Read Yucateco 1 Samuel 19 Bible Online

1 Samuel 19 - Yucateco bible

1 Samuel 19

¹Saule' tu ya'alaj ti' Jonatán yéetel ti' tuláacal u nuuquil u aj ba'atelo'ob ca u quíimso'ob David. Ba'ale' Jonatane' jach u yabiltmaj ca'ach David,

²le t o'olale' tu dzaj u yojéelte: Saúl in taatae' táan u caxtic bix u quíimsiquech. Ja'atzcab sáamale', canantabáa, ta'acbaesabáa ti' jun p'éel x mucul cúuchil.

³Tene' bíin jóokoquen yéetel in taata, te j káax tu'ux bíin yanaquecho'. Bíin t'aanaquen tu yéetel ta wo'olal, u ti'al in wojéeltic ba'ax cu yúuchul, cu dzo'ocole' quin dzáic a wojéeltej.

⁴Jonatane' j t'aanaj yéetel Saúl u ti'al u dzáic utzil David. Tu ya'alaj ti': A Tzicbe'enile' ma' u najmal u beetic mix jun p'éel loob ti' David a palitzili', tumen ma' u beet mix jun p'éel kaas ti' a Tzicbe'enili', ba'ale' tu beetaj jun p'éel nojoch utz;

⁵tumen tu dzajubáa tu chi' quíimil le ca tu quíimsaj le j filisteo', Yuumtzile' tu tocaj jun puli' Israel. A Tzicbe'enile', j qui'imacchaj u yóol tu yo'olal. ¿Ba'ax teen bíin xi'ic a Tzicbe'enil u quíims jun túul j ma' si'ipil, u ti'al ca a quíims David wa mix ba'al kaas u beetmaj?

⁶Le ca tu yu'uba'al Saúl bix u tuucul Jonatane', tu ya'alaj: Quin jalach t'antic tu kaaba' Yuumtzil ma' bíin quíimic Davidi'.

⁷Jonatán túune' tu t'anaj Davide', ca tu tzicbaltaj ti' tuláacal ba'ax tu ya'alaj u taata. Cu dzo'ocole' tu bisaj tu yicnal Saúl, David xane' tu beetaj u palitzilil u ti'al Saúl, je'el bix suuquile'.

⁸Chu'unpaj tu ca'a téen le ba'atelo', Davide' jóok u ba'atelt le j filisteobo', ca tu pa'aj u muuko'ob, tu dzáanchetajo'obe' ca tu beetaj u púudzulo'ob.

⁹Le ca j ch'a'ab Saúl tu ca'a téen tumen le kaakas pixan túuchi'ita'an tumen Yuumtzilo'; culucbal ca'ach tu yotoch u machmaj u lóomte' ca'aliquil táan ca'ach u pax David,

¹⁰tu yóoltaj u loom David te j pak tu yéetel u lóomte'. Ba'ale' Davide' páatchaj u jechic le loomo', ca j ch'íic u lóomte' Saúl te j pako'. Ti' le áakabo', Davide' j áalcabnaje', ca j púudzi.

¹¹Saule' tu séeblaquil u túuchi'itaj u aj meyajo'ob ca xi'ico'ob tu yotoch David, u ti'al u ch'úucto'ob u jóokol tu yo'olal u quíimsico'ob tu láak kiin. Ba'ale' x Mical u yatan Davide', tu dzaj u yojéelt yéetel le t'aano'oba': Wa ma' ta jechic le quíimil ti' le áakaab'a, sáamale' quimenech.

¹²Tu séeblaquil x Micale', tu yéemsaj David tu jool coolom kiine', ca j páatchaj u púudzul David.

¹³Cu dzo'ocole' x Micale' tu ch'a'aj jun túul j beetbil kue' ca tu chicuntaj ti' káan, ca tu dzaj tu tojil u pool jun p'éel jit'bil u tzo'otzel j yuuque', ca tu pixaj yéetel jun p'éel teep'.

¹⁴Le ca tu túuchi'itaj Saúl ti' u aj ba'atelo'ob ca u macho'ob David, x Micale' tu ya'alaj ti'ob koja'an.

¹⁵Ba'ale' Saule' tu ca'a túuchi'itaj u aj ba'atelo'ob machic Davide', ca tu ya'alaj ti'ob: ¡Quex ti' yaan tu kaane', jóokese'ex ca a taase'ex ti' teen ca in quíimsej!

¹⁶U aj ba'atelo'ob Saule' j ooco'ob tu yotoch David, ba'ale' tu yilajo'ob chéen jun p'éel j beetbil ku dza'an u tzo'otzel u pool yéetel u jit'bil u tzo'otzel j yuuc yaan te j káano'.

¹⁷Saúl túune' tu ya'alaj ti' x Mical: ¿Ba'axten ta tusajen u ti'al ca a cha'a' u púudzul in aj p'eec? X Micale' tu núucaj: Tumen letie', tu jalach t'antaj u quíimsiquen wa ma' tin cha'ic u púudzul.

¹⁸Bey úuchic u páajtal u púudzul Davido'. J bin u yila'a' Samuel tu lu'umil Ramae' ca tu tzicbaltaj ti' tuláacal ba'ax beeta'ab ti' tumen Saúl. Cu dzo'ocole', David yéetel Samuele' j bino'ob j cajtal Naiot.

¹⁹Le ca tu yojéeltaj Saúl ti' yaan David Naiot tu lu'umil Ramae',

²⁰tu túuchi'itaj u aj ba'atelo'ob machic. Le ca j kuch le máaco'ob túuchi'ita'abo'ob tumen Saulo', tu yilajo'ob jun múuch' aj bóobato'ob táan u tze'eco'ob actáanta'ano'ob tumen Samuel. Tu séeblaquil j ch'a'abo'ob xan tumen u pixan Ku le máaxo'ob j túuchi'ita'ano'ob tumen Saulo', ca j jo'op' xan u tze'eco'ob.

²¹Le ca tu yojéeltaj Saule', tu túuchi'itaj u láak máaco'ob, ba'ale' jo'op' xan u tze'eco'ob. Tu túuchi'itaj Saúl u yóox jaatz, ba'ale' jo'op' xan u tze'eco'ob.

²²Saúl túune' j bin leti' Ramá, le ca j kuch tu'ux yaan u nojoch chultuunil le ja' yaan Secuo', tu káat chi'itaj tu yo'olal Samuel yéetel David, yanchaj máax a'alic ti' yano'ob Naiot tu lu'umil Ramae',

²³ca tu tojtáantaj Saúl u bini'. Ba'ale' j ch'a'ab xan tumen u pixan Ku, Saule' j jo'op' u tze'ec, ca j bin u xíimbal tac naiot tu lu'umil Ramá;

²⁴cu dzo'ocole' tu pitaj u nook, ca p'áat bey chacnulil ca'aliquil táan u tze'ec tu táan Samuel buul kiin yéetel buul áakab. Ti' cu taal le t'aan: ¿Jun túul j aj bóobat xan Saúl?