Read Yucateco 1 Samuel 6 Bible Online

1 Samuel 6 - Yucateco bible

1 Samuel 6

¹U ba'asche' Yuumtzile' tu beetaj siete winalo'ob tu lu'umo'ob le j filisteobo'.

²Le j filisteobo' tu much'quintajo'ob le aj kiino'ob yéetel le j wáayo'obo', ca tu káat chi'itajo'ob: ¿Ba'ax u najmal c beetic yéetel u ba'asche' Yuumtzil? A'ale'ex to'on bix unaj c sutic tu cúuchil.

³Leti'ob túune' tu núucajo'ob: Wa bin a ca'aje'ex a sute'ex u ba'asche' u Ku Israele', ma' a sutique'ex x ma' bo'olil, ba'ale' táanbese'ex wa ba'ax u ti'al a qui'imaccuntique'ex u yóol Yuumtzil. Te'ex túune' bíin utzaque'ex, bíin xan a táan óolte'ex ba'axten ma' jáawac u jadzique'exi'.

⁴Le j filisteob túuno' tu káat chi'itajo'ob: ¿Ba'ax je'el u páajtal c táanbesic u ti'al c qui'imaccuntic u yóole'? Le aj kiino'obo' tu núucajo'ob: cinco chu'uchumo'ob beeta'ano'ob yéetel oro, jujun túul tu yo'olal u nuuquil u aj ba'atel le j filisteobo'; bey xan cinco ch'o'ob beeta'ano'ob láili' yéetel oroe', tumen te'ex yéetel a nuuquile'exe', jun tacáalili' báan koja'anilo'ob ca mukyajtique'ex.

⁵Let o'olale', beete'ex yéetel oro le chu'uchumo'ob bey xan le ch'o'ob kascuntic le lu'umo'obo', ca dza'ex nojbe'enil ti' u Ku Israel; tumen míin je'el u jáawal u jaadz ta wóokole'exe', tu yóokol a kuex yéetel tu yóokol a lu'ume'ex.

⁶¿Ba'axten bíin a dzu'uyquinte'ex a pucsi'ikale'ex, je'el bix tu beetajilaco'ob le j egipciob yéetel faraón, chéen p'is cu dzo'ocol u chichich ja'adzalo'obe' tu cha'ajo'ob u jóokol le j israelitaobo'?

⁷Túuxte'ex beetbil jun p'éel túumben bolan; cu dzo'ocole' ch'a'ex ca'a túul x wacaxo'ob yaan u mejnilo'ob mix jun téen dza'abac tu yóokolo'ob u nu'ucul u bukla'al lu'um, ca a dza'exo'ob u jíilto'ob le bolano'; ba'ale' ma' a cha'ique'ex u bin u mejnilo'ob tu paacho'ob, p'ate'exo'ob tu cúuchil tu'ux cu tzéenta'alo'obo'.

⁸Cu dzo'ocole', ch'a'ex u ba'asche' Yuumtzil, dza'ex túun te j bolano', dza'ex xan ti' jun p'éel nu'ucul le ba'alo'ob beeta'ano'ob yéetel oro cu táanbesa'al u ti'al u qui'imactal u yóol Yuumtzil, ti' jun tzéelil ti' le bolano'. Cu dzo'ocole', cha'ex u bin tu juunal le bolano'.

⁹Ba'ale' p'ile'ex a wiche'ex ti' le lela': Wa le bolan cu ch'a'ic u tojil Bet-semes, u lu'umo'obo', bíin c ojéelt u Ku Israel túuxt le loob t óokolo', wa ma' úuch beyo', bíin c ojéelt ma' leti' jadzo'oni', chéen yanili' u taal t óokol le loobo'.

¹⁰Le j xiibo'obo' tu beetajo'ob beyo'. Tu cha'ajo'ob ca'a túul x wacaxo'ob yaan u mejnilo'obo', cu dzo'ocol u kalico'ob u mejnilo'ob tu'ux cu tzéenta'alo'obo', tu dzajo'ob le x wacaxo'ob u jíilto'ob le bolano';

¹¹cu dzo'ocole' tu dzajo'ob u ba'asche' Yuumtzil te j bolano', ca tu dzajo'ob xan ichil u nu'ucul tu'ux yaan le ch'o'ob beeta'ano'ob yéetel oroo', bey xan le chu'uchumo'ob láili' oro' u ca'ajo'obo'.

¹²Cu dzo'ocol lelo' le x wacaxo'obo' j bino'ob ti' le bej cu bin Bet-semes, ca'aliquil táan u jéencalo'obe' j bino'ob tu tojil, ma' j kéecho'ob mix tu'uxi'. Le j filisteobo', j bino'ob tu paacho'ob tac tu xuul u lu'umilo'ob Bet-semes.

¹³U caajnáalilo'ob Betsemes, yano'ob ti' le táax kóom lu'um táan ca'ach u jochico'ob u trigo'obo', sen qui'imacchaj u yóolo'ob le ca tu líikesaj u yicho'obe', tumen tu yilajo'ob le ba'asche'o.

¹⁴Le ca j kuch le bolan tu káaxo'ob Josue', yaan Bet-semeso', wa'alaji. Te'elo' yaan ca'ach jun p'éel nojoch tuunichi'. U cajnáalilo'ob Bet-semeso', tu si'into'ob u che'il le bolano', ca tu kubo'ob le x wacaxo'ob láaj tóocbil ti' Yuumtzilo'.

¹⁵Le j levitaobo', dzo'oquili' u lukesico'ob u cuuch le bolano', le nu'ucul tu'ux yaan le ba'alo'ob oro u ca'ajo'obo', tu dzajo'ob tu yóokol le nojoch tuunicho'; ti' le kiinaco', u caajnáalilo'ob Bet-semese' tu táanbeso'ob ti' Yuumtzil ba'alche'ob láaj tóocbil yéetel u láak quíimsbil ba'alche'ob.

¹⁶Le ca j dzo'oc u yilico'ob tuláacal le ba'ax cu yúuchul le cinco u nuuquilo'ob u aj ba'atelilo'ob le j filisteobo', j suunajo'ob Ecrón ti'ilie' kiino'.

¹⁷Le cinco chu'uchumo'ob oro u ca'ajo'ob tu táanbeso'ob le j filisteob u ti'al u qui'imaccuntico'ob u yóol Yuumtzilo', tu táanbeso'ob tu yo'olal u caajilo'ob Asdod, Caza, Ascalón, Gat yéetel Ecrón;

¹⁸le ch'o'ob beeta'ano'ob yéetel oro, tu dzajo'ob je'el bix buca'aj u ya'abil u caajilo'ob le j filisteob u nuuquilo'ob le aj ba'atelo'obo', lelo' táacpaja'an ichil je'el bix le yaan u tuulumilo'obo', bey le péet caajo'ob mina'an u tuulumilo'obo'. Le nojoch tuunich tu'ux j dzaab u ba'asche' Yuumtzilo', tac bejela'e' cu yila'al tu kaax Josué yaan Bet-semeso'.

¹⁹Ba'ale' Yuumtzile' tu beetaj u quíimil dze'edzec u caajnáalilo'ob Bet-semes, tumen j bino'ob ch'eeneb ichil u ba'ascheo'. Tu quíimsaj setenta j xiibo'ob,[3] le caajo' j okolnaj tu yo'olal le quíimsaj tu beetaj Yuumtzilo'.

²⁰Leti'ob túune' tu ya'alajo'ob ti' u caajnáalilo'ob Bet-semes: ¿Máax je'el u páajtal u wa'atal tu táan Yuumtzil, tu táan le quili'ich Kuo'? ¿Máax t óokol bíin xi'ic le quéen u tzelubáa ichilo'one'?

²¹Tu túuchi'itajo'ob ti' u caajnáalilo'ob Quiriat-jearim le túuchi' t'aana': Le j filisteobo' dzo'oc u sutico'ob u ba'asche' Yuumtzil; co'otene'ex a ch'a'ex a bise'ex.