Read Yucateco 1 Samuel 2 Bible Online

1 Samuel 2 - Yucateco bible

1 Samuel 2

¹X Anae' payalchi'inaj beya': Yuumtzil, cu qui'imachajal in wóol ti' teech yéetel chuca'an óolal tumen teche' ca dzáic ti' teen túumben muuko'ob. Je'el u p'áatal in t'aan kaas tu yo'olal in aj p'eeco'obe' tumen teche' dzo'oc a wáantiquen. ¡Sen qui'imac in wóol!

²¡Yuumtzil, mix máac quili'ich je'el bix teche'! ¡C Junab Ku mix máac je'el u páajtal u canantico'on je'el bix teche'! ¡Mina'an u láak Ku je'el bix teche'!

³Mix máac unaj u t'aan yéetel ca'anal ichil, mix máac, unaj u sen nojba'alcuunsicubáa tumen Yuumtzile', leti' Junab Ku máax u láaj ojel tuláacal ba'al, Leti' p'isic yéetel leti' xot kintic ba'ax cu beetic wíinic

⁴Leti'e' cu xiixcuntic u x p'úunche'ob le aj mu'uka'ano'obo', leti' dzáic páajtalil ti' le j ma' óolalo'obo';

⁵le máaxo'ob ya'ab ba'alo'ob yaan ti'ob ca'ache', bejela'e' cu conicuba'ob chéen tu yo'olal jun xéet' waaj; ba'ale' le wi'ijo'ob ca'ache', bejela'e', yaan ba'al u jaanto'ob. Le co'olel ma' tu páajtal u yantal u chaan palo'ob ca'ache', dzo'oc u síijsaj ya'ab u téenel; ba'ale' le co'olel ya'ab u paalo'ob ca'ache', bejela'e' dzo'oc u x chuchul x nuuctal.

⁶Yuumtzil lukesic cuxtal leti' xan dzáic; cu beetic c éemel j mucnal cu beetic xan c jóokoli'.

⁷Yuumtzil óotzilcuntico'on leti' xan ayikalcuntico'on; cu beetic c lúubul, cu beetic xan c líikil.

⁸Kue' cu líikesic j lu'um le óotzilo' cu jóokesic tu'ux cu pu'ulul ta' míis le j káat yaatzilo'. u ti'al u beetic u cutal ichil nucuch máaco'ob u ti'al u beetic u wa'atal tu cúuchil tziiquil, tumen Yuumtzil u yuumil u chuun pakilo'ob le lu'uma', tu yóokolo'ob tu t'alcuntaj yóokolcaab.

⁹Leti' canantic u xáakabo'ob le j ocsaj óolalo'ob ba'ale' le j ma' ocsaj óolo'obo' cu quíimilo'ob ich éekjoch'e'enil, tumen mix máac cu béeytal chéen yéetel u muuk.

¹⁰Yuumtzil bíin u xiixcunt u aj p'eeco'ob, tu ca'anil bíin u túuchi'it u jum cháaco'ob tu yóokolo'ob. Yuumtzil bíin u p'is óolt tuláacal yóokolcaab; bíin u dzáa páajtalil ti' le ajaw u yéeymajo' bíin u nojochquint u páajtalil.

¹¹Cu dzo'ocole' j suunaj Elcana tu yotoch tu lu'umil Ramá, ba'ale' le chan j xi'ipalo' j p'áat u meyajt Yuumtzil tu yáanal u tzolbe'en t'aano'ob Elí.

¹²U paalal Elie' sen loolob wíinico'ob ca'achi, mix ba'al Yuumtzil u ti'alo'ob

¹³mix ba'al u biilal ti'ob u meeyjulo'ob le aj kiinil cu beetico'ob ca'ach u ti'al le caajo'; tumen le quéen kuchuc ca'ach wa máax u kub quíimsbil ba'alche'e', cu taal jun túul u palitzil le aj kiin yéetel jun p'éel x li'ichib tu kab ca'aliquil táan u cha'acal le bako',

¹⁴cu yocsic le x li'ichib ichil je'el ba'alac nu'uculil cáat cuume' cu cha'ic u ti'al le aj kiin tuláacal le bak cu jóokesic yéetel le x li'ichibo'. Bey u beetico'ob ca'ach ti' tuláacal j israelita cu kuchul Silo.

¹⁵Cu dzo'ocole', ma'ili' tóoca'ac le tzaatz tu yóokol u multuunil kultajo' cu kuchul u palitzil le aj kiino' cu ya'alic ti' máax cu táanbesic u quíimsbil ba'alche'o': Dzáa teen bak u ti'al j káabtal u ti'al le aj kiino'; tumen ma' bíin u kam teech bak takancunta'ani', che'eche' bak u káati'.

¹⁶Wa le máac cu táanbesaj cu ya'alic ca u pa'at u tóocal u tzaatzel u ti'al ca u ch'a'a' le buca'aj u káate'. Le palitzilo' cu núuquic: Dzáa ti' teen jun puli', tumen wa ma' ta dzáic ti' tene' quin toquic ti' teech.

¹⁷Bey túuno' sen kaas le kebano'ob cu beetico'ob le j xi'ipalalo'ob tu táan Yuumtzilo', tumen ma' tu tziquico'ob u ti'ibil óolalo'ob Yuumtzil.

¹⁸Ca'aliquile' le táanquelem j Samuelo', bin u ca'aj u meyaj tu táan Yuumtzil u búuquintmaj u efod lino u ca'aj.

¹⁹Tu jujuun ja'abil quéen xi'ic ca'ach u maama j kulnaj yéetel Elcana u yíicham u táanbeso'ob u quíimsbil ba'alche'ilo'ob le ja'abo', cu bisic ca'ach jun p'éel chan suyem nook u beetmaj leti'.

²⁰Elí túune' cu qui' t'antic ca'ach Elcana yéetel u yatan táan u ya'alic: Yuumtzil ca u dzáa ti' teech paalalo'ob yéetel le co'olela', u ti'al u jeelint le tu jun páaycuntaj leti'o'.

²¹Yuumtzil túune' cu qui' t'antic ca'ach x Anae', leti'e' cu x yo'ontal. Bey túuno' x Anae' tu síijsaj óox túul j xibil paalo'ob yéetel ca'a túul u x ch'upul paalo'ob, ca'aliquil chan j Samuele' xi'ic u bin u nojochtal tu táan Yuumtzil.

²²Elie', dzo'oc ca'ach u sen ch'íijil, ba'ale' u láaj ojel ba'ax cu beetic u paalal ti' le j israelitaobo', bey xan u yojel cu chitalo'ob bin yéetel le co'olelo'ob cu meyajo'ob tu jool u noj Paselil u yúuchul Much'tal yéetel Ku.

²³Leti' túune' tu ya'alaj ti'ob: Tuláacal yóokolcaab tzicbaltic ti' teen a kaakas cuxtale'ex. ¿Ba'axten ca beetique'ex beyo'?

²⁴Ma' a beetique'ex beyo' in paale'ex, ma' utz le ba'ax cu tzicbalta'al tumen u caajal Yuumtzil ta wo'olale'exo'.

²⁵Wa cu yantal u si'ipil jun túul máac ti' u láak máaque', je'el u páajtal u sa'atsa'al u si'ipil tumen Yuumtzile', ba'ale' le máax poch'ic Yuumtzile' ¿máax bíin sa'atsic u si'ipil? Ba'ale' leti'obe' ma' tu táan óoltajo'ob ba'ax a'ala'ab ti'ob tumen u taataobi', tumen Yuumtzile' dzo'oc u xot kintic u tzelic u cuxtalo'ob.

²⁶Ca'aliquil chan j Samuele', xi'ic u bin u nojochtal, u cuxtale' utz u yila'al tumen Ku beyxan tumen le máaco'obo'.

²⁷Ti' le kiino'obo', j kuch jun túul aj bóobat xíimbaltic Elie' ca tu ya'alaj ti': Yuumtzile' dzo'oc u ya'alic beya': Le ca'ach ti' yaan a manja'an ch'i'ibalo'ob Egipto palitzilta'ano'ob tumen faraone', jach sáasil tin chíicbesimbáa ti'ob.

²⁸Ichil tuláacal u ch'i'ibalo'ob Israele', tin yéeyajo'ob u ti'al in aj kiinto'ob, u ti'al kubo'ob ti' teen le ba'axo'ob cu láaj tóocal tu multuunil in kulta'al, bey xan u ti'al u tóoco'ob poom ti' teen, yéetel u ti'al u búuquintico'ob le efod tin táano'. Cu dzo'ocole' tin dzaj ti' a máanja'an ch'i'ibalo'ob tuláacal le ti'ibil óolal cu tóocal tumen le j israelitaob tu nojbe'enil Yuumtzilo'.

²⁹¿Ba'axten ca cúulpachcuntique'ex le quíimsbil ba'alche'ob yéetel le ti'ibil óolalo'ob in túuchi'itmaj ca dzo'ocbesa'aco'obo'? ¿Ba'axten ca táanilcuntic a paalalo'ob ti' teen u ti'al a polocquintico'ob yéetel u asab ma'alobil u ti'ibil óolal in caajal Israel?

³⁰Bejela'a túune', Yuumtzil u Junab Ku Israel le máax tu ya'alaj ca'ach teech bíin a meyajt pa'ate' yéetel a paalalo'ob tuláacal kiino'obe', cu ya'alic: Ma' bíin in cha'a u yúuchul beyo', tumen tene' bíin in nojbe'encunt le máaxo'ob nojbe'encuntiquene', le máaxo'ob cúulpachcuntiquene', bíin p'áatco'ob sublaco'ob. Teen Yuumtzil máax jéedz t'antic.

³¹Táan u náadzal u kiinil in xu'ulsic a páajtalil yéetel u páajtalil a máanja'an ch'i'ibalo'ob, mix jun túul ti' a paalal bíin kuchuc nuxibtal.

³²Bíin a wila'a' yéetel yaj óol bey xan yéetel dzíibolal tuláacal le utz bíin in beet tu lu'umil Israel, mix máac ti' a paalal bíin nuxibchajac.

³³Ba'ale' bíin in p'at wa máax ti' a láako'ob naadz ti' u multuunil in kulta'al, u ti'al ca xu'upuc u yicho'ob yéetel dzíibolaj bey xan yéetel u yaj óolal u cuxtal, tuláacal xan u chuucáan a ch'i'ibalo'obe', bíin quíimsa'aco'ob.

³⁴Bíin meyajnac ti' teech chíiculalil ba'ax bíin úuchuc ti' a paalal Ofni yéetel Finees: tu ca'a túulilo'ob bíin quíimico'ob jun p'éelili' kiin.

³⁵Cu dzo'ocole' bíin in dzáa jun túul aj kiin nu'uca'an u jach kubmaj teen u yóol u ti'al u dzo'ocbes ba'ax in káat yéetel je'el bix in káate', bíin in dzáa u ch'i'ibal mantadz kiino'ob, bíin in beet u meyajtic le ajaw bíin in yéeye'.

³⁶Le máax túun bíin p'áatac cuxa'an ti' a ch'i'ibale' bíin taalac chíin pool tu táan leti', u ti'al ca u kam jun p'éel taakin plata u ca'aj wa jun xéet' waaj, bíin u babal káat ca dza'abac wa ba'ax meeyjul ti' ichil le aj kiino'ob u ti'al u náajaltic u janalo'.