Read Yucateco 1 Samuel 26 Bible Online

1 Samuel 26 - Yucateco bible

1 Samuel 26

¹U cajnáalilo'ob Sife', j bino'ob Gabaa j t'aan yéetel Saule' ca tu ya'alajo'ob ti': Davide' u ta'acbesmajubáa tu jo'ol lu'umil Haquila, actáan ti' x tocoy lu'um.

²Saúl túune' jóok u binbal láakinta'an tumen tres mil j israelitaob u asab ma'alobil u aj ba'atelo'obe', ca j bin te x tocoy lu'um u caxant Davido'.

³Je'elo'ob tu jo'ol lu'umil Haquila ti' yaan tu jáal bej actáan ti' le x tocoy lu'umo'. Ba'ale', bey ti' yaan David te x tocoy lu'umo', tu yilaj táan u ch'a'apachta'al tumen Saúl tac te'elo',

⁴ca tu túuchi'itaj j naana' icho'ob u yilo'ob tac tu'ux dzo'oc u kuchul Saúl.

⁵Cu dzo'ocole', j bin tac te j cúuchil tu'ux jelecbal Saulo', ca tu ma'alob ilaj tu'ux cu wenelo'ob Saúl yéetel Abner u paal Ner u náacomil u aj ba'atelo'ob Saúl. Ba'ale' Saule', cu wenel ca'ach bakpachta'an tumen u aj ba'atelo'ob tu cúuchil tu'ux jelecbalo'obo'.

⁶David túune' j t'aanaj yéetel Ahimelec j hititail bey xan yéetel Abisai u paal x Sarvia u sucu'un Joab, ca tu káat chi'itaj ti'ob: ¿Máax yaan u yóol j éemel tin wéetel tu cúuchil u je'elel Saúl u ti'al j kuchul tu yicnal? Abisaie' tu núucaj: teen bíin éemquen ta wéetel.

⁷Ti' le áakabo', David yéetel Abisaie', j bino'ob tu cúuchil tu'ux jelecbalo'ob. Saule', táan ca'ach u wenel tu chúumuc tu'ux jelecbalo'obo', tu tzéel u káamjo'ole' u ch'icmaj ca'ach j lu'um u lóomte'. Abner yéetel múuch' aj ba'atelo'obe', chilicbalo'ob ca'ach tu bakpach leti'.

⁸Abisai túune' tu ya'alaj ti' David: Kue', dzo'oc u kubic ta kab a aj p'eec. Cha'a in quíimsic ti' le súutuca', ca in ch'íic loom te j lu'um yéetel u lóomteo'. Chéen jun p'éel loom kabéet.

⁹Ba'ale' Davide' tu núucaj ti': Ma' a quíimsic, tumen mix máac cu yóoltic u quíims jun túul ajaw yéeya'an cu p'áatal x ma' jaadzil.

¹⁰Quin jalach t'antic tu kaaba' Yuumtzile', leti' máax bíin lukesic u cuxtal le quéen kuchuc u kiinil u quíimil, wa quex bíin quíimic ich ba'atel.

¹¹Yuumtzil ca u lukes tin tuucul in quíimsic le ajaw u yéeymajo'. Bey túuno' ch'a'a' le lóomte' yaan tu tojil u káamjo'ol yéetel u chúujil le ja'o', ca xi'ico'on.

¹²Bey úuchic u cha'ic David le lóomte', yéetel u chúujil le ja' yaan tu tojil u káamjo'ol Saulo', ca j bino'ob. Mix máac ilo'ob, mix u'uya'abo'obi'; mix máac aaji', tumen tuláacalo'ob táan ca'ach u wenelo'ob, tumen Yuumtzile' tu beetaj u t'úubulo'ob ti' wenel.

¹³Cu dzo'ocole', Davide', j máan táanxel tzéelil ti' le táax kóom lu'umo', ca j yanchaj tu xuul u ca'analil yaan chan náach ti'obo'. Ichilo'obe' yaan ca'ach jun p'éel cúuchil jáanpike'en.

¹⁴David túune' tu ka'am awat ca tu ya'alaj ti' Abner yéetel ti' u aj ba'atelo'ob: ¡Abner, núuc in t'aani'! Abnere tu núucaj: ¿Máaxech teech u ti'al ca a ka'am awatt'ant le ajawo'?

¹⁵Davide' tu ya'alaj: ¿Ma' wa teech le máac ma' tu páajtal u que'etel yéetel mix máac tu lu'umil Israeli'? ¿Ba'ax teen ma' ta canantaj le ajaw a dzuulilo'? Jun túul u cajnáalil le caajo' j ooc yéetel u tuuculil u quíimsic.

¹⁶Ma' utz le ba'ax dzo'oc a beetico'. Quin jalach t'antic ti' te'ex tu kaaba' Yuumtzil ca najmatique'ex a quíimsa'ale'ex, tumen ma' ta canantaje'ex a dzuulile'ex le ajaw yéeya'an tumen Yuumtzilo'. ¡Caxant u lóomte' ajaw yéetel u chúujil u yo'och ja' yaan ca'ach tu tzéel u káam jo'olal, ilawil wa ti' yaan tu cúuchile'!

¹⁷Le ca tu kaj óoltaj Saúl u t'aan Davide' tu ka'am a'alaj: ¡Máax t'aaniquen beya', Teech baacáan in paal j David máax t'aaniquen! Davide' tu núucaj ti': Bey je'el bix a wu'uyico' in dzuulil, teen.

¹⁸Ba'ale', ¿ba'axten cu ch'a'apachtic a Tzicbe'enil u palitzila'? ¿Ba'ax in beetmaj? ¿Ba'ax kaasil tin beetaj?

¹⁹Quin káat óoltic ti' a tzicbe'enil ca u ch'en xiquint ba'ax cu ya'alic a palitzila': wa Yuumtzil dzáa tu tuucul a Tzicbe'enil ca u ch'a'apachtene', u kam in quíimil bey jun p'éel ti'ibil óolale'; ba'ale' wa chéen u tuucul wíinico'obe', Yuumtzil bíin loolob t'antico'ob. Tumen dzo'oc u náachcuntiqueno'ob ti' u lu'um Yuumtzil, táan u léench'intiqueno'ob in kult yaanal kuob.

²⁰Tene', ma' in káat ca we'equec in ki'ikel náach ti' Yuumtzili', ¡Ba'ale' a Tzicbe'enile', dzo'oc u jóokol u ch'a'apacht jun túul ch'ic, cu ch'a'apachtiquen te j káax bey u ch'a'apachta'al jun túul noome'!

²¹Saúl túune' tu ya'alaj: ¡David, in paal quin cáantic ti' teech dzo'oc in kebantal! ¡Tin beetaj ba'ax cu beetic jun túul j ma' na'at, dzo'oc in beetic jun p'éel nojoch keechel ba'al! Ba'ale' suunaquech, ma' bíin in beettech kaas tu ca'ate'eni', tumen ti' le kiina' dzo'oc a we'esic a tziiquil ti' in cuxtal.

²²Davide' tu núucaj ti': Je'el u lóomte' a tzicbe'enila'. Taalac jun túul ti' a palitzilo'ob u ti'al ch'a'ic,

²³Yuumtzil bíin u bo'ot ti' jujun túul u yocsaj óolal yéetel u jaaj óolal. Quex tumen Yuumtzil tu kubaj tin kab a Tzicbe'enile', ma' tin wóoltaj in líikes in kab tu yóokol máax yéeya'an tumen Yuumtzili'.

²⁴Je'el bix ma' tin luksaj u cuxtal a tzibe'enil bejela'e', bey u yóolt Yuumtzil ma' a luksique'ex xan in cuxtal u ti'al u canantiquen ti' le loob óolal.

²⁵Saúl túune' tu ka'am a'alaj: ¡Qui'it'anta'anech David in paal! ¡Teche' bíin a chu'unbes nucuch ba'alo'ob a beete bíin xan xi'ic teech utzil a meentico'ob! Cu dzo'ocol lelo', Saule', j suunaj tu yotoch, David xane' tu ch'a'aj u beel.