Read Yucateco 1 Samuel 5 Bible Online

1 Samuel 5 - Yucateco bible

1 Samuel 5

¹Le ca j dzo'oc u ch'a'abal u ba'asche' Kue', le j filisteobo' tu lukesajo'ob Eben-ezere', ca tu bisajo'ob Asdod;

²Cu dzo'ocole' tu ch'a'ajobe' ca tu yocsajo'ob tu kulnaj Dagone', ca tu yedzcuntajo'ob tu tzéel le kuo'.

³Tu láak kiin ca j kuch le j asdodilo'obo', tu yilajo'ob ti' peca'an Dagón tu táan u ba'asche' Yuumtzile'. Tu ch'a'ajo'ob túun Dagone' ca tu ca'a dzajo'ob tu cúuchil.

⁴Ba'ale' tu láak kiine' le ca j kuch tu ca'a téen le j asdodilo'obo', ti' ca'a peca'an Dagón tu táan u ba'asche' Yuumtzile'. U pool yéetel tu ca'a dzíitil u kabo'obe' ti' yano'ob tu yóokol u x pakab tuunichil le jool najo'. Chéen u wíinclil túulis.

⁵Let o'olal tac bejela'a' le quéen ococ u aj kiino'ob Dagón tu kulnaj yaan Asdode', ma' tu pe'echaktico'ob u x pakab tuunichil.

⁶Cu dzo'ocole' Yuumtzile' tu chichich jadzaj yéetel tu sen chupaj yéetel sajaquil le j asdodilo'ob ti' tuláacal u lu'umo'obo', tumen tu beetaj u xáacalo'ob yéetel chu'uchumo'ob.

⁷Bey túuno' le ca tu yilajo'ob u cajnáalilo'ob Asdod ba'ax cu yúuchule' tu ya'alajo'ob: U ba'asche' u Ku Israele' ma' unaj u p'áatal ichilo'oni', tumen le Kuo' táan u chichich jadzico'on, bey xan táan u chichich jadzic Dagón le c kuo'.

⁸Bey túuno' tu tuchi'itajo'ob t'anbil u nuuquilo'ob aj ba'atel u ti'al ca u much'ajuba'obe', ca tu káat chi'itajo'ob ti' leti'ob: ¿Ba'ax u najmal c beetic yéetel u ba'asche' u Ku Israel? Leti'obe' tu núucajo'ob: Bise'ex tu caajil Gat. Le j filisteobo' tu bisajo'obi'.

⁹Ba'ale' cu dzo'ocol u bisico'ob Gate', Yuumtzile' tu túuchi'itaj sen sajac óolal ti' le caajo', tumen jóokla'aj chu'uchumo'ob tu wíinclilo'ob, je'el bix ti' nucuch máaco'obe' bey ti' mejen paalal.

¹⁰Le j filisteob túuno' tu bisajo'ob u ba'asche' ku Ecrón; u caajnáalilo'ob Ecrone' tu yaawtajo'ob: ¡Dzo'oc u taasa'al u ba'asche' u Ku Israel u ti'al ca u láaj quíimso'on!

¹¹Bey ti' tuláacal le caaj sen ooc u sajaquilil quíimil, ti' le chichich jaadz dzo'oc u túuchi'itico', túuxta'ab t'anbil tuláacal u nuuquil u aj ba'atelo'ob le j filisteobo', ca j a'ala'ab ti'ob: Lukese'ex way u ba'asche' u Ku Israelo', sute'ex tu cúuchil, yo'olal ma' u láaj quíimsico'on.

¹²U yawat ca'ach le caajo' cu kuchul sen náach, tumen le máaxo'ob ma' tu quíimilo'obo', cu láaj búucbesa'al u wíinclilo'ob tumen le chu'uchumo'obo'.