Read Yucateco 1 Samuel 31 Bible Online

1 Samuel 31 - Yucateco bible

1 Samuel 31

¹Le j filisteobo' tu puljuba'ob tu yóokol Israel, le j israelitaobo' j áalcabnajo'ob tu táano'ob, tumen ya'ab ti'ob j quíimo'ob tu pu'uquil Gilboa.

²Le j filisteobo', j bino'ob u ch'a'apachto'ob Saúl yéetel u paalalo'ob, ca tu quíimsajo'ob Jonatán, Abinadab yéetel Malquisúa.

³Cu dzo'ocole', tuláacalo'ob j bino'ob u ba'atelto'ob Saúl; Bey tumen chucpachta'ab tumen u x julubo'ob le máaxo'ob cu ch'iino'ob yéetel x p'úunche'o', sen ooc sajaquil ti'ob.

⁴Leti' túune' tu ya'alaj ti' u palitzil máax canáantic u nu'uculo'ob u ba'atel: Jóokes a máascabe', ca a póot loomteen yéetel, tu yo'olal ma' u taal le ma' ocsaj óolalo'ob u quíimseno'ob u ti'al ca xan u che'ejteno'ob. Ba'ale' u palitzile' ma' tu yóoltaj u loomi', tumen sen sajac. Saúl túune', tu ch'a'a'aj u máascabe', ca tu nóocch'intajubáa tu yóokol.

⁵Le ca tu yilaj le palitzil dzo'oc u quíimil Saule', tu nóocch'intajubáa xan tu yóokol máascabe', ca j quíim yéetel Saúl.

⁶Bey úuchic u quíimil Saúl ti' le kiino', tac xan tu yóox túulal u paalal, u palitzil yéetel tuláacal le j xiibo'ob láakintmailo'.

⁷Le ca tu yilaj le j israelitaob caajnáalo'ob tu táanxel tzéelil le táax kóom lu'um tu lakin Jordán dzo'oc u púudzul le aj ba'atelo'ob bey xan dzo'oc u quíimil Saúl yéetel u paalalo'obo', tu p'atajo'ob u cajtalilo'ob, ca j púudzo'ob xan. Le j filisteob túuno', j kucho'obe', ca j p'áato'ob cajtali'.

⁸Tu láak kiin le ca j bin le j filisteob u ch'a'ob le ba'ax yaan ti' le quimeno'obo', tu nactáantajo'ob Saúl yéetel tu yóox túulal u paalal jayacbalo'ob tu pu'uquil Gilboa.

⁹Tu cul kuptajo'ob túun u caale', ca tu ch'a'ajo'ob u nu'uculo'ob u ba'atel, ca tu túuchi'itajo'ob aj bisaj t'aano'ob ti' tuláacal u lu'umilo'ob le j filisteob u ti'al ca bisa'ac u péectzilil tu kulnaj u beetbil kuob.

¹⁰Cu dzo'ocole', j dzaab u nu'uculo'ob u ba'atel Saúl tu kulnaj Astarté, ca j ch'uyquinta'ab u wíinclil tu tuluumil Bet-sán.

¹¹Le ca tu yojéeltaj u caajnáalilo'ob Jabes Galad ba'ax tu beetaj le j filisteob yéetel Saulo',

¹²tu jun p'éelcuntajo'ob u tuuculo'ob le xiibil máaco'obo', tumen cu dzo'ocol u xíimbalo'ob buul áakabe', tu ch'a'ajo'ob tu tuulumil Bet-sán u wíinclilo'ob Saúl yéetel u paalalo'obe', ca j suunajo'ob Jabes, tu'ux tu tóocajo'ob.

¹³Cu dzo'ocole', j mu'uc u baaquelo'ob tu lu'umil Jabes tu yáanal jun cúul che'. Cu dzo'ocole', j su'ukinajo'ob siete kiino'ob.