'umilo'ob le j israelitaobo'. Le aj bisaj t'aano'obo' bin u ya'alico'ob: Bey bíin beeta'ac ti' u wacaxo'ob le máax ma' tu nupicubáa ti' Saúl yéetel ti' Samuel, u ti'al j bin tu paacho'obe'. Sen sajacchaj le máaco'obo', ca jóoko'ob bey jun túulili' máac u much'uba'ob tu yéetelo'obe'.

⁸Le ca tu xocaj Saúl le máaco'ob tu lu'umil Beseco', dzo'oc ca'ach u chuquic trecientos mil u j xiibilo'ob Israel yéetel treinta mil u j xiibilo'ob Judá.

⁹Cu dzo'ocole' ca tu ya'alaj ti' le aj bisaj t'aano'ob j ta'alobo': A'ale'ex ti' u caajnáalilo'ob Jabes chúumuc kiin sáamal c toquico'ob. Le aj bisaj t'aano'obo j bino'ob u dza'ob le péectzil ti' u caajnáalilo'ob Jabes, leti'obe' sen qui'imacchaj u yóolo'ob.

¹⁰Ca tu ya'alajo'ob ti' Nahas: Sáamal c kubicbáa ti' te'ex ca a beete'ex to'on le ba'ax a káate'exe'.

¹¹Tu láak kiine' Saule' tu nu'ucbesaj u aj ba'atelo'ob óox jaatzul, ca'aliquil ma' sáaschajque' ca j ooco'ob chúumuc tu'ux jelecbal le aj p'eecobo', ca tu beetajo'ob ti' le j amonitaob jun p'éel nojoch quíimsaj tac u kuchbal chúumuc kiino'. Le j p'áato'ob cuxa'ano'obe' ki'itpajo'ob, ma' p'áat mix jun múuch' ti'obi'.

¹²Cu dzo'ocol lelo', jujun túul ti' le caajo' tu ya'alajo'ob ti' Samuel: ¿Máaxo'ob ma' tu táan óolto'ob Saúl u ti'al u beeticubáa ajawi'? Kube'ex to'on le j xiibo'ob u ti'al c quíimso'obo'.

¹³Ba'ale' Saule' j t'aanaje' ca tu ya'alaj: Ti' le' kiina' mix máac bíin quíimic, tumen Bejela'e', Yuumtzile' dzo'oc u toquic Israel.

¹⁴Samuele' tu ya'alaj ti' tuláacalo'ob: Cone'ex Gilgal u ti'al u chúunul u beeticubáa ajaw.

¹⁵Bey túuno' tuláacal le caajo' j bin Gilgal, te tu táan Yuumtzilo', j dzaab Saúl u beet u ajawil. Cu dzo'ocole' j táanbesa'ab ti' Yuumtzil u quíimsbil ba'alche'ilo'ob ca'a bisajbáil, ca sen qui'imacchaj u yóol Saúl yéetel le j israelitaobo'.