Read Yucateco 1 Samuel 30 Bible Online

1 Samuel 30 - Yucateco bible

1 Samuel 30

¹Le ca j kuch David tu yóox p'éel kiin Siglague', tu yilaj dzo'oc u búut'ul j amalequilo'ob Néguev, bey xan dzo'oc u pulicuba'ob tu yóokol Siglag, tu kascuntajo'ob yéetel tu tóocajo'ob.

²Tu bisajo'ob xan cuxa'an tuláacal co'olelo'ob, mejen paalalo'ob yéetel le nucuch wíinico'ob yano'obo', quex tumen ma' tu quíimsajo'ob mix máaqui'.

³Le ca j kucho'ob David yéetel le j xiibo'ob láakintic te j caaj, bey xan tu yilajo'ob dzo'oc u tóocal yéetel j bisa'ab cuxa'an u co'olelilo'ob yéetel u mejen j xibil paalo'ob bey xan u mejen x ch'upul paalo'obo',

⁴jo'op' u sen ka'amcach okolo'ob tac u lúubul u muuko'ob.

⁵Bisa'ab xan cuxa'an tu ca'a túulal u yatano'ob David: Ahinoam, x jezrrelil, yéetel x Abigail u yatan ca'ach Nabal j carmelil.

⁶Davide', ma' utz yu'ubicubáa ca'achi', tumen taac ca'ach u quíimsa'al yéetel ch'iin tumen le aj ba'atelo'obo', tuláacalo'ob kuuxchaja'ano'ob tu yo'olal le ba'ax úuch ti' u paalalo'obo'. Ba'ale' Davide' tu yocsaj u yóol ti' Yuumtzil u Junab Ku,

⁷ca tu ya'alaj ti' aj kiin Abiatar u paal Ahimelec: Beet utz a taasic ti' teen le efodo'. Chéen p'elac taasa'abic le efod ti' Davido',

⁸leti'e' j káat chi'inaj ti' Yuumtzil. Beya': ¿Unaj wa in ch'a'apachtic u múuch'ul le j oocolo'oba'? ¿Bíin wa in chuucpachto'ob? Yuumtzile' tu núucaj ti': Ch'a'apachto'ob, bíin a chuucpachto'ob bíin xan a toc le máaxo'ob j bisa'abo'ob cuxa'ano'obo'.

⁹Tu séeblaquile', Davide' j bin tu paacho'ob yéetel le seiscientos j xiibo'ob láakintmailo', ca j kucho'ob tu t'o'ol ja'il Besor. Te'elo', j p'áat doscientos j xiibo'obi', tumen sen ca'anano'ob ca'ach u ti'al ca u ch'acto'ob le t'o'ol ja'o', Davide' j bin yéetel le cuatrocientos j xiibo'ob u ti'al le ch'a'apachtajo'.

¹¹Ti' lelo', j nactáanta'ab te j táax lu'um jun túul j egiptoil, ca j bisa'ab ti' David, ba'ale' yanchaj u dza'abal ba'al u jaant yéetel u yukej.

¹²j dzaab ti' jun xéet' u piimpim waajil higo yéetel ca'a p'éel u piimpim waajilo'ob u x kulinil uvaob, cu dzo'ocol u janal le j egiptoilo', j yanchaj u yóol, tumen óox p'éel kiino'ob yéetel óox p'éel áakabo'ob ma' u jaant mix ba'al ca'achi'.

¹³David túune' tu káat chi'itaj ti': ¿Máax a dzuulil? ¿Tu'ux a taal? Le j egiptoilo' tu núucaj: j egiptoilen u paalizilen jun túul j amalequil, ba'ale' óox p'éel kiin u xun p'ajten in dzuulil, tu yo'olal j koja'anchajen,

¹⁴tumen j bino'on c ba'atelt u noojol u lu'umilo'ob le j cereteob, bey xan u lu'umilo'ob Judá yéetel Caleb. T tóocaj xan Siglag.

¹⁵Davide' tu káat chi'itaj: ¿Je'el wa a bisiquen tu'ux yaan u múuch'ul le j oocolo'obo'? Le j egipcio' tu núucaj: Wa ca jalach t'antic ti' teen ma' ta quíimsiquen mix ta kubiquen ti' in dzuulile', je'el in bisiquech tu'ux yano'obe'.

¹⁶Tu bisajo'ob tac tu'ux yaan le j oocolo'obo', dzo'oc ca'ach u ki'itpajalo'ob ti' tuláacal le tu'ux jelecbalo'obo', tumen táan u janalo'ob yéetel táan u yukulo'ob, bey xan táan u beetico'ob u kiinbesajil le ba'ax tu yocoltajo'ob tu lu'umilo'ob le j filisteob yéetel Judao'.

¹⁷Davide' tu puljubáa tu yóokolo'ob líikbal u sáastal tac u yocbal kiine', ca tu jach xu'ulsajo'ob tu jaajil, chéen cuatrocientos j xi'ipalalo'ob páatchaj u púudzulo'ob tu yóokol u camello'ob.

¹⁸Davide', tu ca'a ch'a'aj le ba'ax u yocoltmaj ca'ach le j amalequitaobo', tu ca'a ch'a'aj xan tu ca'a túulal u yatano'ob.

¹⁹Ma' tu bineltaj mix ba'al chichan wa nojoch ti' le ba'ax ocolta'ab ca'ach ti'obo', mix tu bineltaj jun túul chan paal wa jun túul nojoch wíiniqui', tumen Davide' tu ca'a ch'a'aj tuláacal le ba'axo'ob j ocolta'ab ca'acho'.

²⁰Tu ch'a'aj xan David tuláacal wacaxo'ob yéetel u j tamano'ob, bey túuno' le máaxo'ob bisic ca'ach le j tamano'obo', jo'op' u ya'alico'ob u náajal David le j tamano'obo'.

²¹Le ca j kuch David tu'ux yaan ca'ach le doscientos j xiibo'ob sen ca'anano'ob ca'ach ma' páatchaj u bino'ob j ba'atel tu yéetel tumen yanchaj u p'áatalo'ob te j t'o'ol ja'o', leti'obe', jóoko'ob u ch'a'ob u beel David pa'ate' yéetel tuláacal máaxo'ob láakintmailo'. Davide' tu nadzajubáa u te'escunto'ob.

²²Ba'ale' dze'edzec ti' le j xiibo'ob kasa'antaco'obo', jo'op' u ya'alico'ob, le ba'alo'ob tu ch'a'ajo'obo' ma' unaj u dza'abal ti' le máaxo'ob ma' j bino'ob tu yéetelo'obo', chéen unaj u ku'ubul u yatano'ob yéetel u paalalo'ob, cu dzo'ocole' unaj u bino'ob le quéen dzo'ococ u ku'ubul ti'obe'.

²³Ba'ale' Davide' tu ya'alaj: In wéet xiibile'ex, ma' a beetique'ex bey yéetel ba'ax dzo'oc u dzáic to'on Yuumtzilo', cu dzo'ocole', dzo'oc xan u canáantic c cuxtal, bey xan tu kubaj t kab u múuch'ul le j oocolo'ob tu puljuba'ob ca'ach t óokolo'.

²⁴Ti' lela', mix máac bíin táan óoltique'ex, tumen u ti'al le t'ooxo' bíin dza'abac ti' le cu p'áatalo'ob j canan ba'alo'ob le buca'aj bíin dza'abac ti' le j bino'ob j ba'atelo'.

²⁵(Líikbal ti' le kiin tac bejela'o', bey u beeta'al Israelo').

²⁶Le ca j kuch David Siglague', tu túuchi'itaj ti' u yéet aj bisajbáilo'ob, u nuuquilo'ob Judá, jun jaatz ti' le ba'ax tu tocaj ti' le aj p'eeco', bey xan le bisaj t'aana': Je'el quin túuchi'itic te'ex jun p'éel siibala', lelo' u jaatzil ti' le ba'ax tin tocaj ti' u aj p'eeco'ob Yuumtzil.

²⁷Tu túuchi'itaj siibalo'ob ti' le máaxo'ob yano'ob ca'ach Betel, Ramot tu lu'umil Néguev, Jatir,

²⁸Arroer, Sifmot, Estemoa

²⁹yéetel Racal, bey xan le yano'ob ca'ach tu caajilo'ob Jeramel, tu caajilo'ob le j quenitaob,

³⁰bey xan Horma, Corasán, Atac,

³¹Hebrón yéetel ti' tuláacal le cúuchilo'ob tu'ux xíimbalnaj yéetel le máaxo'ob láakintmailo'.