Read Yucateco 1 Samuel 25 Bible Online

1 Samuel 25 - Yucateco bible

1 Samuel 25

¹Samuele', j quíimi, le j israelitaobo', tu much'ajuba'ob u yokolto'ob quíimic. J mu'uc tu yotoch, tu lu'umil Ramá. Cu dzo'ocole' Davide', j bin tu x tocoy lu'umil Parán.

²Yaan ca'ach tu caajil Maón jun túul máac jach ayikal, u taatail ca'ach tres mil j tamano'ob yéetel mil j yuuco'ob, ti' ca'ach cu meyaj Carmel tu'ux suuc u ko'osol le j tamano'obo'.

³Le máaco' tu kaaba'intaj ca'ach Nabal, ti' u ch'i'ibal Caleb ca'ach u taal; leti'e' jun túul máac jach dzíic u t'aan yéetel kaakas máac. Ba'ale' x Abigail u yatane', sen qui'ichpam yéetel yaan u na'at.

⁴Ca'aliquil ti' yaan David te x tocoy lu'umo', tu yojéeltaj ti' yaan Nabal Carmel u ti'al u kosláant u j tamano'obe', ca tu túuchi'itaj diez u palitzilo'ob u ti'al u te'escuntico'ob Nabal

⁵

⁶yéetel u dza'ob le péectzil ti'a': In láaktzil, quin dzíiboltic ti' teech utzil jéedzel bey xan ti' tuláacal a láako'ob.

⁷Dzo'oc in wojéeltic táan a kosláantic a j tamano'ob. A wojel xan ti' yanchaj a j canan j tamano'ob Carmel t éetel, ca'aliquil ti' yano'ob t icnale', ma' t beetaj mix ba'al u ti'al u kuuxilo'obi', mix j to'oc wa ba'ax ti'obi'.

⁸Je'el u páajtal a káat chi'itic ti' a palitzilo'ob wa jaaje', leti'obe' je'el u jajcuntico'ob ti' teche'. Beje'ela' túune', quin káat óoltic ti' teech ca a ch'a'a' óotzilil ti' le j xi'ipalalo'ob cu kuchulo'ob ta wicnal ti' ma'alob kiina', ca a dzáa ti' to'on le ba'ax yaan ta kabe', tumen tene' beyen jun túul a paale'.

⁹U palitzilo'ob Davide' j bino'ob u ya'alo'ob ti' Nabal le t'aana', ca j p'áato'ob u p'áato'ob u núuc t'aanil.

¹⁰Ba'ale' Nabale' tu núucaj ti'ob: ¿Máax David? ¿Máax u paal Isaíi'? ¡Bejela'e', ya'ab palitzilo'ob cu púudzulo'ob ti' u dzuulilo'ob!

¹¹¿Bin in ca'aj wa in ch'a'a' le janal, le ukul yéetel le bak dzo'oc in máakantic u ti'al in aj kooso'oba', in dzáa ti' wíinico'ob ma' in wojel tu'ux u taalo'obi'?

¹²U palitzilo'ob Davide', j suunajo'ob, le ca j kucho'obe' tu tzicbaltajo'ob ti' David tuláacal ba'ax tu ya'alaj Nabal.

¹³David túune' tu ya'alaj ti' u aj ba'atelo'ob: ¡Tuláacale'ex líiksaba'ex j ba'atel! U aj ba'atelo'obe' tu kaxnaktajo'ob u máascabo'ob, bey xan David; ca'aliquil cuatrocientos j xiibo'ob j bino'ob yéetele', docientos ti'obe' j p'áato'ob u cananto'ob u nu'uculo'ob.

¹⁴Ba'ale' jun túul u palitzil Nabale', j bin u ya'al ti' x Abigail u yatan Nabal: Líikbal x tocoy lu'ume', Davide' tu túuchi'itaj dze'edzec aj bisaj t'aano'ob tziquic c dzuulil, ba'ale' letie', kaas úuchic u káat núuctic u t'aano'ob.

¹⁵Cu dzo'ocole', le máaco'obo', sen ma'alob tu bisajicuba'ob t éetel. Tuláacal le kiino'ob j máanico'on tu yéetelo'ob te j káaxo', mix jun téen tu beetajo'ob c kuuxil, mix tu tocajo'ob to'on mix ba'ali'.

¹⁶Tu yóokol lelo' tu canantajo'ono'on pa'ate' yéetel c tamano'ob, buul kiino'ob yéetel buul áakabo'ob.

¹⁷Ba'ale', bey jach kaas u p'u'ujul a wíichamo' ma' tu páajtal u ya'ala'al mix ba'al ti'o', tucult yéetel il ba'ax bíin a beete, tumen yaan ba'ax kaas bíin úuchuc ti' leti' yéetel ti' u yotoch.

¹⁸Tu séeblaquil x Abigaile', tu ch'a'aj docientos waajo'ob, ca'a p'éel u chúujil u kéewelel vino, cinco ka'atbil j tamano'ob, yéetel cuarenta u kilos kéelbil janalbe'en neeko'ob, cien u piimpim waajilo'ob pasas yéetel docientos u piimpim waajilo'ob tiquin igo'ob; cu dzo'ocole' tu dzaj tuláacal tu yóokol burrobe',

¹⁹ca tu ya'alaj ti' u palitzilo'ob: Xeene'ex táanil, je'el quin taal ta paache'exo'. Ma' tu ya'alaj mix ba'al ti' u yíichami'.

²⁰x Abigaile', tu nat'aj u burroe', ca jo'op' u yéemel ta'acunta'aquil ti' le pu'uco'. Ti' lelo' tu téec ilaj táan u taal David yéetel u aj ba'atelo'obe', ca j bin u ch'a'a u beelo'ob.

²¹Davide', táan ca'ach u tucultic chéen cunel tu canantilac te x tocoy lu'um tuláacal ba'ax yaan ti' Nabal, quex mix ba'al tu tocaj ti' Nabale', letie' tu sutaj kaas le utz beeta'ab ti'o'.

²²Bey túuno' tu jalach t'antaj: ¡Ku ca u chichich jadzen wa walquil sáamal ma' tin xu'ulsaj tuláacal u j xiibilo'ob u láaktzilo'obo'!

²³Chéen p'elac tu yiljilac x Abigail táan u taal Davide', éem tu yóokol u burroe', ca j noclaj lu'um u ti'al u te'escuntic.

²⁴Xolaj tu ni' u yooque', ca tu ya'alaj ti': ¡In dzuulil, le si'ipilo' lúubuc tin wóokol! Quin káat óoltic ti' teech ca a cha'a in t'aan.

²⁵Ma' a yaj óoltic ba'ax tu beetaj Nabal, le j ma' na'at wíinico', u cuxtale', bey je'el bix u kaaba'o', jach mina'an u na'at. Bey suuquil u beetico'. A x palitzila', ma' tu yilaj le palitzilo'ob ta túuchi'itajo'obo'.

²⁶Ba'ale', míin Yuumtzil ma' tu yóoltaj ca taalaquech a wec ki'ik u ti'al a beetic p'is óol ta kabili'. ¡U yóolt Yuumtzil ca lúubuc tuláacal a aj p'eeco'ob caxtic a loobil je'el bix bíin lúubuc Nabale'!

²⁷Bejela'a' túune' quin káat óoltic ti' teech ca a t'ox ti' a palitzilo'ob láakintmailech le ba'axo'ob tin taasaj ti' techa',

²⁸sa'ates xan u si'ipil a x palitzila'. Ku bíin u beet a jéedzel yéetel a ch'i'ibal ta jalach káanche', tumen teche' táan a ba'atel tu yo'olal Yuumtzil, bey túuno', ma' bíin úuchuc ti' teech loob tuláacal u kiinil a cuxtali'.

²⁹Wa yaan máax ch'a'apachtiquech u ti'al ca u quíimseche', a cuxtale' ma'alob canaanta'anil tumen Yuumtzil a Junab Ku. Wa tu yo'olal a aj p'eeco'obe', bíin pu'uluco'ob je'el bix u yúuchul ch'iin yéetel yúuntune'.

³⁰Bey túuno', le quéen u dzo'ocbes Yuumtzil le ba'ax u ya'almaj ta wo'olalo', le quéen u dzáech a beet u nojochil Israelo',

³¹ma' bíin yanac ti' teech u yaj óolil mix u chi'ichna'aquil a wecmail u ki'ikel máax mina'an u si'ipil úuchic a beetic p'is óol ta kabili'. Bey túuno' le quéen dza'abac ti' teech ayikalil tumen Yuumtzile', ka'ajac ti' teech a x palitzila'.

³²Davide' tu núucaj ti': Qui'it'antbil Yuumtzil u Ku Israel tu túuchi'itaj ti' teech a nuptáanteen,

³³u qui' t'antech xan Yuumtzil tu yo'olal a ma'alob tuucul, tumen bejela'e', dzo'oc a wet'ic in wequic ki'ik yéetel in beetic p'is óol tin kabil.

³⁴Ba'ale' quin jalach t'antic ti' teech tu kaaba' Yuumtzil u Ku Israel máax tu wet'aj in beetic ti' teech loob, tumen wa ma' úuchic a séebcuntic a taal a nuptáantene', sáamale', ma' bíin p'áatac ca'ach cuxa'an mix jun túul j xiib ti' Nabali'.

³⁵Cu dzo'ocole' Davide', tu kamaj tu kab leti' le ba'ax tu bisajo', ca tu ya'alaj ti': Je'el u páajtal a bin yéetel jéedzel ta wotoche'. Je'el bix a wilico', dzo'oc táan óoltic tuláacal ba'ax ta wa'alaj ti' teen, yéetel bíin in beet le ba'ax ta káataj ti' teno'.

³⁶Le ca j suunaj x Abigail tu'ux yaan Nabale', tu yilaj táan u beetic jun p'éel nojoch janal je'el bix u beetic janal jun túul ajawe'. Sen qui'imac u yóol yéetel jach cala'an. Let o'olal leti'e' ma' tu ya'alaj mix ba'al ti', tu pa'ataj u láak kiin.

³⁷Tu láak kiin le ca j suunaj u yóol ti' u cala'anil Nabale', x Abigaile', tu tzolaj ma'alob ti' tuláacal le ba'ax úucho', ca téec tza'ay jun p'éel koja'anil ti' Nabale', ca j tu'uch'chaj u wíinclil.

³⁸Cu dzo'ocol u máan diez kiino'obe', Nabale', ca j loobilta'ab tumen Yuumtzile', ca j quíimi.

³⁹Le ca tu yojéeltaj David dzo'oc u quíimil Nabale', tu ya'alaj: ¡Qui'it'aanbil Yuumtzil, tumen tu dzaj u bo'olal tu poch'ilaquen Nabal! ¡Tu tocajen u ti'al ma' in beetic kaas, tu beetaj u lúubul tu yóokol Nabal u kasa'anil! Cu dzo'ocole' Davide' tu túuchi'itaj ti' x Abigail u bisaj t'aanil dzo'ocol beel.

⁴⁰Le ca j kucho'ob Carmel u palitzilo'ob David u ti'al u t'aano'ob yéetele', tu ya'alajo'ob ti': Davide', tu túuchi'itajo'on c ch'a'ech, tumen u kaat u yataninteech.

⁴¹X Abigaile', j noclaj lu'um yéetel tziiquile', ca tu núucaj: Tene' chéen jun túul x palitzilen u ti'al David, bíin in p'o'o' u yooco'ob u palitzilo'ob wa cu túuchi'itic ti' teen ca in beete.

⁴²Cu dzo'ocol u ya'alic beyo', tu séeseb líiksajuba'e', ca j láakinta'ab tumen cinco u palitzilo'obe', ca tu nat'aj u burro u ti'al u bin tu paach u palitzilo'ob David, ca j dzo'oc u beel tu yéetel.

⁴³Davide', j dzo'oc xan u beel yéetel x Ahinoam x jezrrelil, tu ca'a túulilo'ob atanta'abo'ob tumen David.

⁴⁴Saule', dzo'oquili' ca'ach u kubic x Mical u x ch'upul paal u yatan David, ti' Paalti, u paal Lais, cajnáal Galim.