Read Yucateco 1 Samuel 15 Bible Online

1 Samuel 15 - Yucateco bible

1 Samuel 15

¹Jun p'éel kiine', Samuele' tu ya'alaj ti' Saúl: Yuumtzile' tu túuchi'itajen u ti'al in jun páaycuntiquech u ti'al u ajawil Israel, u caajal. Bejela' túune' u'uy ba'ax u káat u ya'al ti' teech Yuumtzil.

²U Yuumtzil tuláacal páajtalile' cu ya'alic: Bin in ca'aj in jadz le j amalequilo'ob tu yo'olal ba'ax tu beetajo'ob ti' Israel, tumen jóok u kalo'ob u beelo'ob le táan u taalo'ob dzo'oc u jóokolo'ob Egiptoo'.

³Bey túuno' xeen a ba'atelto'ob; xiixcunto'ob yéetel tuláacal u ayikalilo'ob, ma' a ch'a'ic óotzilil ti'ob. Quíims j xiibo'ob, co'olelo'ob, mejen paalal, bey xan le táant u síijilo'obe', quíims xan wacaxo'ob, j tamano'ob, camello'ob yéetel burro'ob.

⁴Saule' tu túuchi'itaj t'anbil le caajo' ca tu beetaj u xo'ocol u kaaba'ob tu lu'umil Telaim. Tu chucajo'ob docientos mil j xiibo'ob cu bino'ob j ba'atel j xíimbal óoquil yéetel diez mil u j xiibilo'ob Judá.

⁵Cu dzo'ocole' Saule' j bin tu tojil u noj caajil Amaleque', ca tu dzaj u aj ba'atelo'ob tu tzéel le t'o'ol ja'o',

⁶ca tu ya'alaj ti' le quenitaob: ¡Tzelaba'ex waye'! ¡Jóokesaba'ex tu chúumuc le j amalequitaobo', tu yo'olal ma' in láaj xu'ulsique'ex pa'ate' yéetelo'ob; Tumen te'exe', ta bisajaba'ex yéetel le j israelitaob le táan ca'ach u taalo'ob dzo'oc u jóokolo'ob Egiptoe'! Le j quenitaobo', tu tzelajuba'ob ichil le j amalequitaobo'.

⁷Saúl túune' tu ba'ateltaj le j amalequitaob likbal Havilae' tac Shur, le yaan actáan ti' Egipto, ca tu pa'aj u muuko'ob;

⁸Tu machaj cuxa'an Agag u ajawe', ca tu láaj quíimsaj yéetel máascab u aj ba'atelo'ob.

⁹Ba'ale' Saúl yéetel u aj ba'atelo'obe' tu p'atajo'ob cuxa'an Agag, bey xan ma' tu quíimsajo'ob u jadzutztaquilo'ob le j tamano'obo', le wacaxo'obo', mix le mejen wacaxo'ob asab poloctaco'obo', mix le j yuuco'obo', mix tu kascuntajo'ob le ba'axo'ob co'oj u tojolo'obo', quex tumen tu xu'ulsajo'ob le mix ba'al u biilalo'.

¹⁰Cu dzo'ocole' Yuumtzile' tu t'anaj Samuele' ca tu ya'alaj ti':

¹¹Yaj tin wóol úuchic in dzáic u beet u ajawil Saúl, tumen dzo'oc u dzáicubáa jun tzéelil ti' teen ma' tu dzo'ocbesic ba'ax in wa'almaj ti'. Samuele', sen kuuxilnaji, tuláacal le áakabo' j payalchi'inaj ti' Yuumtzil.

¹²Tu láak kiine' j líik piknal u sáastal u ti'al u binbal u nuptáantubáa yéetel Saúl, ba'ale' j dzaab u yojéelt dzo'oc u binbal Saúl Carmel u ti'al u líikes jun p'éel pak u ti'al ka'ajsajil, cu dzo'ocol u súutpachtique', ca j suunaj tu tojil Gilgal.

¹³Samuel túune' j bin tac tu'ux yaan Saúl, Saule' tu ya'alaj ti' Samuel: Yuumtzil ca u qui' t'antech. Dzo'oc in dzo'ocbesic ba'ax tu ya'alaj Yuumtzil.

¹⁴Samuele' tu núucaj: ¿Ba'ax túun u káat u ya'al u yáacam le wacaxo'ob yéetel u yawat le j tamano'ob quin wu'uyico'?

¹⁵Saule' tu núucaj: Amalec j ch'a'abo'ob u ti'al j taasbil, tumen le máaco'obo' tu p'áatajo'ob u asab ma'alobil le j tamano'ob yéetel le wacaxo'ob u ti'al u quíimso'ob yéetel u táanbeso'ob ti' Yuumtzil a Ku. Ba'ale' u láako'obo' t láaj quíimsajo'ob.

¹⁶Samuele' tu ya'alaj: ¡Macachi', bin in ca'aj in wa'al ti' teech ba'ax tu ya'alaj ti' teen Yuumtzil oknajiac! Saule' tu ya'alaj ti': T'aanen.

¹⁷Samuel túune' tu ya'alaj: ¿Ma' wa ta tucultabáa jun p'íit ba'alechi'? ba'ale' quex beyo' dzo'oc a kuchul a beetabáa u j nojochil u ch'i'ibalo'ob le j israelitaobo', Yuumtzile' tu jun páaycuntech u ti'al ajaw tu lu'umil Israel.

¹⁸Ba'ale' wa Yuumtzil tu túuchi'itajech a ba'atelt le aj keban amalequitaob tac a láaj xu'ulsico'obo',

¹⁹¿Ba'axten ta beetaj a j ma' u'uyaj t'aanil, ti' ba'axo'ob tu ya'alaj u ti'al a pulicabáa a ch'a'a' le ba'axo'ob ta tocaje'ex ti' le aj p'eec u ti'al a beetic ba'ax kaas u lúubul tu táan Yuumtzil?

²⁰Saule' tu núucaj: Tene' tin wu'uyaj t'antaj ba'ax tu ya'alaj Yuumtzil, tin dzocbesaj ba'ax tu túuchi'itaj ca in beeté: Tin machaj cuxa'an Agag u ajawil Amalec, tin láaj xu'ulsaj le j amalequitaobo'.

²¹Ba'ale' le aj ba'atelo'obo' tu ch'a'ajo'ob le j tamano'ob yéetel le wacaxo'ob, u asab ma'alobilo'ob le ba'axo'ob jun páaycuna'ano'ob u ti'al xu'ulsalo', u ti'al quíimsbilo'ob u ti'al u nojbe'enil Yuumtzil a Ku tu caajil Gilgal.

²²Samuel túune' tu ya'alaj: Asab cu qui'imactal u yóol Yuumtzil ca dzo'ocbesa'ac u t'aan, ti' le quíimsbil ba'alche'ob yéetel le cu láaj tóocalo'obo'; Asab ma'alob u yu'ubaj t'anta'al yéetel u ch'en xiquinta'al ti' u ku'ubul quíimsbil ba'alche'ob yéetel u tzaatzel j yuuco'ob.

²³Je'el bix u kebantal le máax cu dzu'uyquintic u pucsi'ikale', bey u kebantal le máax cu beetic u j wáayile'; le máax cu ma' u'uyaj t'aane'. Bey je'el bix le máax kultic beetbil kuobe'. Bey tumen teech dzo'oc a kex óoltic u nu'ucbe'en t'aano'obe', letie' cu kexiquech ti' a ajawil.

²⁴Saúl túune' tu ya'alaj ti' Samuel: Tu jaajil, dzo'oc in kebanchajal, tumen tin dzáa jun tzéelil ba'ax tu ya'alaj Yuumtzil bey xan ba'axo'ob ta wa'alaj ti' teen, tumen tin ch'a'aj sajaquil ti' le máaco'obo' ca tin beetaj ba'ax tu káatajo'ob.

²⁵Ba'ale' quin káat óoltic ti' teech ca a sa'ats in keban, suunen tin wéetel a kult Yuumtzil.

²⁶Samuele' tu núucaj: Ma' bíin suunaquen ta wéeteli', tumen teche' ta tzelaj u nu'ucbe'en t'aano'ob Yuumtzil, bejela'a' túune' cu tzeliquech bey u ajaw Israele'.

²⁷Samuele' tu sutaj u paach u ti'al u bin, ba'ale' Saule' tu machaj u chi' u suyem nooke', ca jáati.

²⁸Samuel túune' tu ya'alaj ti' Saúl: Bejela'e', bey tu jatilac Yuumtzil a ajawil ti' Israel. Dzo'oc u lukesic ti' teech u ti'al u kubic ti' jun túul a wéet caajal, asab ma'alob ti' teech.

²⁹Tumen Junab Kue', u nojbe'enil Israele', ma' tu tuus mix tu kexpajal u tuucul, tumen ma' chéen wíinic u ti'al ca kexpajac u tuuculi'.

³⁰Saule' tu ya'alaj: dzo'oc in kebanchajal Ba'ale' quin káat óoltic ti' teech ca tziquen bey jun túul ajaw tu táan u nuuquilo'ob Israel yéetel tu táan le caajo'. Bey túuno' suunen tin wéetel a kult Yuumtzil a Ku.

³¹Samuel túune' j suunaj tu yicnal Saúl, Saule' tu kultaj Yuumtzil.

³²Cu dzo'ocole' Samuele' tu ya'alaj: Taase'ex tin táan Agag u ajawil amalec. Agag túune' wa'alaj sen jedzel u yóol tu táan Samuel, táan ca'ach u tuucultic dzo'oc u máan u tuuculil u quíimsa'al.

³³Ba'ale' Samuele' tu ya'alaj ti': Yéetel a máascab ta p'ataj ya'ab co'olelo'ob x ma' aalil. je'el bix ta p'atilaco'ob letio'obe' bey bíin p'áatac a maama. Tu séeblaquil p'ap'ay ch'acta'ab tumen Samuel tu caajil Gilgal tu táan Yuumtzil.

³⁴Cu dzo'ocole', Samuele' j bin Ramá, Saule' suunaj tu yotoch yaan Gabaa u ti'al Saúl.

³⁵Samuele', ma' tu ca'a ilaj Sauli', quex tumen sen ma' utz u yóol úuchic u ke'exel tumen Yuumtzil u ti'al u xulic beetic u ajawil tu caajil Israel.