Read Yucateco 1 Samuel 3 Bible Online

1 Samuel 3 - Yucateco bible

1 Samuel 3

¹Le j táanquelem Samuelo', xi'ic u bin ca'ach u meyajtic Yuumtzil tu yáanal u tzolbe'en t'aan Elí. Ti'ili'e kiino'obo', Yuumtzile' chéen wa ba'ax kiin cu dzáic u péectzil ti' wa máax; Ma' láaj kiin cu yila'al ca'ach náayo'obi'.

²Ba'ale' jun p'éel kiin dzo'oquili' u cáajal u mina'anchajal u sáasil u yich Elie', táan ca'ach u wenel tu'ux suuc u wenel.

³Samuele' chilicbal ca'ach ichil u kulnaj Yuumtzil, tu'ux dza'an ca'ach u ba'asche' Yuumtzil. Ca'aliquil t'aba'an yanil u sáas le quili'ich najo'.

⁴Yuumtzil túune' tu t'anaj tu kaaba': ¡Samuel! Leti'e' tu núucaj: ¡Je'elena'!

⁵Cu dzo'ocole' leti'e' j bin u yáalcab tu'ux yaan ca'ach Elie', ca tu ya'alaj ti'. Je'el dzo'oc in taal ta wicnala'. ¿Ba'ax u ti'al ta t'aanajen? Elie' tu núucaj ti': Tene' ma' in t'aanechi', xeen j chital tu ca'a téen. Samuel túune' j bin chital tu ca'a téen.

⁶Ba'ale' ca'a t'a'an tumen Yuumtzil: ¡Samuel! Samuele' j líike' ca j bin tu yicnal Elí. Ca tu ya'alaj ti': Je'elena', ¿ba'ax o'olal ta t'aanajen? Elie' tu núucaj: Tene' in paal ma' in t'aanechi', xeen j chital tu ca'a téen.

⁷Samuele' ma' u kaj óol ca'ach Yuumtzili', tumen Yuumtzile' ma' u chíicbesubáa ti' ca'achi'.

⁸Ba'ale' Yuumtzile' tu t'anaj tu yóox téen le j Samuelo', leti'e' j líik u ti'al u bin u ya'al ti' Elí: Je'el yanen ta wicnala', ¿ba'ax a káat ti' teen? Le ca tu na'ataj Elí Yuumtzil t'aanic le j xiipaalo.

⁹Tu ya'alaj ti': Xeen j chital; wa cu t'aaniquech Yuumtzile', ca núuquic ti': T'aanen, tumen a palitzile' táan u yu'ubiquech. Samuel túune' j bin chital tu'ux cu wenel.

¹⁰Cu dzo'ocole' j kuch Yuumtzil, wa'alaje' ca tu t'anaj je'el bix tu yáax jun téene': ¡Samuel! ¡Samuel! Samuele' tu núucaj: T'aanen, tumen a palitzile' táan u yu'ubiquech.

¹¹Yuumtzile' tu ya'alaj ti': Bíin in beet jun p'éel ba'al Israel, chéen ba'ale' yaan u beetic u ki'inam u xiquino'ob le máaxo'ob bíin u'uyico'.

¹²Ti'ili'e' kiino' bíin in beet u láaj úuchul ti' Elí le ba'ax in wa'almaj in beetic ti' u yotocho'.

¹³In ka'aytmaj in jadzic u láaktzilo'ob mina'an u xuul, tu yo'olal le ba'ax kaas dzo'oc u yojéeltic leti'o'; tumen u j xibil paalale' dzo'oc u pooch'iqueno'ob, ba'ale' leti'e' ma' u ka'ajes u yiiko'obi'.

¹⁴Let o'olal dzo'oc in jalach t'antic ma' bíin sa'atsa'ac u kasa'anilo'ob u láaktzilo'ob Elie', mix yéetel quíimsbil ba'alche'ob, mix yéetel ti'ibil óolalo'ob.

¹⁵Cu dzo'ocol lelo', j Samuele' j chilaj tac u sáastal tu láak kiin, ca tu je'elantaj u jool najilo'ob u kulnaj Yuumtzil. Samuele', sajac u tzicbalt ca'ach ti' Elí le náay tu yilajo'.

¹⁶Ba'ale' Elie' tu t'anaje' ca tu ya'alaj ti': ¡Samuel, in paal! Leti'e' tu núucaj: je'elena'.

¹⁷Elie' tu káat chi'itaj ti': ¿Ba'ax tu ya'alaj teech Yuumtzil? quin káat óoltic ti' teech ma' a muclic ti' teen mix ba'al. ¡Ku bíin u chich jadzech wa ca muclic ti' teen wa ba'ax ti' le tu ya'alaj ti' techo'!

¹⁸Samuele' tu láaj tzolaj ti', ma' tu muclaj mix ba'ali'. Elie' tu kam a'alaj: ¡Leti' Yuumtzil! ¡úuchuc le ba'ax utz tu táane'!

¹⁹Samuele', nojoch máacchaji, Yuumtzile' tu yáantaj Samuel, ma' tu p'ataj ma' u dzo'ocbesic mix jun p'éel u dzaa t'aani'.

²⁰Tuláacal Israel líikbal Dan tac Bersebae', tu táan óolto'ob, Samuel leti' u aj bóobat Yuumtzil.

²¹Cu dzo'ocole' Yuumtzile' chíicpaj tu ca'a téen tu lu'umil Silo, tumen ti' ca'ach cu dzáic u yojéelt Samuel u péectzili'.