Read Yucateco 1 Samuel 24 Bible Online

1 Samuel 24 - Yucateco bible

1 Samuel 24

¹Le ca j suunaj Saúl dzo'oc u ch'a'apachtic le j filisteobo', tu yu'ubaj u péectzilil ti' yaan David tu x tocoy lu'umil En-gandie'.

²Saúl túune' tu yéeyaj tres mil j xiibo'ob ti' tuláacal u lu'umil Israele', ca j bin u caxant j David pa'ate' yéetel máaxo'ob láakintmail te j suytuuno'ob asab ca'analo'obo'.

³Ca'aliquil táan u bine' j kuch tu'ux yaan u múuch'ul j tamano'ob, nadza'an ti' jun p'éel áactun tu'ux u ta'acbesmajubáa David yéetel u aj ba'atelo'ob. Saule' j ooc ichil tumen yaan ba'ax mucul kabéetchaj u beetic.

⁴U aj ba'atelo'ob David túune', tu ya'alajo'ob ti': Bejela'e', cu dzo'ocpajal le jalach t'aan tu beetaj ti' teech Yuumtzil u dzáic ta kab a aj p'eec. Beet ti' le ba'ax ma'alob ca tucultique'. David túune', j líik chanbeelile', ca tu xotaj jun xéet' u teep' Saúl;

⁵ba'ale' cu dzo'ocol u xotique', yajchaj tu yóol le ba'ax tu beetajo',

⁶ca tu ya'alaj ti' u aj ba'atelo'ob: ¡Yuumtzil ca u yáanten u ti'al ma' in líikesic in kab tu yóokol le ajaw in dzuulilo'! ¡Wa leti' ajawe', Yuumtzil yéeymail u ti'al ajawil!

⁷Bey úuchic u kexic David u tuucul u aj ba'atelo'ob u ti'al ma' u beetico'ob loob ti' Saúl, jóok ichil le áactuno', ca tu ch'a'aj u beel.

⁸Tu séeblaquil jóok David ichil le áactuno', ca tu yawat a'alaj ti': ¡A Tzicbe'enil, a Tzicbe'enil! Saule', tu suutaj u yich paachil, ca j noclaj David tac j lu'um u ti'al u tziquic,

⁹ca tu ya'alaj ti': ¿Ba'ax teen cu yu'ubic a Tzicbe'enil u t'aan máaxo'ob a'alic táan in caxtix in beetic ti' teech loob?

¹⁰A Tzicbe'enile' chica'an u yilic quex tu dzaj Yuumtzil a Tzicbe'enil tin kab ichil le áactuno', ma' tin wóoltaj in quíims a Tzicbe'enili', ba'ale' tin p'ataj a cuxtal, tumen tin tucultaj tin baatzil wa ajaw a Tzicbe'enile', Yuumtzil dzaamail ti' teche' ca a beet a ajawil.

¹¹U yila'a' ma'alob a Tzicbe'enil ba'ax yaan tin kab: jun xéet' u teep' a Tzicbe'enil, páatchaj ca'ach in quíimsiquech. Yéetel lelo', je'el u páajtal u yilic a Tzicbe'enil mina'an ti' teen u tuuculil in beetic ti' teech loob, mix in kéex óoltiquechi', mix yanac in si'ipil ti' techi'. Ba'ale', a Tzicbe'enile' táan u ch'a'apachtiquen u ti'al u quíimsiquem.

¹²¡Yuumtzil ca u p'is óolto'on tu ca'a túulalo'on, ca u sut u jeel loob ti' a Tzicbe'enil! Tene', ma' bíin in líikes in kab ti' a Tzicbe'enili'.

¹³Jun p'éel úuchben t'aane' cu ya'alic: Le kaaso' cu taal ti' kaakas máaco'ob; Let o'olal tene', mix bikin bíin in líiks in kab ti' a Tzicbe'enil.

¹⁴¿Cu dzo'ocole', tu paach máax jóok u ajawil Israel? ¿Máax u ch'a'apachtmaj? ¡Teen, quex tumen chéen beyen j quimen peeke', wa beyen jun túul ch'ique'!

¹⁵Let o'olale', Yuumtzil bíin u p'is óolto'on tu ca'a túulalo'on; ¡Leti' bíin u xakal il ba'ax cu yúuchul ti' teen u ti'al u canantiquen ti' a Tzicbe'enil!

¹⁶Le ca j dzo'oc u t'aan Davide', Saule' tu ka'am a'alaj: ¡David in paal, teech baacáan t'aaniquen! J wéek u yokole',

¹⁷ca tu ya'alaj ti': Teech beetic ba'ax toj, tumen ta beetaj ti' teen utz u ti'al u jeelint le kaas tin beetaj ti' techo.

¹⁸Bejela'e', dzo'oc a we'esic ti' teen táan a caxantic utz in ti'al, tumen quex tu kubajen Yuumtzil ta kabe', ma' ta quíimsajeni'.

¹⁹Tu jaajile', mina'an mix máac je'el u cha'ic u bin toj u yóol yéetel cuxa'an u aj p'eec le kiin cu nactáantique'. Let o'olale', ¡Yuumtzil bíin u bo'ot teech yéetel utz le ba'ax dzo'oc a beetic tin wéetela'!

²⁰Bejela'e', ma'alob in wilic teech bíin a beet a ajawil, cu dzo'ocole', yáanal a méektáane', bíin ayikalchajac Israel.

²¹Jalach t'ant tu kaaba' Yuumtzil, ma' bíin a xu'uls in ch'i'ibali', mix bíin a beet u tu'ubsa'al in kaaba' tu yóokol in wotochi'.

²²Davide', tu jalach t'antaj ti' Saúl, cu dzo'ocole' Saule', j suunaj tu jalach naj, ca'aliquil David yéetel u aj ba'atelo'obe', j suunajo'ob te j tuulumo'.