Read Yucateco 1 Samuel 18 Bible Online

1 Samuel 18 - Yucateco bible

1 Samuel 18

¹Le ca j dzo'oc u t'aan David yéetel Saule', Jonatane' kuch u sen bisajubáa tu yéetel David, tu yaabiltaj je'el bix u yaabiltmubae'

²Saúl xane', tu ch'a'a u ti'al u palitzilte líikbal ti' le kiino', ma' tu cha'aj u suut tu yotochi'.

³Jonatán yéetel Davide', tu dzajo'ob u t'aanil u paaclan bisicuba'ob mina'an u xuul, tumen Jonatane' tu yaabiltaj David je'el bix u yaabiltmajubae'.

⁴Jonatane', tu lukesaj xan u suyem bey xan u teep' le u dzaama'ob ca'ache', ca tu dzaj ti' David pa'ate' yéetel u máascab, u x p'úunche' yéetel u kaxnak.

⁵Davide' tu ye'esaj sen nu'uca'anil u ti'al u dzo'ocbesic tuláacal ba'ax cu túuchi'ita'al ti' u beete, ca j dzaab ti' tumen Saúl u beet u nojochil le aj ba'atelo'obo'. Lelo' j lúub utzil ti' tuláacal le aj ba'atelo'obo', bey xan ti' u aj dzíibo'ob Saúl.

⁶Ba'ale', le ca j suunaj le aj ba'atelo'ob cu dzo'ocol u quíimsa'al le j filisteo tumen Davido', ti' tuláacal le caajo'obo', jóokla'aj co'olelo'ob kamic ajaw Saúl táan u yóokoto'ob yéetel qui'imac óolal u ch'a'amajo'ob u pandero'ob yéetel boboj paaxo'ob.

⁷Ichil u kaay le co'olelo'obo', cu sen a'alico'ob: Saule' tu quiimsaj mil j xiibo'ob, Davide' tu quiimsaj diez mili'.

⁸Lelo' tu beetaj u chi'ichnactal Saúl, ca tu ya'alaj ichil u p'uja'anil: Ti j Davide' cu ka'ayal tu quiimsaj diez mil j xiibo'ob ti', tene' chéen mil. ¡chéen cu binetic u beeta'al u chi'ic le ajawtal!

⁹Líikbal ti' le kiino', Saule' jo'op' u pactic David yéetel x ma' utzil óolal.

¹⁰Tu láak kiine' le kaakas pixan túuchi'ita'an tumen Kuo', j ooc ti' Saule', ca jo'op' u máan bey ma' tu yóol yane' ichil u jalach naje'. Davide' táan ca'ach u paxic le arpa je'el bix suuquile', Saule' u machmaj ca'ach u lóomte'.

¹¹Tu séeblaquile', Saule' tu líiksaj u lóomte' u ti'al u báaj lomtic David te j pako', ba'ale' Davide' tu jechaj u loom Saúl ca'a téen.

¹²Saule' sajac ca'ach ti' David, tumen Yuumtzile' cu yáantic David, ba'ale' dzo'oc u jáawal u yáanta'al leti'.

¹³Let o'olale' tu lukesaj tu yicnale', ca tu dzáa u beet u nojochil ti' jun múuch' aj ba'atelo'ob, tu táano'ob cu bin u ti'al j ba'atel, cu dzo'ocole' cu ca'a suut.

¹⁴Tu yo'olal cu yáanta'al tumen Yuumtzile', Davide' cu jóokol ma'alobil ti' tuláacal ba'ax cu beetic.

¹⁵Let o'olal Saule' sajac ca'ach ti', tumen cu yilic bix u bin utzil ti', ti' tuláacal ba'ax cu beetic.

¹⁶Ba'ale' tuláacal Israel yéetel Judae', u yabiltmajo'ob ca'ach David, tumen leti' nu'ucbesico'ob u ti'al u bino'ob j ba'atel, bey xan u ti'al u suuto'ob.

¹⁷Jun p'éel kiine' Saule' tu ya'alaj ti' David: Bin in ca'aj in dzáa ti' teech X Merab in yáax x ch'upul paal u ti'al a watantej, chéen ba'ale', yaan a beeticabáa j xiibil ba'atel u ti'al ca ba'atelnaquech u ti'al Yuumtzil. Saule' táan ca'ach u tucultic ma' kabéet u quíimsic tu kabili', tumen bíin lúubuc tu kab j filisteob u ti'al ca quíimsa'ac.

¹⁸Ba'ale' Davide' tu núucaj: Tene' mix máaquen, mix máaco'ob xan in láaktzilo'ob tu lu'umil Israel u ti'al ca u ja'aninten u ajawil Israel.

¹⁹Ba'ale' le ca j kuch u kiinil u dzáic Saúl x Merab u x ch'upul paal u yatant Davide', ma' tu dzo'ocbesaj u t'aani', tumen tu dzáa ti' Adriel, j Meholail.

²⁰Ba'ale' x Mical, u láak u x ch'upul paal Saule', utz ca'ach David tu yich. Le ca j tzicbalta'ab ti' Saule' j qui'imacchaj u yóol ca tu yojéeltaj,

²¹tu tucultaj u dzáic u ti'al u yatant Davide', u ti'al ca u beet letie', u lúubul David tu kab le j filisteobo'. Tu ca'a a'alaj túun ti' David: Beje'elae', yaan in ja'anintiquech.

²²Cu dzo'ocole' Saule' tu túuchi'itaj ti' u palitzilo'ob: T'aanene'ex ta juunale'ex yéetel David u ti'al ca a wa'ale'ex ti', teen ajawe' jach in yabilmaj, cu dzo'ocole' utz u lúubul tu yich tuláacal in palitzilo'ob, let o'olal unaj in ja'anintic.

²³U palitzilo'obe', j bino'ob u ya'alo'ob ti' David, ba'ale' leti'e' tu núucaj ti'ob: ¿Te'exe' ca tucultique'ex wa chéen ch'a'abil quin in beetic u ja'anitiquen yum ajaw jun túul máac óotzil mix ba'al yaan ti' je'el bixena'?

²⁴U palitzilo'ob Saule', j bino'ob u ya'alo'ob ti' leti' ba'ax tu ya'alaj David.

²⁵Saúl túune', bey taac u beetic u lúubul David tu kab le j filisteobo', tu núucaj ti'ob: Ale'ex ti' David je'el in kamic yanal ba'ax ti' le suuc u dza'abal u ti'al u mu'ujul jun túul x atantzile', teen ajawe', asab utz tin t'aan ca u kub teen cien u yot'elo'ob u xiibil j filisteob u ti'al in dzáic u bo'olal in aj p'eeco'ob.

²⁶U palitzilo'ob Saule', tu bisajo'ob le péectzil ti' Davido', Davide' tu tucultaj dzo'oc u kuchul u kiinil u beeticubáa u ja'an ajaw. Ma'ili' kuchuc le kiino',

²⁷Davide' tu yactáantaj u aj ba'atelo'obe', ca j bin u quíims docientos j filisteob; cu dzo'ocole', tu bisaj u yoot'el u j xiibilo'ob ti' ajaw, ca tu kubaj ti' u ti'al ca ja'aninta'ac. Saúl túune' tu dzáa x Mical u x ch'upul paal ti' David u ti'al u yatantej.

²⁸Ba'ale' le ca tu yilaj Saúl cu yáanta'al David tumen Ku yéetel yabila'an tumen x Mical u x ch'upul paale',

²⁹j t'úub u sajaquile', ca tu beetubáa aj p'eec u ti'al tuláacal u kiinilo'ob u cuxtal.

³⁰Cu dzo'ocole', je'el jay téen cu jóokol u nuuquilo'ob le j filisteob j ba'atele', Davide' asab ma'alob u pa'a muuk ti' u chuucáan u nuuquilo'ob u aj ba'atelo'ob Saúl, bey túuno' sen kuch tzicbil le j Davido'.