Read Yucateco 1 Samuel 16 Bible Online

1 Samuel 16 - Yucateco bible

1 Samuel 16

¹Yuumtzile' tu ya'alaj ti' Samuel: ¿Ba'ax kiin u jáawal a yaj óoltic ba'ax cu yúuchul ti' Saúl? Tene' ma' in káat ca p'áatac u beet u ajawil Israeli'. Xeen, chup le baac yéetel aceiteo', in káat ca xi'iquech tu yotoch Isaí, le j Belenilo', tumen dzo'oc in yéeyic u ti'al beet u ajawil jun túul ti' u paalal.

²Samuele' tu núucaj: ¿Bix úuchac u páajtal in bin? ¡Wa ca kuchuc u yojéelt Saule', bíin u quíimsen! Yuumtzile' tu núucaj: Ch'a'a jun túul chan x wacaxe', ca a wa'al bin a ca'aj a táanbes ti' teen quíimsbil ba'alche'.

³Cu dzo'ocole' páay óolt Isaí te j quíimsbil ba'alche'o', ca in we'es ti' teech ba'ax u najmal a beetic. Jun páaycunt u ti'al ajawil le máax bíin in wa'al ti' teche'.

⁴Samuele' tu beetaj le ba'ax a'ala'ab ti' tumen Yuumtzilo'. Le ca j kuch Belene', u nuuquilo'ob le caajo' kaas sajactaco'ob jóokico'ob u kamo'ob, ca tu káat chi'itajo'ob ti': ¿Yéetel jéedzel wa taalech?

⁵Samuele' tu núucaj: Yéetel jéedzel taaliquen, j taalen in táanbes jun p'éel quíimsbil ba'alche' ti' Yuumtzil. Utzquintaba'ex u ti'al a láakintiquene'ex ti' le quíimsbil ba'alche'o'. Cu dzo'ocole' Samuele' tu yutzquiintaj yanil Isaí yéetel u paalal, ca tu ya'alaj ti'ob ca xi'ico'ob u ti'al le quíimsbil ba'alche'o'.

⁶Le ca j kucho'obe', Samuele' tu yilaj Eliabe' ca tu téec tucultaj: Jach tu jaajile', le j xiiba' leti' yéeya'an tumen Yuumtzil u ti'al ajawil.

⁷Ba'ale' Yuumtzile' tu ya'alaj ti': Ma' a pactic u wíinclil mix u ca'analil u baaquel, tumen tene' dzo'oc in dzáic jun tzéelil. Tumen ma' chéen kabéet le ba'ax cu yilic le wíinico'; tumen le wíinico' chéen cu pactic le wíinclilo', ba'ale' tene' quin pactic le pucsi'ikalo'.

⁸Isaí túune' tu t'anaj Abinadab u ye'es ti' Samuel; ba'ale' Samuele' tu núucaj: Mix leti' yéeya'an tumen Yuumtzil.

⁹Cu dzo'ocole' Isaie' tu t'anaj Sama; ba'ale' Samuele' tu ya'alaj: Mix leti' yéeya'an xani'.

¹⁰Isaie', tu ye'esaj ti' Samuel u siete u paalal, Samuele' yanchaj u ya'alic ti' mix jun túul ti'ob yéeya'an tumen Yuumtzili'.

¹¹Tu Dzoocbale' tu káat chi'itaj ti': ¿Mina'an wa u láak a paalal? Isaie' tu núucaj: Cu binetic u asab chichanil, leti' canáatic le j tamano'obo'. Samuele' tu ya'alaj: Túuchi'it ch'a'abil, tumen ma' bíin culaco'on janal wa ma' taalaqui'.

¹²Isaie' tu túuchi'itaj t'anbil. Le j xi'ipalo', chacxique'en ca'ach u wíinclil, qui'ichquelem, cu dzo'ocole' cu lúubul utzil. Yuumtzil túune' tu ya'alaj ti' Samuel: Lela' leti'. Líiken a jun páaycunt u ti'al u beet ajaw.

¹³Tu séeblaquile', Samuele' tu ch'a'aj u nu'ucul le aceiteo', ca tu jun páaycuntaj tu táan u sucu'uno'ob u ti'al ca u beet u ajawil, le j xi'ipalo' cu kaaba'intic David. Ti'ilie' súutuco', j ch'a'ab David tumen u pixan Yuumtzil. Cu dzo'ocole' Samuele' tu ya'alaj ti'ob táan u bin, ca j suunaj Ramá.

¹⁴Bey túuno', u pixan Yuumtzile' dzo'oc ca'ach u tzelicubáa ti' Saúl, Yuumtzile' tu túuchi'itaj jun túul kaakas pixan ti' u ti'al u beeta'al u mukyaj.

¹⁵Let o'olal le máaxo'ob meyajtico' tu ya'alajo'ob ti': Je'el bix a wilico' c yumen jun túul kakaas pixan túuchi'ita'an tumen Ku u ti'al u betic a mukyaj.

¹⁶Let o'olale' túuchi'it wa máax ti' a palitzilo'oba' ca u caxant jun túul máac yojel u pax arpa, tumen beyo' le quéen u beet a mukyaj le kaakas pixano', leti'e' cu paxic le arpa u ti'al u jóomol a wóol.

¹⁷Saule' tu núucaj: Caxte'ex ma'ax u yojel pax arpa, ca a taase'ex ti' teen.

¹⁸Jun túul ti'obe' tu ya'alaj túun: Tene' tin wilaj jun túul ti' u paalal Isaí le j Belenile', ma'alob u yojelil paax; bey xan leti'e', jun túul aj ba'atel j xiixib máac, cu t'aan yéetel na'atil; qui'ichquelem, cu dzo'ocole' cu xooc yéetel u yáantaj Yuumtzil.

¹⁹Saúl túune' tu túuchi'itaj aj bisaj t'aano'ob ti' Isaí u ti'al ca a'ala'ac ti': Túuchi'it ti' teen a paal David le cu canan j tamano'obo',

²⁰Isaí túune' tu túuchi'itaj David tu yicnal Saúl. Pa'ate' yéetel leti'e' tu túuchi'itaj ti' Saúl jun túul burro yéetel u cuuch waaj, jun chúuj u kéewelil vino yéetel jun túul chan j taman.

²¹Bey kuchic David tu táan Saulo', ca j p'áat j meyaj tu yicnal, Saule' tu sen yaabiltaj Davide', ca tu ch'a'aj u palitzilte.

²²Saule' tu túuchi'itaj aj bisaj t'aan ti' Isaí, tu'ux cu káatic ca p'a'atac David tu yicnal, tumen sen lúub utzil tu táan u yich.

²³Bey túuno', le quéen ch'a'abac ca'ach Saúl tumen le kaakas pixan túuchi'ita'an tumen Ku, Davide' cu jo'op'ol ca'ach u paxic le arpao'. Beyo' Saule' cu yantal u yóol yéetel cu ch'a'ic muuk ca'achi', cu yu'ubicubáa utz yanil, cu tzelicubáa ca'ach le kaakas pixan ti'o'.