Read Yucateco 1 Samuel 13 Bible Online

1 Samuel 13 - Yucateco bible

1 Samuel 13

¹Saule' dzo'oc ca'ach u nojoch wíinictal ca j chu'un u beetic u ajawil tu caajilo'ob Israel; dze'edzec ja'abo'ob jo'op'oc u beetic u ajawile',

²tu yéeyaj tres mil aj ba'atelo'ob ichil le j israelitaobo'. Dos mil ti'obe', j p'áat tu yicnal tu caajil Micmas yéetel tu pu'uquilo'ob Betel, u láak mile' j p'áato'ob tu yicnal Jonatán tu caajil Gaaba tu lu'umil Benjamín. U chuucáan le máaco'obo', j a'ala'ab ti'ob tumen Saúl ca suunaco'ob tu yotocho'ob.

³Jonatane', tu láaj pa'aj le cúuchilo'ob tu'ux cu canantico'ob ca'ach le j filisteob le yano'ob ca'ach Gabao', ca j kuch ojéeltbil tumen le j filisteobo'. Saúl túune' tu túuchi'itaj ca jóopsa'ac paaxo'ob ti' tuláacal u lu'umil Israel, u ti'al ca u dzáa u yojéelt le hebreob le ba'ax cu yúuchulo'.

⁴Tuláacal le j israelitaob tu yojéeltajo'ob dzo'oc u pa'abal tumen Saúl u muuk le j filisteob canantic le caajo', tu yo'olal lelo' sen p'ecta'ab le j israelitaob tumen le j filisteobo', le j israelitaob túuno' tu much'ajuba'ob tu yéetel Saúl tu caajil Gilgal.

⁵Le j filisteob xano' tu much'ajuba'ob u ti'al j ba'atel tu yéetel le j israelitaobo'. Yaan ca'ach treinta mil u bolanilo'ob u ba'atelo'ob, seis mil u aj ba'atelo'ob cu nat' tzíimino'ob, yéetel le xíimbal oquil aj ba'atelo'obo', ya'abo'ob bey u sa'am lu'umil ka'anabe'. Cu dzo'ocole' j bino'ob tu caajil micmase', ca tu dzajo'ob u cúuchil u je'elelo'ob tu lakin Bet-avén.

⁶Le j israelitaobo' jach yaj tu yiljiluba'ob, iquil u ba'atelta'abico'ob tumen le j filisteobo', ca j yanchaj u ta'acbesicuba'ob ti' áactuno'ob yéetel ti' joolo'ob, bey xan tu yáan tuunicho'ob, ti' páambil lu'umo'ob yéetel ti' ch'e'eno'ob.

⁷Ya'ab ti' leti'obe' tu ch'actajo'ob Jordán, tu tojil Gad yéetel Galad, ba'ale' Saule' j p'áat Gilgal yéetel tuláacal u aj ba'atelo'ob cu bino'ob tu paach chuupo'ob yéetel sajaquil.

⁸Te'elo' Saule' tu pa'ataj siete kiino'ob le buca'aj u ya'almaj Samuele'; tu yo'olal ma' tu kuchul ca'ach Samuel Gilgale', jo'op' u p'a'atal tumen le máaco'obo'.

⁹Saúl túune' tu ya'alaj: Taase'ex ti' teen le ba'alche'ob u ti'al láaj tóocbil yéetel u ti'al quiimsbilo'ob u ti'al ca'aj bisajbáil. Leti' tu kabil tu láaj táambesaj le tóocbil ba'alche'obo'.

¹⁰Chéen p'elac u dzo'ocol u táambesic le ba'alche'ob cu láaj tóoca'alo' j kuch Samuel. Saúl túune' jóok u te'escunte,

¹¹ba'ale' Samuele' tu ya'alaj ti': ¿Ba'ax teen ta beetaj le beya'? Saule' tu núucaj: Le ca tin wilaj dzo'oc u cáajal u binla'ajal le máaco'ob, mix xan ta kuchul ti' le kiin a wa'almajo', yéetel tin wojéeltaj dzo'oc u much'icubáa le j filisteob Micmaso',

¹²tin tucultaj je'el u yéemelo'ob u ba'atelteno'ob Gilgal ma'ili' in kubentinbáa ti' Yuumtzile'; let o'olal tin xachinbáa in táambes tin kabil le ba'alche' cu láaj tóoca'alo'.

¹³Samuele' tu núucaj: ¡Le ba'ax ta beetajo' chéen chocol poolal! wa ca wu'uyajt'aan le ba'ax ca'ach tu túuchi'itaj ti' teech Yuumtzilo', bejela'a cu jedzcuntic u ti'al a beet a ajawi tu caajil Israele'.

¹⁴Ba'ale' bejela'e', ma' bíin p'áatac ti' teech jedzecnac le ajawil tu dzaj ti' techo'. Yuumtzile' bíin u caxant jun túul j xiib utz u yanil u ti'al u dzáa nojochil tu caajal, tumen teche' ma' ta dzo'ocbesaj ba'ax tu ya'alaj techi'.

¹⁵Tu séeblaquil Samuele', j luk Gilgale', ca j bin tu beel. U yalab le aj ba'atelo'obo' j bino'ob tu paach Saúl u ti'al j ba'atele', ca j luuko'ob Gilgale', ca j kucho'ob tu caajil Gaaba tu lu'umil Benjamín. Te'elo', Saule' tu xocaj le aj ba'atelo'ob láakintmailo', ca tu yilaj yaan mil seiscientos j xiibo'ob.

¹⁶Saúl yéetel Jonatán u paal, bey xan le aj ba'atelo'ob cu bino'ob tu yéetelo'obo', j p'áato'ob Gaaba tu lu'umil Benjamín, ca'aliquil le j filisteobo' je'elo'ob Micmas,

¹⁷quex tumen óox jaatz ti' u aj ba'atelo'ob le j filisteobo', j luko'ob tu cúuchil, tu'ux jelecbalo'obo'; jun jaatz ti'obe' tu tojtáanto'ob Ofra, tu tojil Sual,

¹⁸u láake' j bin tu tojil Bet-jorón, u yóox jaatze' j bin tu tojil le jo'ol pu'uc cu bin u ca'analtal tu táax kóom lu'umil Seboín tu tojil x tocoy lu'um.

¹⁹Ichil tuláacal u lu'umilo'ob Israele' mina'an ca'ach mix jun túul j meen máascab, tumen le j filisteobo', tu tucultajo'ob ja'ali' bey je'el u wet'ico'ob ti' le j hebreob u beetico'ob u máascabo'ob yéetel u x lóomte'obo'.

²⁰Tuláacal le j israelitaobo' yaan ca'ach u bino'ob tu yicnal le j filisteob u ti'al u jóoksico'ob u yej u nu'ucul u péecsaj lu'umo'ob, u nu'ucul u jo'op lu'umo'ob, u báato'ob wa u nu'ucul u ch'ac lu'umo'ob.

²¹Cu bo'oltico'ob ca'ach ca'a jaatz ti' u yóox jaatzil ti' jun p'éel siclo u ja'abal u nu'ucul u péecsaj lu'um yéetel u báat lu'um, yéetel jun jaatz ti' u yóox p'éel jaatzul u jóoksa'al u yej báat yéetel u p'a'atal pupudzquil u nu'ucul u meyajo'ob.

²²Bey túuno' mix jun túul ti' le máaxo'ob láakintic Saúl yéetel jonatán yaan u máascab wa u lóomte' u ti'al u kiinil le ba'atelo'. Chéen ti' leti'ob ca'a túulo'ob yaan ca'achi'.

²³Ca'aliquil lelo' jun p'éel u múuch'ul u aj ba'atelo'ob le j filisteobo' j bono'ob tu tojil Micmaso'.