Read Yucateco 1 Samuel 28 Bible Online

1 Samuel 28 - Yucateco bible

1 Samuel 28

¹Ti' le kiino'obo', Aquise', tu much'quintaj u aj ba'atelo'ob u ti'al u bino'ob tu yóokol Israel, cu dzo'ocole' tu ya'alaj xan ti' David: Je'el bix a wojelilo', teech yéetel le aj ba'atelo'ob láakintmailecho', yaan u bine'ex a wáantene'ex j ba'atel.

²Davide' tu núucaj ti': Sen ma'alob. Bíin u yil a tzicbe'enil ba'ax cu páajtal u beetic a palitzil. Aquise', tu núucaj: wa beyo' bíin in ca'aj in dzaech jun puli' u ti'al u náacomil máaxo'ob canáantiquen.

³Ca'aliquil ti' le kiino'obo', dzo'oc ca'ach u quíimil Samuel, tuláacal Israel okoltic ca'ach úuchic u quíimil, cu dzo'ocole' j mu'uc Ramá tu caajal tu'ux sijnal. Saúl xane', dzo'oquili' ca'ach u láaj tojolch'intic ti' u lu'um tuláacal le j wáayo'obo', bey xan le máaxo'ob ch'a'achi'itic u kaaba' quimeno'obo'.

⁴Le j filisteobo', tu much'ajuba'obe' ca j bino'ob je'elel Sunem, Saule', tu much'quintaj Israele', ca j bin je'elel Gilboa.

⁵Ba'ale' le ca tu yilaj tu'ux jelecbal le j filisteobo', tu ch'a'aj sajaquile', ca j lúub u yóol.

⁶Káat chi'inaj túun ti' Yuumtzil, bale' Yuumtzile' ma' tu núucaj u káat chi' yéetel wayako'obi', mix yéetel Urim, mix yéetel aj bóobato'ob.

⁷Leti' túune' tu ya'alaj ti' u nuuquil u aj meyajo'ob: Caxte'ex jun túul co'olel cu káat chi' ti' quimeno'ob, ca xi'iquen j káat chi' tu yicnal. U nuuquil u aj meeyajo'obe', tu núucajo'ob ti': Endore', yaan jun túul co'olel cu káat chi' ti' quimeno'ob.

⁸Saule', tu búuquintaj yanal nook u ti'al ma' u kaj óolta'al, ca tu beetaj u láakinta'al tumen ca'a túul máaco'obe', ca j bin yéetel áakab tu yotoch le x co'olelo'. Ca tu ya'alaj ti': Quin káat óoltic ti' teech ca a na'at ba'ax cu taal tin wóokol, bey xan ca a beet u taal u pixan ma'ax bíin in wa'al ti' techa'.

⁹Le co'olelo' tu núucaj ti': Teche' a wojel ba'ax tu beetaj Saúl, tu tojolch'intaj way j lu'um le j wáayo'ob yéetel le máaxo'ob cu káat chi'ob ti' quimeno'obo'. ¿Ba'axteen ca táabsiquen in beet jun p'éel ba'al u ti'al in caxtic in quíimsa'al?

¹⁰Ba'ale' Saule', tu jalach t'antaj tu kaaba' Yuumtzile', ca tu ya'alaj ti': Quin jalach t'antic ti' teech tu kaaba' Yuumtzil mix ba'al bíin úuchuc ti' teech.

¹¹Le co'olelo' tu núucaj: ¿Máax a káat ca in beet u taal? Saule' tu ya'alaj Beet u taal Samuel.

¹²Le co'olelo' le ca tu téec ilaj Samuele', ca awatnaji; cu dzo'ocole' tu ya'alaj ti' Saúl: ¡Teche' j Saulech! ¿Ba'ax teen ta tuusajen?

¹³Ba'ale' le ajawo' tu ya'alaj ti': Ma' a ch'aic sajaquil. ¿Ba'ax dzo'oc a wilic? Le co'olelo'tu núucaj: Táan in wilic jun túul ku cu na'acal likbal te j lu'umo'.

¹⁴Saule', tu káataj: ¿Bix le kuo'? X letie' tu núucaj: Jun túul nuxib u búuquintmaj u suuyem. Saule' tu jáan tucultaj leti'e' Samuelo', ca j noclaj lu'um.

¹⁵Ca túun tu ya'alaj j Samuel ti': ¿Ba'axten ca chi'ichnaccuntiquen iquil a beetic in taal? Saule' tu núucaj: Jach yaj tu yóol in pucsi'ikal, tumen le j filisteobo', táan u taalo'ob u ba'atelteno'ob, cu dzo'ocole' Kue' dzo'oc u xump'attiquen. Ma' tu núuquic in káat chi', mix yéetel aj bóobato'ob, mix yéetel wayako'ob. Let o'olal tin t'aanajech u ti'al ca wa'al ti' teen ba'ax unaj in beetic.

¹⁶Samuele', tu núucaj: ¿Ba'axten ca káat chi' ti' teen, wa dzo'oc u xunp'attiquech Yuumtzil tumen dzo'oc u beeticubáa a aj p'eec?

¹⁷Yuumtzile' dzo'oc u beetic ta wéetel le ba'ax tu dzaj ti' teech u péectzilil tin chi'e'. Dzo'oc u toquic ti' teech le ajawilo', u ti'al u kub ti' David a láak,

¹⁸tumen teche', ma' ta wu'uyaj t'antaj Yuumtzili', mix ta dzo'ocbesaj ba'ax u ya'almaj ca a láaj xu'uls le j amalequitaobo'. Let o'olal j beeta'ab ti' teech bey tumen Yuumtzil bejela'o'.

¹⁹Tu yóokol lelo', Yuumtzile', bíin u ca'aj u kub le j israelitaob pa'ate' ta wéetel tu kab le j filisteobo', sáamale' bíin taalaquech tin wicnal yéetel a paalalo'ob. Bíin xan u beet Yuumtzil u lúubul tu kab le j filisteob u cúuchil tu'ux jelecbal le j israelitaobo'.

²⁰Saúl le j ca'anal baaquel máaco' joch'kaj lu'um tu séeblaquil. Sen ooc sajaquil ti' tu yo'olal ba'axo'ob tu ya'alaj Samuele', ca j sajquíimi. Cu dzo'ocole', mix ba'al ca'ach tu jaantaj buul kiin mix buul áakab.

²¹Le ca tu yilaj le co'olel sen saatal u yóol Saulo', tu nadzajubáa u ya'al ti': A x palitzila' tu táan óoltaj ba'ax ta káataj. Tin nadzajinbáa tu chi'i quíimil úuchic i dzo'ocbesic ba'ax ta wa'alaj.

²²Bejela'a' túune' quin káat óoltic ti' teech ca a táan óolten: bin in ca'aj in taas ti' teech jun p'íit janal u ti'al a suut ta wóol ca xi'iquech.

²³Saule', ma' u káat ca'ach janali', ba'ale' u nuuquil u aj meyajo'ob yéetel le co'olelo', tu sen babal káat óoltajo'ob ti' tac ca tu yóoltaj janal. Tu séeblaquil j líik te j lu'umo', ca j culaj ti' jun p'éel káan.

²⁴Ca'aliquil le co'olel túuno', tu quíimsaj jun túul poloc wacax yaan tu yotoche', ca tu ya'ach'taj u sacam u ti'al u pakachtic piimpim waajo'ob x ma' levadura.

²⁵Cu dzo'ocole' tu bisaj u kub ti' Saúl yéetel ti' u nuuquil u aj meyajo'ob, leti'obe' cu dzo'ocol u janalo'obe' tu ya'alajo'ob táan u bino'ob, leti'obe' j bino'ob ti' le áakabo'.