Read Yucateco 1 Samuel 4 Bible Online

1 Samuel 4 - Yucateco bible

1 Samuel 4

¹Cu dzo'ocole' Samuele' cu dzáic ca'ach u yojéelt tuláacal Israel. Ti'ilie' kiino' le j filisteobo' tu muuch'ajuba'ob u ba'atelto'ob Israel, le j israelitaobo' jóoko'ob j ba'atel tu yéetelo'obe', ca j p'áato'ob je'elel tu tzéel Eben-ezer. Le j filisteobo', j p'áato'ob je'elel Afec,

²Le ca j líiko'ob u ba'atelto'ob le j israelitaobo', le j filisteobo', tu pa'ajo'ob u muuk Israel, ca tu quíimso'ob cuatro mil j xiibo'ob tu cúuchil le ba'atelo'.

³Le ca j suunaj u múuch' aj ba'atelo'ob le j israelitaob tu cúuchil tu'ux jelecbalo'obo', u nuuquilo'ob Israele' tu ya'alajo'ob: ¿Ba'axten ti' le kiina' tu cha'aj Yuumtzil u pa'abal c muuk tumen le j filisteobo'? ¡Co'one'ex Silo ca c ch'a'a' u ti'al c taas u ba'asche' Yuumtzil, u ti'al ca xi'ic ichilo'on, u ti'al ca u toco'on ti' c aj p'eeco'ob!

⁴Le j israelitaob túuno' tu túuchi'itajo'ob jun jaatz aj ba'atelo'ob Siloe', ca tu ch'a'ajo'ob u taaso'ob u ba'asche'il u nup t'aan u Yuumtzilil tuláacal páajtalil, le máax yaan u jalach káanche' tu chúumuc le querubino'obo'. Ofni yéetel Finees u ca'a túul paalal Elie', tu láakintajo'ob xan u ba'asche'il u nup t'aan Ku.

⁵Le ca j kuch u ba'asche' Yuumtzil tu cúuchil tu'ux jelecbalo'obe', le j israelitaobo' juum awatnajo'ob yéetel sen qui'imac óolal, tu beetajo'ob tac u quíilbal le lu'umo'.

⁶Le ca tu yu'ubajo'ob le j filisteob le juum awato', tu káatajo'ob: ¿Ba'axten yaan sen lik óol tu'ux jelecbaal le j hebreobo'? Ba'ale' le ca tu yojéeltajo'ob dzo'oc u kujsa'al u ba'asche' Yuumtzil tu cúuchil tu'ux jelecbal le j israelitaobo',

⁷J sajacchajo'ob ca tu ya'alajo'ob: ¡Junab Kue' dzo'oc u kuchul tu'ux jelecbalo'obo'! ¡Dzo'oc to'on beyo', tumen mix jun téen úuchuc beya'!

⁸¡Dzo'oc to'on beya'! ¿Máax bíin páatac u toquico'on u ti'al ma' c lúubul tu kab Junab Ku, le máax sen yaan páajtalil ti'o'? ¡Leti' j xu'uls le j egipciob te x tocoy lu'um yéetel tuláacal u jejeláasil báan quíimilo'obo'!

⁹¡Xiibil máacchajque'ex u aj ba'atelile'ex filistea, ba'atelnene'ex tu jaajil a wóole'ex u ti'al ma' u palitziltique'ex le j hebreob, je'el bix ta palitzilte'exo'obo'!

¹⁰Le j filisteobo' tu pulajuba'ob te j ba'atelo' ca tu pa'ajo'ob u muuk le j israelitaobo', ca yanchaj u púudzul u binbalo'ob tu cúuchil tu'ux jelecbalo'ob. Sen ya'ab quíimsa'ab ti'obi', tumen j lúub quimen treinta mil j xiibo'ob cu xíimbal ooco'ob.

¹¹J ch'a'ab xan u ba'asche' Ku, cu dzo'ocole' quíimsa'ab Ofni yéetel Finees, ca'a túul u paalalo'ob Elí.

¹²Ba'ale' jun túul ti' u ch'i'ibalo'ob Benjamine', tu yilaj bix u púudzul tu cúuchil tu'ux cu yúuchul le ba'atelo', ca j kuch áalcabil tac Silo ti' le kiinaco'. Tzi'itzi'ic ca'ach u nook u búuquintmajo', chuup xan u tzo'otzel u pool yéetel lu'um.

¹³Le ca j kuche', Elie' culucbal ca'ach tu noj káanche' tu chuun jool naj, u ti'al u ch'úuctic ca'ach le bejo', tumen ma' utz u yóol tu yo'olal u ba'asche' Ku. Le j xiibo' j ooc te j caajo' ca tu dzaj le péectzilo'; tu séeblaquil jo'op' u yawato'ob tuláacal u caajnáalilo'ob le caajo'.

¹⁴Le ca tu yu'ubaj Elí le awato'obo' tu káataj: ¿Ba'ax beetic u p'u'ujul le caajo'? Le j xiib túuno' tu séebcuntaj u dzáic ti' Elí le péectzilo',

¹⁵yaan ca'ach noventa yéetel ocho ja'abo'ob ti' Elí, dzo'oc u jach mina'anchajal u sáasil u yich.

¹⁶Le j xiibo' tu ya'alaj: Táant in kuchul waye', ti' lukbalen tu'ux cu yúuchul le ba'atelo'. Páajtchaj in púudzul beejela' tu'ux cu yúuchul le ba'atelo'. Elie' tu káat chi'itaj: ¿Ba'ax cu yúuchul in paal?

¹⁷Le aj bisaj t'aano' tu núucaj: Le j israelitaobo' dzo'oc u púudzulo'ob cu dzo'ocole' sen ya'ab máaco'ob quíimsa'abo'ob, quíimsa'abo'ob tac a ca'a túul paalalo'ob Ofni yéetel Finees, bey túuno' u ba'asche' Kue' j lúub tu kab le filisteobo'.

¹⁸Chéen p'elac ch'a'a chi'itabic u ba'asche' Ku tumen le aj bisaj t'aano', Elie', jawkaj tu paach le noj káanche' tu tzéel le jool najo', bey sen ch'ija'an yéetel sen aalo', j cáach u chúuch u caale' ca j quíimi. Tu beetaj u nojochil tu caajil Israel cuarenta ja'abo'ob.

¹⁹U yilib Elí u yatan Finees x yo'omchaja'an ca'ache', ta'itac ca'ach u síijil u chan paale', j taal ti' u ki'inamil u síijsaj le ca tu yojéeltaj dzo'oc u ch'a'abal u ba'asche' Ku bey xan dzo'oc u quíimil u yíicham, yéetel u taata u yíichame', tu ch'o'och'o'otubáa yéetel u ki'inamile' ca síij u paal.

²⁰Le ca j ila'ab tumen máaxo'ob táanlic u síijil u chaan pal, táan u quíimile', tu ya'alajo'ob ti': Ma' ch'a'ic sajaquil, dzo'oc a síijsic jun túul chan j xi'ipal. Ba'ale' leti'e' ma' tu núucaji', tu beetaj bey ma' tu yu'ubaj ba'ax tu ya'alajo'obe';

²¹Tu dzaj u kaaba'int le chan j xi'ipalo', Icabod,[2] tumen tu ya'alaj: Israele' dzo'oc u p'áatal x ma' nojbe'enil, tumen dzo'oc u ch'a'abal u ba'asche' Ku. Yéetel le t'aano', táan u yóoltic u ya'al ch'a'abic u ba'asche' Ku bey xan úuchic u quíimilo'ob u yíicham yéetel u taata u yíicham.