Read Yucateco 1 Samuel 21 Bible Online

1 Samuel 21 - Yucateco bible

1 Samuel 21

¹Davide' tu ch'a'aj u tojil Nobe', ca j bin u yila'a aj kiin Ahimelec, leti'e' jóok jaka'an u yóol u nuptáante' ca tu káat chi'itaj ti': ¿Ba'axten ca taal ta juunal mix máac láakintiquech?

²Davide' tu núucaj: Ajawe tu kuben t'antaj ti' teen ca in beet juun p'éel ba'al, tu ya'alaj xan teen ma' unaj u yojéelta'al ba'ax o'olal tu túuchi'itajeni', mix unaj u yojéelta'al ba'ax t'aanilo'ob quin taasiqui'. Le j xiibo'ob in wéet taalaco'oba', tin wa'alaj ti'ob tu'ux bíin in wilo'ob.

³Bey túuno', ¿ba'ax yaan ta wicnal u ti'al jaantbil? dzáaten cinco waajo'ob wa quex je'el jay p'éel yaan ti' teche'.

⁴Le waaj yaan teno', ma' chéen je'el ba'ax waajile', jun páaycuuna'an. Ba'ale' bíin in dzáa ti' teech wa ma' u yocsuba'ob yéetel co'olelo'ob le máaco'ob láakintmailecho'.

⁵Davide' tu núucaj tu jaajil u yóol: Je'el bix suuquil c jóokol j ba'atele', le co'olelo'obo' ma'atech u láakintico'ono'ob. Quex tumen lela' jun p'éel xíimbal suuc c beetic, le máaxo'ob láakintqueno', utz yanilo'ob ca jóoko'ob, bejela'e' dzo'oc u asab yutztal yanilo'ob.

⁶Le aj kiin túuno', tu kubaj ti' David le waaj jun páaycunta'ano', tumen te'elo', chéen yaan le waajo'ob jun páaycunta'ano'ob u ti'al Yuumtzil lukesa'abo'ob ti' le kiinac te tu multuunil kultaj u ti'al u dza'abal choco waajo'ob u jeelinto'ob.

⁷Ti' le kiinaco', ti' yaan ca'ach te j cúuchil jun túul u nojoch aj canan tamano'ob dza'an tumen Saúl, leti'e' yanchaj u p'áatal te j quili'ich najo'. Leti'e' jun túul j edomil cu kaaba'intic Doeg, u j nojoch u aj canan j tamano'ob Saúl.

⁸Davide' tu ya'alaj ti' Ahimelec: ¿Yaan wa ta kab jun p'éel lóomte' wa jun p'éel máascab? Bey sen kabéet in dzo'ocbesic u kuben t'aan le ajawo', ma' páatchaj in ch'aic in máascab yéetel u láak u nu'uculo'ob in ba'ateli'.

⁹Le aj kiino' tu núucaj ti': Yaan way tin wicnal u máascab Goliat le j filisteo ta pa'aj u muuk tu táax kóomil Elae. Ti' yaan tu paach le Efodo', to'an yéetel jun p'éel teep'. Wa a káate', je'el u páajtal a bisique'; mina'an u láak u nu'ucul ba'atel waye'. Davide' tu núucaj: Mina'an u láak asab ma'alob ti' lelo'. Dzáa ti' teen.

¹⁰Ti' le kiino', Davide' ma' jáaw u púudzul ti' Sauli, j bin u ye'esubáa ti' Laquis u ajawil Gat.

¹¹U nuuquilo'ob u aj ba'atelo'ob Gate' tu ya'alajo'ob ti': ¡Lela', David baacáan, u palitzil Saúl, u ajawil le lu'uma'! ¡Ti' leti' j úuch kaay ichil le óokoto'ob: Mil j xiibo'ob tu quíimsaj Saúl, dies mil j xiibo'ob tu quíimsaj David!

¹²Davide' ma' tu tu'ubsaj le tzicbalo'ob cu beeta'alo', ca tu ch'a'aj sajaquil ti' Laquis u ajawil Gat.

¹³Let o'olale', Davide' tu beetaj bey dzo'oc u chocotal u poole' ca'a j jo'op' u máan u jóojom dzíibt jool najo'ob, bey xan tu beetaj u yáalcab u kaab u túub tu me'ex.

¹⁴Laquis túune' tu ya'alaj ti' u nuuquil u aj meyajo'ob: Wa ta wilaje'ex choco u pool le máaca', ¿ba'ax o'olal ta taasaje'ex ti' teen?

¹⁵¿Ca tucultique'ex wa kabéet j chocol poolo'ob tin wicnal u ti'al ca a taase'ex u beet u chocol pool ba'alo'ob tin wotoch?