Read Yucateco 1 Samuel 17 Bible Online

1 Samuel 17 - Yucateco bible

1 Samuel 17

¹Le filisteobo' tu much'ajuba'ob Soco jun p'éel u caajil Judá u ti'al le ba'atelo', ca j je'elo'ob Efes-damim chúumuc ti' Soco yéetel Azeca.

²Saúl xan yéetel le j israelitaobo' tu much'ajuba'obe', ca j je'elo'ob tu táax kóom lu'umil Elae', ca tu nu'ucbesajuba'ob u ti'al ba'atel yéetel le j filisteobo'.

³Le j filisteobo', ti' yano'ob ca'ach ti' jun p'éel pu'uque', le j israelitaobo', ti' yano'ob ca'ach tu láake', cu ja'atzalo'ob tumen le táax kóom lu'umo'.

⁴Chéen ti' lelo', ichil u aj ba'atelo'ob le j filisteobo', jóok jun túul aj ba'atel míin ca'a sáap ca'anlil u baaquel. U kaaba'e' Goliat, ti' cajacbal ca'ach Gate'.

⁵Tu poole' u dzamaj ca'ach jun p'éel p'óoc bronce u ca'aj, u balmaj xan u wíinclil yéetel jun p'éel búuquil ba'atel bronce u ca'aj cincuenta kilos aalil.

⁶Beeta'an xan u bakal ooc yéetel bronce, u ti'al balic u tzeleco'ob yéetel jun p'éel u nu'ucul ba'atel cu bisic ca'ach tu queléembal.

⁷U yooc u lóomte'e', sen nojoch bey u x pechechil u sacalta'al nooke', u ni' le lóomte'o' fierro u ca'ajo', máanja'an ca'ach seis kilos aalil. Táanil ca'ach ti'e' cu bin u palitzil.

⁸Goliate' j wa'alaje' ca tu ya'alaj ti' u aj ba'atelo'ob le j israelitaobo': ¿Ba'ax u ti'al ca tzoolquinticabaex j ba'atel? Je'el bix teen j filisteone', te'exe', u palitzile'ex Saúl, yéeye'ex jun túul ichile'ex u ti'al ca taalac j ba'atel tin wéetel.

⁹Wa j xiib u ti'al j ba'atel tin wéetel u ti'al ca u pa'a in muuke', to'one' j kubicbáa u ti'al ca a palitzilto'one'ex; ba'ale' wa quin pa'ic u muuke', te'exe', bíin c palitzilte'ex.

¹⁰Ti' le kiina', quin caxantic ba'atel ti' u aj ba'atelilo'ob Israel: ¡Dza'ex ti' teen jun túul j xiib u ti'al ca ba'atelnac tin wéetel!

¹¹Le ca tu yu'ubaj Saúl yéetel tuláacal u aj ba'atelilo'ob le j israelitaob ba'axo'ob cu ya'alic le j filisteo', tu ch'a'ajo'ob sajaquil.

¹²Yaan ca'ach jun túul j xiib tu caajil Belén cu kaaba'intic Isaí, dzo'oc ca'ach u sen nuxibtal tu kiinilo'ob Saúl. Le j xiiba' yaan ca'ach ocho u paalal, jun túul ti' leti'obe' cu kaaba'intic David.

¹³U yáax óox túul nucuch paalale' cu kaaba'intico'ob Eliab, Abinadab yéetel Samae', dzo'oc ca'ach u bino'ob tu yicnal Saúl u ti'al le ba'atelo'. David u chichnilo'obe',

¹⁴

¹⁵cu bin ca'ach tu'ux jelecbal Saule', cu ca'a suut Belén u canant u j tamano'ob u taata.

¹⁶Ca'aliquil beyo' le j filisteo', cu jóokol u caxant ba'atel ti' le j israelitaob ja'atzcab kiin yéetel ocnaj kiin, bey tu beetilac sáansamal cuarenta kiino'ob.

¹⁷Jun p'éel kiine', Isaie' tu ya'alaj ti' David u paal: Ch'a'a bey veinte u wuudzul kéelbil trigo, yéetel diez waajo'obe', ca a bis tu séeblaquil tu'ux jelecbal a sucu'uno'obo'.

¹⁸Bis xan le diez queso'ob ti' le aj nu'ucbesaj ba'atelo'. Il a wil bix yanil a sucu'uno'ob, taas ti' teen wa ba'ax bey u chíiculal toj u yóolo'obe'.

¹⁹Ca'aliquile', Saúl yéetel u sucu'uno'ob David bey xan tuláacal le j israelitaobo', ti' ca'ach yano'ob tu táax kóom lu'umil Ela u ti'al j ba'atel yéetel le j filisteobo'.

²⁰Tu láak kiine' Davide', j líik piknal u sáastal, tu p'ataj le j tamano'ob u ti'al j canantbil tumen yanal máac, ca j bin u bis le ba'axo'ob dzaab u bis tumen Isaio'. Le ca j kuch tu'ux cu yúuchul je'elelo', le aj ba'atelo'obo', táan u nu'ubecsicuba'ob u ti'al le ba'atelo', táan u dzáico'ob u yawatil ba'atel.

²¹Le j israelitaob yéetel le j filisteobo', tu tzolajuba'ob actáanil.

²²Davide' tu p'ataj le ba'ax cu bisic u ti'al canantbil tumen le máax canantic u nu'uucul le ba'atel yéetel le ba'axo'ob kabéeto'obo', ca j bin áalcabil ichil le tzoololo'ob u káat chi'it bix yanil u sucu'uno'obo'.

²³Ca'aliquil táan u t'aan tu yéetelo'obe', le aj ba'atel j filisteo cu kaaba'intic Goliat caajnáal Gato', jóok ichil u tzoolol le j filisteobo', ca tu ca'a a'alaj ti' le j israelitaob je'el bix ca'ach u beetic sáansamalo'. Davide' tu yu'ubaj.

²⁴Chéen p'elac tu yiljilaco'ob le j xiib le j israelitaobo', sen ooc sajaquil ti'obe', ca j luko'ob áalcabil tu táan,

²⁵ca'aliquil táan u ya'alico'ob: ¿Dzo'oc wa a wilique'ex le máac dzo'oc u jóokolo'? ¡Dzo'oc u taal u caxant ba'atel ti' Israel! Le máax j xiib u ti'al pa'ic u muuke', bíin dza'abac ya'abcach ayikalil ti' tumen ajaw, bíin xan u dzáa ti'e' u x ch'upul paal u ti'al u yatantej, cu dzo'ocole' u láako'obe', bíin jáawac u bo'otico'ob patan.

²⁶David túune' tu káat chi'itaj ti' le máaxo'ob yaan tu tzéelo': ¿Ba'ax bíin dza'abac ti' le máax bíin quíimsic le j filisteo' u ti'al u beetic u jáawal u po'och'ol Israela'? Tumen, ¿máax le ma' ocsaj óol j filisteo u ti'al ca u t'an j ba'atel u múuch' aj ba'atelo'ob cuxa'an Junab Ku?

²⁷Leti'obe' tu ya'alajo'ob ti' le ba'ax dzo'oc u yáax a'ala'al u dza'abal ti' máax bíin quíimsic Goliato'.

²⁸Ba'ale' Eliab u nojoch sucu'un David bey dzo'oc u yu'ubic u t'aan yéetel le máaco'obo', sen j p'u'uje' ca tu ya'alaj ti': ¿Ba'ax j taalech a beet waye'? ¿Máax ta p'ataj canantic le jujun túul j tamano'ob yaan te x tocoy lu'umo'? Tene' in wojel suuc a wocsicabáa tuláacal tu'ux yéetel keechel tuuculo'ob, tumen chéen taalajane'ech a wila'a u yúuchul le ba'atelo'.

²⁹Davide' tu núucaj: ¿Ba'ax tin beetaj, wa ma' chéen j t'aanajen?

³⁰Cu dzo'ocol u lukul tu yicnal u sucu'une', tu káataj ti' u láak máaque', ca j a'ala'ab ti' je'el bix tumen le yáaxo'.

³¹Dze'edzec máaxo'ob u'uy le u káat chi' Davide', j bino'ob u tzicbalto'ob ti' Saúl, Saule' tu túuchi'itaj t'anbil.

³²David túune' tu ya'alaj ti' Saúl: Mix máac unaj u lúubul u yóol tu yo'olal le j filisteo', tumen teen jun túul u palitzil a Tzicbe'enil, bíin xi'iquen j ba'atel tu yéetel.

³³Saule' tu núucaj: Ma' bíin páatac a bin j ba'atel tu yéetel le j filisteo', tumen teche' jach paalech; ba'ale' leti'e' j líik tu paalil jun túul aj ba'atel máac.

³⁴Davide' tu núucaj: Le u palitzil a Tzicbe'enila', le táan ca'ach cu canantic u j tamano'ob in taatae', wa cu taal ca'ach jun túul león wa jun túul oso u bis jun túul j tamane',

³⁵cu bin ca'ach in chucpachte cu jáanpaytic tu chi'; wa cu suticubáa ca'ach u puljubáa tu yóokole', cu cháachic tu cama'ache', cu nonocjadztic tac quéen u quíimse.

³⁶Bey túuno', quex wa jun túul león wa quex jun túul osoe', u palitzil a Tzicbe'enile', cu quíimsic. Le j ma' ocsaj óol j filisteo', bey xan bíin úuchuc ti', tumen dzo'oc u ya'alic ca ba'atelta'ac u múuch' aj ba'atelo'ob cuxa'an Junab Ku

³⁷Le Yuumtzil j toquen ti' le león wa ti' le osoo', leti' xan bíin toquiquen tu kab le j filisteo'. Saúl túune' tu ya'alaj ti': Xeen túun, Yuumtzil bíin u láakintech.

³⁸Cu dzo'ocole' Saule' tu beetaj u dza'abal u búuquint David le u búuquil u ba'atel cu búuquintic leti'o', tu beetaj xan u dza'abal jun p'éel p'óoc bronce u caaj tu pool yéetel tu beetaj u ba'alal u wíinclil yéetel u búuquil ba'atel.

³⁹Tu dzooque', Davide' tu kaxnaktaj u máascabe', ca tu yóoltaj xíimbal, tu yo'olal ma' suuc ti'e'. Tu séeblaquil tu ya'alaj ti' Saúl: Ma tu páajtal in xíimbal wa in búuquintmaj le ba'ala', tumen ma' suuc teni'. Tu láaj pitaj tu yóokol le ba'alo'obo',

⁴⁰ca tu ch'a'aj u xóolte', ca tu yéeyaj cinco tuunicho'ob dzidzipquil te j t'o'ol ja'o', ca tu jupaj ichil u sáabucan, tu machaj xan u yúuntune' ca j bin ba'atel' yéetel le j filisteo'.

⁴¹Le j filisteo xano' jo'op' u nadzicubáa jujun p'íitil tu yicnal David. Táanil ti' leti' cu bin ca'ach u palitzil.

⁴²Le ca tu líiksaj u yich le j filisteo u pactic Davido', tu yilaj chéen jun túul chacxique'en paal qui'ichquelme', ca tu cha'aj báaxalil,

⁴³ca tu ya'alaj ti': ¿Táan wa a tucultic jun túul peeken u tial ca taalaquech a jadzen yéetel che'? Tu séeblaquile' tu loolob t'antaj David tu kaaba' u ku.

⁴⁴Tu ya'alaj xan ti' David: ¡Co'oten waye', bin in ca'aj in dzáa a bakel u ti'al u tzéenticubáa le ch'íich'o'ob cu xiknalo'ob yéetel ti' dzíidzic ba'alche'ob káax!

⁴⁵Davide' tu núucaj: Teche' ca taal tin wóokol yéetel máascab, lóomte' yéetel jabalina, ba'ale' tene' quin taal ta wóokol tu kaaba' Yuumtzil ti' máax yaan tuláacal páajtalil, u Junab Ku u múuch' aj ba'atelo'ob Israel, le máax dzo'oc a p'u'ujsico'.

⁴⁶Bejela'e', Yuumtzil bíin u kubech tin kab, bejela'e' bíin in quíimsech u ti'al ca in kup a pool, bey xan u quimenilo'ob u múuch' aj ba'atelilo'ob le j filisteobo', bíin in dzáa ti' le ch'íicho'ob cu xiknalo'ob yéetel ti' dzíidzic ba'alche'ob yaan j káaxo'. Beyo' tuláacal yóokolcaab bíin ojéeltic yaan Ku Israel;

⁴⁷tuláacal le máaxo'ob much'ucbalo'ob waye', bíin u yojéelto'ob, Yuumtzile' ma' tu tocsaj yéetel máascab mix yéetel lóomte'i. Le ba'atela', u ba'atel Yuumtzil, leti' bíin u kubech tin kab.

⁴⁸Le j filisteo', j líik u ti'al j bin u nactáant David, David xane' tu nu'ucbesajubáa ba'atel yéetel le j filisteo';

⁴⁹tu yocsaj u kab tu sáabucane', ca tu jóokesaj jun p'éel tuunich, ca tu dzaj tu yúuntun ca tu ch'iinaj le j filisteo tu yéetelo', ca tu tza'aysaj tu táan jo'olal. Le ca j ch'íic le tuunich tu táanil u pool le j filisteo' nockajal tu beetaj lu'um.

⁵⁰Bey úuchic u pa'abal u muuk le j filisteo tumen Davido'. Chéen yéetel jun p'éel yúuntun yéetel jun p'éel tuuniche', Davide' tu quíimsaj jun pati'. Cu dzo'ocole' mina'an ca'ach u máascab,

⁵¹j bin áalcabil tu yicnal le j filisteo', ca tu ch'a'aj u máascab, tu jóokesaj tu piixe', ca tu dzo'oc quíimsaj. Cu dzo'ocole' tu cúul kuptaj u caal. Le ca tu yilaj le j filisteob dzo'oc u quíimsa'al u asab j xiibil u aj ba'atelo'obe', j áalcabnajo'ob.

⁵²U j xiibilo'ob túun Israel yéetel Judae', tu dzajo'ob u yaawtilo'ob ba'atele', ca j bino'ob u ch'a'apachto'ob tac u yocbal Gat yéetel tu jool u caajil Ecrón. Bey túuno' tuláacal le bej cu bin Saaraim tac Gat yéetel Ecrono', chup yéetel wíinclilo'ob quimentaco'ob u aj ba'atelo'ob le j filisteobo'.

⁵³Cu dzo'ocol u ch'a'apachtico'ob le j filisteobo', le j israelitaobo' j suunajo'ob u ch'a'ob tuláacal ba'ax tu p'ato'ob le j filisteob le tu'ux cu je'elelo'obo'.

⁵⁴David túune' tu ch'a'aj u pool le j filisteo' ca tu bisaj Jerusalén, ba'ale' u nu'ucul u ba'atele' tu dzáaj ichil u chuybil naj.

⁵⁵Ca'aliquil táan u jóokol David j ba'atel yéetel le j filisteo', Saule' tu káat chi'itaj ti' Abner u j noojoch u aj ba'atelo'ob: Abner, ¿Máax u taata le j xi'ipalo'?

⁵⁶Abnere', tu núucaj: quin jalach t'antic ti' a Tzicbe'enil ma' in wojeli'. Le ajawo' tu ya'alaj: Káatchi'it máaxi'.

⁵⁷Bey túuno', ca'aliquil táan u suut David dzo'oc u quíimsic le j filisteo' u ch'úuymaj u poolo', Abnere' tu machaj tu kabe' ca tu bisaj tu yicnal Saúl,

⁵⁸Saule' tu káat chi'itaj: J xi'ipaal, a'al teen, ¿máax a taata? Davide' tu núucaj: U paalen Isaí, j Belenil u palitzil a Tzicbe'enil.