Read Yucateco 1 Samuel 7 Bible Online

1 Samuel 7 - Yucateco bible

1 Samuel 7

¹U caajnáalilo'ob Quiriat Gearime', j bino'ob u ch'a'ob u ba'asche' Yuumtzil ca tu bisajo'ob u yoqueso'ob tu yotoch Abinadab yaan ti' jun p'éel jo'ol pu'uc; ca tu jun páaycunto'ob Eleazar u ti'al canantic.

²J máan veinte ja'abo'ob bisa'ac le ba'asche' Quiriat-gearim, tuláacal Israele' táan ca'ach u caxtic Yuumtzil yéetel yaayam óolal.

³Let o'olale' Samuele' tu ya'alaj ti' le j israelitaobo': Wa tu jaajil a wóole'ex ca suute'ex ti' Yuumtzile', u najmal a pulique'ex le j táanxel lu'um kuobo', bey xan u yoochelo'ob Astarté, u ti'al ca cuxlaque'ex chéen u ti'al Yuumtzil, tu yo'olal a kultique'ex chéen leti'. Leti' túune' bíin u toque'ex ti' u méektáan le j filisteobo'.

⁴Le j israelitaobo', tu pulajo'ob u jejeláasil u yoochelo'ob Baal yéetel Astarté, ca tu kultajo'ob chéen Yuumtzil.

⁵Cu dzo'ocole' Samuele' tu ya'alaj: Much'quinte'ex tuláacal Israel tu lu'umil Mizpae', ca payalchi'inaquen ti' Yuumtzil ta wo'olale'ex.

⁶Le j israelitaobo' tu much'ajuba'ob Miispae', ca tu jóokesajo'ob ja' te'elo', ca tu wecajo'ob u ti'al ti'ibil óolal ti' Yuumtzil. Ti' le kiinaco', j su'ukinajo'ob, tu cáantajo'ob tu táan tuláacal caaj kebanchajo'ob ti' Yuumtzil. Te tu lu'umil Mizpao', Samuele' tu beetajubáa u aj tzol xiquin le j israelitaobo'.

⁷Le ca tu yojéeltajo'ob le j filisteob ti' yaan le j israelitaob Miispae', u nuuquil le j filisteobo', j bino'ob j ba'atel tu yéetelo'ob. Le ca tu yojéeltajo'ob le j israelitaobo' tu ch'a'ajo'ob sajaquil

⁸ca tu ya'alajo'ob ti' Samuel: Ma' u ch'éenel a payalchi' t o'olal ti' Yuumtzil c Kui, u ti'al u toquico'on ti' u páajtalil le j filisteobo'.

⁹Samuele' tu ch'a'aj jun túul chan j tamane', ca tu táanbesaj tu túulisil láaj tóocbil ti' Yuumtzil; cu dzo'ocole', j payalchi'inaj ti' Yuumtzil tu yo'olal Israel, Yuumtzile' tu núucaj u payalchi' Samuel.

¹⁰Ca'aliquil Samuel táan u táanbesic le ba'alche' láaj tóocbilo', le j filisteobo' tu nadzajuba'ob u ba'atelto'ob le j israelitaobo'; ba'ale' Yuumtzile' tu túuchi'itaj jun p'éel nojoch u juum cháac tu yóokolo'obe' ca ja'ak u yóolo'ob, ca j pa'ab u muuko'ob tumen le j israelitaobo'.

¹¹Tu séeblaquil j jóok le j israelitaob Mizpa u ch'a'apachto'ob le j filisteobo', ca tu ba'atelto'ob tac tu caabalil Bet-car.

¹²Cu dzo'ocole' Samuele' tu ch'a'aj jun p'éel tuuniche' ca tu dzaj chúumuc ti' Mizpa yéetel Sen, ca tu dzaj u kaaba'int Even-ezer,[4] tumen tu ya'alaj: Tac bejela'a' cu yáantico'on Yuumtzile'.

¹³Le j filisteobo' j pa'ab u muuko'ob, ma' páatchaj u ca'a bino'ob u ba'atelto'ob le j israelitaobo'; ca'aliquil cuxa'an Samuele', Yuumtzile' tu ba'ateltaj le j filisteobo'.

¹⁴Le caajo'ob ca'ach ch'a'ano'ob tumen le j filisteob ti' le j israelitaob likbal Ecrón tac Gato', j ca'a ti'alinta'abo'ob tumen Israel. Bey túuno' le j israelitaobo', tu tocajo'ob u lu'umo'ob ti' le j filisteobo', ca j yanchaj jéedzel ichil j israelitaob yéetel j amorreob.

¹⁵Samuele' tu beetaj u aj Tzol xiquin Israel tuláacal u kiinilo'ob u cuxtal,

¹⁶Tuláacal ja'abo'ob cu bin ca'ach Betel, Gilgal yéetel Miispa, u ti'al u táan óolt u ba'aluba'ob Israel tuláacal le cúuchilo'obo'.

¹⁷Cu dzo'ocole' cu suut ca'ach Ramá tu'ux yaan u yotoch, likbal Ramae' cu méektáantic tuláacal Israel. Te'elo', tu beetaj xan jun p'éel u multuunil kultaj ti' Yuumtzil.