Read Yucateco 1 Samuel 29 Bible Online

1 Samuel 29 - Yucateco bible

1 Samuel 29

¹Le j filisteobo' tu much'quintajo'ob u aj ba'atelo'ob Afec, le j israelitaobo', j je'elo'ob tu sayab ja'il Jezreel.

²Le ca jo'op' u bin le j filisteob yéetel u jejeláas múuch'ul u aj ba'atelo'obo', David yéetel máaxo'ob láakintmaile', tu paach ca'ach Aquis cu bino'ob.

³U nuuquil le j filisteob túuno', tu káat chi'itajo'ob ti' Aquis: ¿Ba'ax cu beetic le j hebreoilo'ob waye'? Aquise' tu núucaj ti'ob: Lela' j David u nacom ca'ach Saúl u ajawil Israel. Ba'ale' dzo'oc u yúuchtal yanac tin wicnal, likbal ti' le ja'abo'ob tac bejela'o', ma' yanac mix jun p'éel ba'al kaasi'.

⁴Ba'ale' u nuuquilo'ob u aj ba'atelo'ob Aquise' j kuuxchajo'obe', ca tu ya'alajo'ob ti': A'al ti' ca suunac te j caaj a dzamaj ti'o', ma' bíin u láakinto'on te j ba'atelo'; Ma' xan ca u suunac aj p'éequil ichil le ba'atelo'. ¡U ti'al ca lúubuc utzil tu táan u dzuulil, chéen kabéet u kubic u poolo'ob le aj ba'atelo'oba'!

⁵¡Lela' leti' le j David máax tu yo'olal cu ka'ayal ca'ach ich óokot: Mil máaco'ob tu quíimsaj Saúl, diez mil tu quíimsaj Davidi'!

⁶Aquis túune' tu t'anaj Davide' ca tu ya'alaj ti': ¡Je'el bix tu jaajil cuxa'an Yuumtzile', bey xan tu jaajil toj máaquech! Sen utz chaj xan tin t'aan bix úuchic a bisicabáa tu cúuchil c je'elelo'. Ma' in wila'a' mix jun p'éel kaas ti' teech líikbal ti' le kiin j taalech a wileno'. Ba'ale' ma' ta lúubul utzil ti' u nuuquil u aj ba'atelo'ob le j fiisteobo',

⁷bey túuno' suunen yéetel utzil, tu yo'olal ma' c beetic mix ba'al p'ecbe'en tu yicho'ob.

⁸Davide' tu núucaj: ¿Ba'ax in beetmaj? ¿Ba'ax dzo'oc u yilic a Tzicbe'enil ti' teen ti' tuláacal le kiino'ob u ti'al ma' u cha'ic in ba'ateltic a aj p'eeco'ob?

⁹Aquise' tu núucaj: Tene' in wojel sen utzech bey u aj túuchi' Kue', ba'ale' u nuuquil u aj ba'atel le j filisteobo', dzo'oc u ya'alico'ob ma' bíin xi'iquech ba'atel t éeteli'.

¹⁰Bey túuno', teech yéetel u palitzilo'ob a dzuulil taalaja'ano'ob ta wéetelo', líikene'ex sáamal, chéen p'el u sáastale', u ti'al ca suunaque'ex tu'ux yane'ex ca'achi.

¹¹Bey túuno', David yéetel le máaxo'ob láakintmailo', j líiko'ob tu ja'atzcabil u láak kiine' ca j suunajo'ob tu lu'umo'ob le j filisteob, ca'aliquil le j filisteobo', bin u náadzalo'ob Jezreel.