Read Yucateco 1 Samuel 23 Bible Online

1 Samuel 23 - Yucateco bible

1 Samuel 23

¹Jun p'éel kiine' le j filisteobo', tu ba'ateltajo'ob u caajil Keylae', ca tu yocoltajo'ob le trigo táantic u p'u'uchulo'. Le ca j dzaab u yojéelt Davide',

²leti'e', j bin j káat chi'it ti' Yuumtzil beya'. ¿Ca cha'ic wa in bin in ba'atelt le j filisteobo'? Yuumtzile' tu núucaj ti': Ma'alob, xeen a ba'atelto'ob, toc u caajil Keila.

³Ba'ale' le j xiibo'ob yano'ob tu yéetel Davido' tu ya'alajo'ob: Wa sajaco'on yanilo'on way Judae', ¡cux túun le quéen xi'ico'on Keila u ti'al c ba'atelt u aj ba'atelo'ob le j filisteobo'!

⁴Ba'ale' Davide', j káat chi'inaj tu ca'a téen ti' Yuumtzil, Yuumtzile' tu ya'alaj ti': Cha'a' u tojil Keila, tumen teen bíin in kub ta kab le j filisteobo'.

⁵David yéetel u aj ba'atelo'obe', j líik u binbalo'ob Keila, te'elo', tu ba'ateltajo'ob le j filisteobo', ca tu jach pa'ajo'ob u muuko'ob, ca xan tu tocajo'ob u yaalako'ob. Bey úuchic u to'ocol u caajil Keila tumen David.

⁶Ca'aliquil Abiatar, u paal Ahimeleque', dzo'oc ca'ach u púudzul yéetel u tuuculil u bin Keila tu yicnal David, tu bisaj xan le efodo'.

⁷Saúl xane' tu yojéeltaj ti' yaan David Keilae', ca tu tucultaj: Dzo'oc u ku'ubul tin kab tumen Ku, tumen le ca j ooc Keilae', j p'áat ichil, tumen kala'an u jool najilo'ob yéetel u x kalabilo'ob.

⁸Tu séeblaquile', Saule' tu túuchi'itaj t'anbil tuláacal u aj ba'atelo'ob u ti'al u bino'ob keila u bakpacht David pa'ate' yéetel u aj ba'atelo'ob.

⁹Ba'ale' le ca tu yojéeltaj David táan u tuculta'al u ba'atelta'al tumen Saule', tu ya'alaj ti' aj kiin Abiatar ca u taas le efod u ti'al u káatanquil ti' Yuumtzil.

¹⁰Ca tu ya'alaj David: Yuumtzil u Ku Israel, a palitzile' u yojel yaan u tuuculil u taal Saúl u xu'uls Keila tin wo'olal.

¹¹¿Bíin wa taalac Saúl u caxanten je'el bix dzo'oc in wojéeltico'? ¿Bíin wa u kubeno'ob u caajnáalilo'ob Keila? ¡Yuumtzil u Ku Israel, a palitzila' cu káat óoltic ti' teech ca a wa'al ti' teen! Yuumtzile' tu núucaj: Saule', bíin taalac.

¹²David túune' tu káat chi'itaj: ¿Bíin wa ku'ubco'on pa'ate' yéetel in aj láakinajo'ob tu kab Saúl tumen u caajnáalio'ob Keyla,? Yuumtzile' tu núucaj: Bíin u ku'ubque'ex.

¹³David túun yéetel míin seiscientos j xiibo'ob yaan tu yicnalo', jóoko'ob Keilae', ca j bino'ob chéen je'el tu'uxaque'. Le ca tu yojéeltaj Saúl dzo'oc u púudzul David Keilae', tu p'ataj u tucultic u ch'a'apachtic.

¹⁴Bey túuno' Davide' j p'áat cajtal ti' dze'edzec tuulumo'ob yaan tu x tocoy lu'umil Sif, quex tumen sáansamal táan ca'ach u caxta'al tumen Saule', ma' j ku'ub tu kab tumen Kui'.

¹⁵Ba'ale', Davide', sajac ca'ach ti' Saúl, tumen joka'an yéetel u tuuculil u quíimsic. Let o'olal j p'áat Hores tu x tocoy lu'umil Sif.

¹⁶Jun p'éel kiine', Jonatán u paal Saule', j bin u yila'a David Hores, u ti'al ca yanac u yóol, yéetel ca mu'uka'anchajac u alab óolal ti' Ku.

¹⁷Tu ya'alaj ti': Ma' a ch'a'ic sajaquil, tumen in taata Saule', ma' bíin páatac u nuptáantiquechi'. Teche' bíin kuchuquech a beet u ajawil Israel, teen bíin in beet in nojochil ta wéetel. Lela' tac in taata ojéeltmail.

¹⁸Tu ca'a túulalo'ob túun tu beetajo'ob jun p'éel nup t'aane', ca tu dzajo'ob Yuumtzil u ti'al aj jaajcunajil. Cu dzo'ocole' Jonatane', j suunaj tu yotoch, Davide' j p'áat Hores.

¹⁹Ba'ale' u caajnáalilo'ob Sife', j bino'ob Gabaa j t'aan yéetel Saule', ca tu ya'alajo'ob ti': Davide', u ta'acbesmajubáa t lu'um, ti' yaan ti' jujun p'éel le tuulumo'ob yaan tu pu'uquilo'ob Haquila, te j Hores yaan tu noojol x tocoy lu'umo'.

²⁰Let o'olale', je'el ba'ax kiin bíin u yóolt a Tzicbe'enil j taale', taalac u ti'al ca c kub ti'.

²¹Saule', tu núucaj: ¡Ku bíin qui' t'antique'ex, tu yo'olal táan a ch'a'ique'ex óotzilil ti' teen!

²²Bejela'a' túune', quin káat óoltic ti' te'ex ca xi'ique'ex a káat péectzilte'ex tu'ux cúuchil yaan, tumen dzo'oc u tzicbalta'al ti' teen sen yaan u na'at.

²³Ile'ex tu'ux cúuchilo'ob cu yocol u ta'acbesmajubáe', ca a túuchi'ite'ex a'albil ti' teen jach tu'uxe', ca xi'iquen ta wéetele'ex. Wa tu jaajil ti' yaan te'elo', tene' bíin in xakal caxant ichil tuláacal u láaktzililo'ob Judá.

²⁴Le j sifilo'obo', tu ya'alajo'ob táan u suuto'ob tu lu'umo'ob, ca j a'ala'ab ti'ob tumen Saúl ca suunaco'ob tu caajalo'ob. David yéetel máaxo'ob láakintique', ti' yano'ob ca'ach tu x tocoy lu'umil Maón, te j táax lu'um yaan tu noojol le x tocoy lu'umo',

²⁵Saúl yéetel u aj ba'atelo'obe', jo'op' u bino'ob u ti'al u caxanto'ob. Le ca j bisa'ab u péectzilil ti' Davide', letie', j éem te j nojoch tuunich yaan tu x tocoy lu'umil Maón. Le ca tu yojéeltaj Saule', j bin u ch'a'apacht David tu x tocoy lu'umil Maón.

²⁶Ti' jun tzéel le pu'uco', cu bin Saúl ca'ach yéetel u aj ba'atelo'ob, ti' u láak jun tzéele', David yéetel máaxo'ob láakintmajilo', táan ca'ach u séeba'an xíimbalo'ob u ti'al u náachtalo'ob ti' Saúl. Le ca j dzo'oc u bakpachta'al tu'ux yaan David yéetel ma'axo'ob láakintic u ti'al u ma'achal tumen Saule',

²⁷j kuch jun túul aj bisaj t'aan u ya'al ti' Saúl: ¡Séeb suunac a Tzicbe'enil, tumen le j filisteobo', dzo'oc u búut'ulo'ob t lu'ume'ex!

²⁸Saúl túune' tu p'áataj u ch'a'apachtic Davide', ca j bin u ba'atelt le j filisteobo'. Let o'olale', le cúuchilo', j dzaab u kaaba'int, U suytuunil jatzbáil.

²⁹Davide' j luk te'elo', ca j bin cajtal tu tuulumilo'ob En-gandi.