Read Yucateco 1 Samuel 14 Bible Online

1 Samuel 14 - Yucateco bible

1 Samuel 14

¹Jun p'éel kiine', Jonatán u paal Saule' tu ya'alaj ti' u palitzil: Co'oten, co'ox ch'actic le Jordán u ti'al ca xi'ico'on tu yóokol u aj ba'atelo'ob le j filisteob yaan te j táanxel tzéelilo'. Ba'ale' Jonatane' ma' tu ya'alaj mix ba'al ti' u taatai',

²máax jelecbal tu xuul le jo'ol lu'um tu yáanal jun cúul granada tu'ux cu p'e'elel ca'ach trigoo', láakinta'an tumen jun tzúuc aj ba'atelo'ob, seis cientos u ca'ajo'ob.

³Ahías u paal ca'ach Ahitob u yíidzin Icabod, u paal Finees u yáabil Elí u aj kiin Yuumtzile', ti' yaan ca'ach Siloe', leti' bisic ca'ach le efodo'. Le máaco'obo' ma' tu yojéeltajo'ob wa dzo'oc u bin ca'ach Jonatani'.

⁴Ca'aliquil leti'e' táan u yilic bix u kuchul tu'ux much'ucbal ca'ach u aj ba'atelo'ob le j filisteobo'. U bejile' ti' ca'ach yaan chúumuc ti' ca'a p'éel nucuch suytuuno'obi' cu kaaba'intico'ob Boses yéetel Sene,

⁵jun p'éele' ti' yaan tu xaman Micmase', u láake' j noojol actáan ti' Gabaa.

⁶Jonatane' tu ya'alaj ti' u palitzil: Péecsabáa, co'ox te táanxel tzéelil tu'ux yaan u aj ba'atelo'ob le ma' ocsaj óolalo'obo'. Ma' xan ca u beet wa ba'ax Yuumtzil t o'olali', tumen u ti'al leti'e' ma' talam u dzáic to'on ca c pa'a u muuko'ob yéetel ya'ab máaco'ob wa yéetel jun p'íiti'.

⁷U palitzile' tu núucaj: Beet tuláacal ba'ax dzo'oc a tucultic, tene' in dzaamaj tin wóol in wáantiquech yéetel ba'axo'ob a tucultmaj.

⁸Jonatane' tu ya'alaj ti': Ile bin c ca'a j máan te j táanxel tzéelil tu'ux yaan le máaco'obo', ca c cha'a u yilco'ono'ob.

⁹Wa cu ya'alico'ob to'on ca p'áataco'on c pa'ato'ob le tu'ux yano'ono', c p'áatal c pa'ato'obi', ma' bíin na'acaco'oni'.

¹⁰Ba'ale' wa cu ya'alico'ob to'on ca na'acaco'one' c beetic beyo', tumen lelo' u chíiculal bíin u beet Yuumtzil c pa'ic u muuko'ob.

¹¹Bey túuno' tu ca'a túulalo'ob tu ye'esajuba'ob ti' u aj ba'atelo'ob le j filisteobo'. Le ca j ila'abo'obe', le j filisteobo' tu ya'alajo'ob: Ile'ex, táan u jóokol le j hebreob tu sajcabo'ob tu'ux ca'ach u ta'acbesmajuba'obo'.

¹²Tu séeblaquil tu yaawtajo'ob ti' Jonatán yéetel ti' u palitzil: ¡Máanaaquene'ex t icnal, yaan ba'ax bíin c tzicbalt ti' te'ex! Jonatán túune' tu ya'alaj ti' u palitzil: Co'oten tin paach, tumen Yuumtzile' bin u ca'aj u kub le j filisteob tu kab le j israelitaobo'.

¹³Jonatane' jo'op' u na'acal yéetel u yooco'ob bey xan yéetel u kabo'ob, tzaypachta'an tumen u palitzil. Le máaxo'ob cu balkesa'alo'ob j lu'um tumen Jonatane', tu séeblaquil cu dzo'oc quíimsa'alo'ob tumen u palitzil.

¹⁴Ti' le yáax ba'atela' Jonatán yéetel u palitzile', tu quíimsajo'ob míin veinte máaco'ob ti' jun súutuc.

¹⁵Tuláacal le máaxo'ob yano'ob tu cúuchil je'elel yéetel le yano'ob paachilo', sen sajacchajo'ob. Le u múuch'ul le aj ba'atelo'ob yéetel u láak mejen múuch'ulo'obo', sajacchajo'ob xan. Tu yóokol lelo' yanchaj quíilbal lu'um, ca j tza'ay x paakil ti'ob.

¹⁶U aj canano'ob Saúl yano'ob ca'ach Gabao', tu yilajo'ob u múuch' áalcab le j filisteob tzéel máan tzéel.

¹⁷Saúl túune' tu ya'alaj ti' le aj ba'atelo'ob láakintmailo': Xoque'ex u kaaba' le aj ba'atelo'obo', ca a wile'ex ma'ax ti' to'on mina'an waye'. Le ca j xo'oc u kaaba'obe', j ila'ab mina'an Jonatán yéetel u palitzil.

¹⁸Bey ti' le kiin ti' yaan tu yicnalo'ob u efod Kuo', Saule' tu ya'alaj ti' Ahías: Taas u efod Ku waye'.

¹⁹Ba'ale' ca'aliquil táan u t'aan Saúl yéetel le aj kiino', xi'ic u bin u nojochtal le sat óolalil tu'ux jelecbal le j filisteobo'. Saúl túune' tu ya'alaj ti' le aj kiino': Ma' kabet a taasiqui'.

²⁰Tu séeblaquile', Saúl yéetel u aj ba'atelo'obe', tu much'ajuba'obe' ca j áalcabnajo'ob j ba'atel. Ba'ale' tu yo'olal sen saatal u yóol le j filisteobo', tu paaclan quíimsajuba'ob.

²¹Úuch xan beya', le j hebreob dzo'oc u yúuchtal xi'ico'ob cajtal yéetel le filisteob joka'ano'ob j ba'atel ichil u múuch'ul u aj ba'atelo'obo', j máano'ob ba'atel tu tzéel Saúl yéetel Jonatán.

²²Le ca tu yojéeltajo'ob le j israelitaob u táacbesmajuba'ob ca'ach tu pu'uquilo'ob Efrain táan u púudzul le j filisteobo', áalcabnajo'ob xan tu paacho'ob u ba'atelto'ob.

²³Le ba'atelo', j kuch tac Bet-avén, Yuumtzile' tu tocaj Israel ti' le kiinaco'.

²⁴Ba'ale' le j israelitaobo', sen ca'anano'ob ti' le kiino', mix máac janac, tumen Saule' tu jalach t'antaj yáanal loolob t'aan, tumen tu ya'alaj: Loolob t'anta'an le máax bíin u jaant wa ba'ax ma'ili' t'úubuc kiin, ma'ili' dzo'ococ in dzáic u bo'olal in aj p'eeco'obe'.

²⁵U múuch'ul le aj ba'atelo'obo', j kuch ti' jun p'éel caabal káax tu'ux yaan caab te j lu'umo'.

²⁶Le ca j kuch le máaco'ob te j caabal káaxo', le caabo' cu yáalcab ca'ach bey ja'e'; ba'ale' mix máac túunte, tumen sajaco'ob ti' le jalach t'aan beeta'ano'.

²⁷Ba'ale' Jonatane' ma' tu yu'ubaj le jalach t'aan tu beetaj u taata ti' u múuch'ul le aj ba'atelo'obo', tu yo'olal lelo' tu tich'aj le xóolte' yaan tu kabo', ca tu tu ch'ulaj yéetel caab, ca tu jaantaj, yéetel lelo', yanchaj u yóol tu séeblaquil.

²⁸Ba'ale' jun túul ti' u aj ba'atel le j israelitaobo' tu ya'alaj ti' Jonatán: A taatae' tu dzáa u múuch'ul le aj ba'atelo'ob yáanal jalach t'aan, tu ya'alaj bíin p'áatac yáanal loolob t'aan le máax bíin u jaant wa ba'ax bejela'e'. Let o'olal bajelae', le máaco'obo' sen mina'an u yóolo'ob.

²⁹Jonatane' tu núucaj: In taatae' dzo'oc u beetic kaas ti' le múuch' caajo'oba'. Ilawila' bix úuchic u ca'a yantal in wóol le ca j dzo'oc in jaantic jun p'íit le caabo',

³⁰ba'ale' bejela'e' yaan u yóol le máaco'ob wa cu jaanto'ob ca'ach le ba'ax tu tocajo'ob ti' le aj p'eeco'. ¡Buca'aj nojochil ca'ach bíin dzáanche'eta'ac le j filisteobo'!

³¹Ti' le kiino', le j israelitaobo' tu pa'ajo'ob u muuk le j filisteob, iquil ba'atelnajico'ob likbal Micmas tac Ajalón. Ba'ale' u aj ba'atelilo'ob le j israelitaobo' sen mina'an u yóolo'ob ca'achi,

³²le t o'olale', tu dzooque' áalcanajo'ob u ch'a'ob ba'ax tu tocajo'ob ti' le aj p'eeco', ca tu ch'a'ajo'ob j tamano'ob, x wacaxo'ob, yéetel mejen wacaxo'obe', ca tu quíimsajo'ob chéen te j lu'umo' ca tu jaantajo'ob u bakel pa'ate' yéetel u ki'ikel.

³³Ba'ale' dze'edzec ti'obe' j bino'ob u ya'alo'ob ti' Saúl: Le máaco'obo' táan u kebanchajalo'ob tu táan Yuumtzil, tumen táan u jaantico'ob bak yéetel u ki'ikel. Saúl túune' tu ya'alaj: ¡Te'exe' jun túule'ex kéex óole'ex! Taase'ex balkesbil jun p'éel nojoch tuunich waye'.

³⁴A'ale'ex xan ti' tuláacal le máaco'ob ca u taaso'ob way u wacaxo'ob wa u j tamano'ob u ti'al u quíimso'ob ca u jaanto'ob, ma' u kebanchajalo'ob iquil u jaantico'ob ki'ik. Ti'ilie' áakabo', tu jujun túulile' tu bisaj u waacaxe' ca tu quíimsaji'.

³⁵Saule' tu beetaj jun p'éel multuunil kultaje', ca tu jun páaycuntaj ti' Yuumtzil, Lelo' leti' yáax ba'ax tu jun páaycuntaj ti' Yuumtzil.

³⁶Cu dzo'ocole' tu ya'alaj Saúl: Cone'ex c éemel ti'ilie' áakab c ch'a'apacht le j filisteob ca j láaj toque'ex ba'ax yanti'ob tac u sáastal, ma', bíin c p'at cuxa'an mix jun túuli. Tuláacalo'obe' tu núucajo'ob: Beet le ba'ax ca tucultic asab ma'alo'obe'. Ba'ale' le aj kiino' tu ya'alaj: Táanil cone'ex u'uyic ba'ax cu ya'alic Junab Ku.

³⁷Saúl túune' tu káat chi'itaj ti' Ku: ¿U najmal wa in ch'a'apachtic le j filisteobo'? ¿Bíin wa a kub tu kab le j israelitaobo'? Yuumtzile' ma' tu núucaj ti' le kiinaco'.

³⁸Saúl túune' tu ya'alaj: U nadzjubáa way tuláacal u nuuquil le aj ba'atelo'obo', ca a wojéelte'ex máax kebanchja'an.

³⁹¡Quin jalach t'antic tu kaaba' Yuumtzil, máax toquic Israel, yaan u quíimsa'al quex wa in paal Jonatán! Mix máac ti' le aj ba'atelo'ob j t'aanajo';

⁴⁰Saúl túune' tu ya'alaj ti' le j israelitaobo': Dza'aba'ex ti' jun tzéelile', ca in dzáinbáa ti' u láak tzéelil yéetel in paal Jonatán. Beet je'el bix a tucultique': tu núucaj u múuch'ul le aj ba'atelo'obo'.

⁴¹Saúl túune' tu ya'alaj: Yuumtzil u Ku Israel, ¿Ba'axten ma' a núuc ba'ax cu káatic ti' teech a palitzil bejela'e'? Wa tu yo'olal in si'ipil wa u si'ipil in paal Jonatane', le quéen beeta'ac le buulo', bíin jóokoc le Urimo'; ba'ale' wa tu yo'olal u si'ipil a caajal Israele', le quéen beeta'ac le buulo', bíin jóokoc le Tumino'. Le buulo' j lúub yóokol Jonatán yéetel Saúl, le caajo' j páat x ma' si'ipil.

⁴²Cu dzo'ocole' Saule' tu ya'alaj: Beete'ex le buul u ti'al in paal Jonatán yéetel in ti'al. Le buulo' j lúub yóokol Jonatán,

⁴³Saúl túune' tu ya'alaj ti' Jonatán: Cáant ti' teen ba'ax ta beetaj. Jonatane' tu cáantaj: Tu jaajile', tin túuntaj jun p'íit caab tin ch'ulaj yéetel in xóolte' yaan ca'aach tin kabo' ca tin túuntaj. Ba'ale' je'elena', quin ku'ubiquinbáa u ti'al j quíimil.

⁴⁴Saule' Tu ya'alaj: ¡Ku bíin u chichich jadzen wa ma' ta quíimil Jonatán!

⁴⁵Ba'ale' le caajo' tu núucaj ti' Saúl: ¡Bix bíin xi'ic ti' quíimil Jonatán wa dzo'oc u dzáic jun p'éel nojoch pa' muuk ti' u aj p'eeco'ob Israel! ¡Ma' bíin úuchuc lelo'! ¡Tu yo'olal u cuxtal Israele', ma' bíin lúubuc j lu'um mix jun cúul u tzo'otzel u pooli! Tumen le ba'ax tu beetaj bejela'o', tu beetaj yéetel u yáantaj Ku. Bey túuno' le caajo' ma' tu cha'aj u quíimsa'al Jonatani'.

⁴⁶Saúl xane' tu p'ataj u ch'a'apachtic le j filisteobo', ca j suunajo'ob tu lu'umo'ob.

⁴⁷Bey túuno', Saule' culaj tu jalach káanche' Israel, tuláacal tu'ux tu ba'ateltaj u aj p'eeco'ob le j moabitaob, le j amonitaob, le j edonitaob, u ajaw Soba yéetel le j filisteobo'. Tuláacal tu'ux ca'ach cu bine', cu pa'ic muuk.

⁴⁸Tu much'quintaj u aj ba'atelo'obe', ca tu pa'aj u muuk Amalec, ca tu tocaj Israel ti' u múuch'ulilo'ob j oocolo'ob.

⁴⁹U paalal Saule': Jonatán, Isúi yéetel Malquisúa. U ca'a túul x ch'upul paalale': X Merab u x nojochil yéetel x Mical u chichanil.

⁵⁰U yatan Saule' tu kaaba'intaj x Ahinoam u x ch'upul paal Ahimaas. U j noojoch u aj ba'atelo'obe' tu kaaba'intaj Abner, u paal Ner, u dzeyuum Saúl.

⁵¹Cis u taata Saúl yéetel Ner u taata Abnere', u paalal ca'ach Abdiel.

⁵²Le ba'atel ca'ach cu yantal ti' Saúl tuláacal u kiinilo'ob u cuxtal yéetel le j filisteobo', sen talam; le t o'olal Saule' cu dzáic ca'ach ichil u aj ba'atelo'ob tuláacal máaco'ob mu'uka'ano'ob, yéetel jach j xiixib máaco'ob.