Read Yucateco 1 Samuel 27 Bible Online

1 Samuel 27 - Yucateco bible

1 Samuel 27

¹Ba'ale' Davide' táan ca'ach u tucultic: Je'el ba'alac kiine' bíin u quíimsen Saúl. Bey túuno', asab ma'alob ca xi'iquen tu lu'umilo'ob le j filisteob u ti'al ca jáawac u chi'ichnaccuntiquen Saúl, tu yo'olal u p'atic u ch'a'apachtiquen ti' tuláacal u lu'umilo'ob Israel. Beyo' je'el in náachtal ti'e'.

²Bey túuno', David yéetel le seiscientos aj ba'atelo'ob láakintmailo', tu ch'a'ajo'ob u bejil u ti'al u bino'ob u meyajto'ob Aquis u paal Maoc u ajawil Gat.

³David yéetel u aj ba'atelo'obe', j cajlajo'ob Gat, tu yicnal Aquis, tu jujun túulilo'ob yéetel u láaktzililo'ob. Davide' tu bisaj tu ca'a túulal u yatano'ob: x Ahinoam, x jezrrelil yéetel x Abigail u yatan ca'ach Nabal j carmelil.

⁴Le ca tu yojéeltaj Saúl dzo'oc u púudzul David Gate, jáaw u ch'a'apachtic.

⁵David túune' tu ya'alaj ti' Aquis: Wa a tzicbe'enil u káat u beet ti' teen utze', quin káat óoltic ca u cha'a in cajtal ti' wa máacalmac u caajilo'ob le lu'umo'oba', tumen ma' ma'alob ca caajlac le a palitzil yéetel a tzicbe'enil ti' le jalach caaja'.

⁶Ti' le kiino', Aquise', tu dzaj ti' David u caajil Siglag, let o'olal tac bejela'e', Siglague' u jaatzil u múuch' caajil u ajawilil Judá.

⁷Davide', j cajlaj jun ja'ab yéetel can p'éel winalo'ob tu lu'umilo'ob j filisteob.

⁸Cu jóokol ca'ach yéetel u aj ba'atelo'ob u ba'atelto'ob le máaxo'ob yano'ob Gesur, Gezer yéetel Amalec, le cajnáalo'ob te j cúuchil likbal Telaim, tu tojil Shur tac Egipto.

⁹Le quéen u ba'atelt ca'ach le cúuchilo', ma' tu p'atic cuxa'an j xiib mix co'olel. Cu dzo'ocole', cu láaj ch'a'ic ca'ach u j tamano'ob, u wacaxo'ob, u burro'ob, u camello'ob yéetel u nooko'ob. Cu dzo'ocole', cu suut ca'ach tu yicnal Aquis,

¹⁰Aquis ca'ache', cu káatic ti' David: ¿Ba'ax caajil ta ba'ateltaj bejela'e'? Davide', cu núuquic ca'ach ti': Tu noojol Judá, wa Tu noojol Jeramel, wa Tu noojol j quenitaob.

¹¹Davide', ma' tu p'atic ca'ach j xiib wa co'olel cuxa'an, u ti'al ma' u bino'ob u ya'alo'ob tu caajil Gat ba'ax cu beetic. Tuláacal le kiino'ob j cajlaj tu lu'umilo'ob le j filisteobo', bey tu beetilaco'.

¹²Aquise' cu táan óoltic ca'ach u t'aan David, tumen tu tucultaj: Davide' táan u sen p'ectic Israel, beyo' bíin in palitzilt jun puli'.